05.08.2020

Guðmunda Ólafsdóttir hefur verið ráðin framkvæmdastjóri Íþróttabandalags Akraness í stað Hildar Karenar Aðalsteinsdóttur sem hverfur til annarra starfa. Guðmunda kemur til starfa frá Íþróttafélagi Reykjavíkur þar sem hún var verkefnastjóri/framkvæmdastjóri tímabundið en áður starfaði hún sem fjármálastjóri hjá Iðnvélum og sem framkvæmdastjóri Next á Íslandi. Guðmunda hefur lokið MBA gráðu frá Háskóla Íslands á sviði nýsköpunar og stjórnunar.

Guðmunda þekkir vel til íþróttastarfs en hún hefur komið að íþróttastarfi á mörgum sviðum í hartnær tuttugu ár, setið í aðalstjórn Knattspyrnufélags Reykjavíkur (KR), stýrt verkefni um eflingu kvennastarfs innan KR og stýrt vinnu við umsókn til Íþrótta- og Ólympíusambands Íslands um Fyrirmyndafélag ÍSÍ. Lokaverkefni Guðmundu í MBA náminu var stefnumótun KR í heild fyrir árin 2019-2024. Nýr framkvæmdastjóri tekur formlega til starfa 10. ágúst. 

ÍSÍ þakkar Hildi Karen fyrir góð störf í þágu íþróttahreyfingarinnar og óskar henni velfarnaðar á nýjum vettvangi.