Connect with us

Heilsa

Forstjórapistill: Ánægjuleg fækkun samfélagssmita og stytting vinnuvikunnar

Birt

þann

Kæra samstarfsfólk!

Árangursrík viðbrögð sóttvarnaryfirlækna og landsmanna allra eru nú að skila þeim árangri að samfélagssmitum fækkar ört. Það er afar ánægjulegt og vonandi horfum við fram á betri tíma hvað þennan vágest varðar. Við megum þó alls ekki sofna á verðinum. Við þurfum að viðhalda ítrustu sýkingavörnum áfram enda sýnir reynslan að lítið má út af bregða til að illa fari. Starfið á Landakoti færist nú aftur í fyrra horf og hið öfluga starf sem þar er unnið. Ég veit að margir, sérstaklega á Landakoti, eru sárir eftir opinbera umræðu síðustu vikna og finnst hún óvægin. Ég get vissulega tekið undir að hún hefur verið það á köflum, jafnvel ósanngjörn og stundum sett fram af þröngri sýn á afar flókið verkefni. En mér finnst þó ástæða til að árétta að oftast hefur gagnrýnin beinst að stjórnun og skipulagi heilbrigðisþjónustunnar og eðlilegt að forsvarsmenn spítalans svari fyrir þann þátt sem að spítalanum snýr, innan þess ramma sem starfseminni hefur verið skipaður. Gagnrýninni hefur sjaldnast verið beint gegn ykkar frábæra starfi og þeim góða árangri sem við höfum náð, heilt yfir. Munum það.

COVID-19 hefur sannarlega haft mikil áhrif víða um spítalann og innleiða hefur þurft nýja þekkingu í rauntíma, þegar hún varð til! Þriðja bylgja faraldursins sem við glímum við núna er talsvert öðru vísi en fyrri bylgjur og þekking okkar hefur aukist. Það hefur verið makalaust að fylgjast með þessu ótrúlega starfi sem unnið hefur verið á spítalanum. Við erum þakklát öllum þeim sem lagt hafa okkur lið, t.d. úr bakvarðasveitinni, en auðvitað hefur starfsfólkið sem fyrir er á spítalanum borið hitann og þungann af verkinu og það mun færa þekkinguna áfram. Sjaldan hefur gildi teymisvinnu sannað sig betur eða eins og Anna Harðardóttir, hjúkrunarfræðingur og meistaranemi í görgæsluhjúkrun segir í meðfylgjandi myndbandi „Þetta hefst ekki nema með góðri samvinnu“.

Í nýgerðum kjarasamningum hefur víða verið samið um breytingu á vinnutíma og er það mikilvægt framfaraskref eftir óbreytta lengd hefðbundinnar vinnuviku í 40 ár. Fyrir okkur á Landspítala gefur þessi breyting okkur tækifæri á að þróa vinnustaðinn í takti við nútíma kröfur og aðlaga vinnuna betur fjölskyldu- og einkalífi. Verkefnið er þó ekki einfalt og krefst þess að starfsfólk og stjórnendur taki sameiginlega ábyrgð á að láta breyttan vinnutíma ríma við kröfur þjónustunnar og hagkvæmni rekstrar. Útfærsla Landspítala á verkefninu verður samkvæmt svokallaðri umsóknaleið en í því felst að skipulagseiningar geta sótt um að breyta vinnutímanum meira en lágmarkið gerir ráð fyrir, að undangengnu umbótasamtali. Í því samtali finna starfsfólk og stjórnendur leiðir til að hagræða vinnutímanum án þess að þjónusta skerðist eða kostnaður aukist. Breyting á vinnutíma í vaktavinnu mun eiga sér lengri aðdraganda þar sem þar er um að ræða flóknari breytingu, meðal annars með talsverðri uppstokkun á því hvernig umbunað er fyrir störf vaktavinnufólks utan dagvinnutíma. Í vaktavinnunni getur stytting vinnuvikunnar orðið umtalsverð, að því gefnu að starfsfólk jafni vaktabyrðinni sín á milli. Sú breyting tekur gildi 1. maí á næsta ári, einnig að undangengnu samráðsferli á einingum, þar sem starfshlutföll verða endurskoðuð og mögulega skipulag vakta einnig. Það er von mín að starfsfólk og stjórnendur finni tíma á næstu vikum til að hefja þessi mikilvægu umbótaverkefni og ég vil vekja athygli á að allir geta kynnt sér hvað málið snýst um á vefsetrinu www.betrivinnutimi.is. Ég er sannfærður um að þessi umbreyting mun á endanum skila okkur betri vinnustað og öruggari spítala.

Góða helgi!

Páll Matthíasson

 


Heilsa

Dag- og göngudeild auglækninga lokuð í viku frá 18. janúar vegna flutnings

Birt

þann

Eftir

Dag- og göngudeild augnlækninga á Landspítala, við Þorfinnsgötu, verður lokuð frá mánudegi 18. janúar til mánudags 25. janúar 2021 vegna flutninga. Að báðum dögum meðtöldum.

Verið er að breyta Eiríksstöðum, þar sem áður voru skrifstofur Landspítala, í göngudeildahús. Þangað flyst dag- og göngudeild auglækninga og verður deildin opnuð á nýja staðnum þriðjudaginn 26. janúar.

Eiríksstaðir eru við Eiríksgötu, rétt neðan við Hallgrímskirkju, skáhalt þar sem Blóðbankinn var lengi.

Lesa meira

Heilsa

Forstjórapistill: Fumlaust viðbragð vegna greindra Covid-19 tilfella og réttlát forgangsröðun í bólusetningu

Birt

þann

Eftir

Kæra samstarfsfólk!

Eins og sóttvarnalæknir segir þá erum við vonandi komin í síðasta kafla COVID-19 farsóttarinnar, nú þegar farið er að bólusetja þjóðir heims. Áskoranirnar eru þó ærnar áfram og mikilvægt að halda vöku sinni. Það sannaðist í tvígang í vikunni þegar smit greindust á hjartadeild annars vegar og blóð- og krabbameinslækningadeild hins vegar. Í fyrra tilvikinu reyndist um eldra smit að ræða sem greindist við útskrift sjúklings en í hinu síðara fannst fyrir árverkni starfsfólks virkt smit hjá sjúklingi sem lagst hafði inn deginum áður, eftir að hafa fengið þjónustu á annarri heilbrigðisstofnun. Á skipulagðan og fumlausan hátt var strax gripið til víðtæks viðbragðs og deildunum samstundis lokað fyrir nýjum innlögnum og aðrir sjúklingar og starfsfólk skimað fyrir Covid-19. Snör vinnubrögð þrautþjálfaðra starfsmanna spítalans og öflugar sýkingarvarnir þeirra fyrir og eftir þessa alvarlegu atburði skiptu sköpum. Frekari smit hafa ekki greinst en viðbrögðin voru hárrétt og viðeigandi. Landspítali sinnir verkefnum af þessu tagi allan sólarhringinn, allan ársins hring og hér gengur fólk fumlaust og yfirvegað til verka. Það hefur margoft komið í ljós í heimsfaraldri Covid-19 að samstaða starfsfólks Landspítala nær jafnan hámarki andspænis erfiðustu áskorununum. Ég hygg að sömu sögu megi segja af öðrum heilbrigðisstofnunum um víða veröld. Þetta eru ótrúlegir vinnustaðir og einstakur heiður að tilheyra þeim.

Á þessum tímum þegar bóluefni er farið að berast til landsins er mikilvægt að við sýnum yfirvegun og stillingu. Sóttvarnarlæknir hefur, að vel athuguðu máli, sett fram forgangsröðun í reglugerð. Í reglugerðinni er ekki forgangsraðað þannig að tryggt sé að tiltekin starfsemi haldi velli, svo sem innviðir á borð við raforkuver eða einstaka heilbrigðisstofnun, heldur er horft til þeirra sem eru í mestri áhættu. Að leiðarljósi eru höfð þau grunngildi að láta okkar viðkvæmustu hópa ganga fyrir og þá sérstaklega aldraða. Fólk í almannaþjónustu (sérstaklega heilbrigðisþjónustu) sem metið er í hááhættu er einnig í forgangi. Aðrir koma síðar. Þetta er skynsamleg forgangsröðun og réttlát og það er mikilvægt að við treystum mati heilbrigðisyfirvalda í þessu efni.

Ég og fulltrúar farsóttarnefndar spítalans höfum á undanförnum vikum fengið fjölmargar rökstuddar óskir um að ákveðnir hópar innan spítalans þurfi að ganga fyrir öðrum í bólusetningu. Þótt ég hafi fullan skilning á því að stjórnendur beri hag starfsfólks síns sér fyrir brjósti og vilji verja sem best þá þjónustu sem veitt er og þótt ég skilji vel að fólk óttist það að sýkjast þá verðum við öll að virða forgangsröðun sem sett hefur verið fram. Eftir því sem bóluefni berst til landsins þá verða landsmenn bólusettir og þar er fylgt þeirri forgangsröðun sem liggur fyrir. Þar gildir sama fyrir Jón og séra Jón og ég vil sérstaklega taka fram, vegna sögusagna um annað, að forstjóri og framkvæmdastjórn eða aðrir stjórnendur spítalans hafa ekki verið bólusettir fyrir COVID-19. Undantekningar frá þessu eru auðvitað þær ef fólk sinnir einnig beinum sjúklingasamskiptum í framlínu og tilheyrir þannig þegar skilgreindum forgangshópum. Við hin bíðum róleg þar til að okkur kemur, í þeirri vissu að framar okkur í röðinni er sannarlega fólk sem þarf meira á bólusetningu að halda.

Góða helgi og baráttukveðjur öll!

Páll Matthíasson

Lesa meira

Heilsa

Blóð- og krabbameinslækningadeild opnuð á ný – hvorki Covid-19 smit hjá sjúklingum né starfsfólki

Birt

þann

Eftir

Niðurstöður úr Covid-19 skimun sjúklinga og starfsfólks blóð- og krabbameinslækningadeildar 11EG á Landspítala liggja fyrir og eru allar neikvæðar. Ekki er um útbreitt smit á deildinni að ræða. Af því tilefni hefur farsóttanefnd spítalans ákveðið að opna deildina fyrir innlögnum á nýjan leik og er starfsemi hennar með venjubundnum hætti.

Nýinnlagður sjúklingur á blóð- og krabbameinslækningadeild Landspítala 11EG fékk jákvætt svar við Covid-19 skimun um kl. 20:00 í gærkvöldi, miðvikudaginn 13. janúar 2021. Þegar í stað var gripið til ítrustu sóttvarnaaðgerða og deildinni lokað fyrir innlögnum. Um 30 sjúklingar og 20 starfsmenn voru síðan skimaðir snemma í morgun, fimmtudaginn 14. janúar.

Enn liggur ekki fyrir hvernig sjúklingurinn smitaðist en þó þykir ljóst að hann hafi verið með smit þegar við innlögn.  Rakning stendur ennþá yfir. Sjúklingurinn var fluttur á smitsjúkdómadeild Landspítala A7 í Fossvogi strax í gærkvöldi og settur í einangrun, vegna veikinda sinna.

Smit, hvort heldur sjúklinga eða starfsfólks á deildum, eru alvarlegir atburðir í starfsemi Landspítala og viðbragðið alltaf umfangsmikið og útbreitt. Það viðbragð, öflugar sóttvarnir og umfangsmiklar öryggisráðstafanir til að vernda sjúklinga og starfsfólk hafa nú leitt af sér þessa góðu niðurstöðu.

Lesa meira

Vinsælast

Allur réttur áskilin © 2020 Tíðin