Connect with us

Landsspítali

Húðkrem að gjöf frá ORF Líftækni / Bioeffect á Íslandi til varnar við andlitsgímunotkun

Birt

on

ORF Lífækni / Bioeffect á Íslandi er meðal fjölmargra fyrirtækja sem hafa staðið með Landspítala og stutt starfsfólkið með gjöfum á erfiðum tíma í Covid-19 faraldrinum. 

Þann 30. mars 2020 færðu fulltrúar fyrirtækisins 550 pakkningar af BIOEFFECT EGF Serum Special Edition, sem inniheldur EGF-húðdropana, vinsælustu vöru fyrirtækisins.

„Við hjá ORF Líftækni viljum þakka ykkur fyrir að standa vaktina fyrir þjóðina á þessum erfiðu tímum. Eftir að hafa séð myndir af heilbrigðisstarfsfólki með þurra og sára húð eftir langvarandi notkun á andlitsgrímum og öðrum öryggisbúnaði, bæði á Íslandi og víðsvegar um heiminn, viljum við leggja okkar af mörkum. Við vonum að gjöfin komi að góðum notum og viljum þakka fyrir ykkar ómetanlegu störf,“ segir í orðsendingu sem fylgdi gjöfinni.

Húðkreminu var meðal annars dreift á bráðamóttöku, gjörgæslu, COVID-19-göngudeild og deildir A6 og A7 í Fossvogi.

Stöndum með Landspítala

Lesa meira

Heilsa

Gunnar Ágúst Beinteinsson ráðinn framkvæmdastjóri mannauðs

Birt

on

By

Gunnar Ágúst Beinteinsson hefur verið ráðinn framkvæmdastjóra mannauðs á Landspítala.

Gunnar hefur farsæla reynslu af mannauðsmálum, stefnumótun sem og rekstri og stjórnun. Hann lauk prófi í viðskiptafræði frá Háskóla Íslands árið 1991. Þá lauk hann meistaranámi með áherslu á stefnumótun og stjórnun frá Viðskiptaháskólanum í Kaupmannahöfn árið 2002. Hann hóf störf hjá Actavis Group árið 2004 sem forstöðumaður stefnumótunar og frá árinu 2006 sem framkvæmdastjóri mannauðsmála. Árið 2015 varð hann framkvæmdastjóri rekstrar og mannauðsmála hjá Xantis Pharma AG í Sviss. Frá því fyrr á þessu ári hefur hann starfað við eigið ráðgjafarfyrirtæki í Sviss. Gunnar spilaði handbolta með FH og íslenska landsliðinu á árunum 1985-2000.

Gunnar er boðinn velkominn til starfa á Landspítala.

Samhliða þessu lætur af störfum framkvæmdastjóra mannauðs Ásta Bjarnadóttir eftir 5 farsæl ár í uppbyggingu öflugs mannauðsstarfs á spítalanum. Hún mun gegna starfi framkvæmdastjóra mannauðs til 1. janúar og gert er ráð fyrir mikilvægum kröftum hennar áfram á Landspítala.

Lesa meira

Heilsa

Styrkir til ungra vísindamanna afhentir 2. desember

Birt

on

By

Styrkir Vísindasjóðs Landspítala til ungra vísindamanna á spítalanum verða afhentir í Hringsal miðvikudaginn 2. desember 2020 milli kl. 12:00 og 13:00. Viðburðinum verður streymt. 
Fundarstjóri verður Ingibjörg Gunnarsdóttir, deildarstjóri næringarstofu Landspítala og prófessor við Háskóla Íslands.

Dagskrá

Ávarp

Inga Þórsdóttir, forseti Heilbrigðisvísindasviðs Háskóla Íslands

Erindi

Ungur vísindamaður og hvað svo? Klínískur rannsakandi á Landspítala
– Þórdís K. Þorsteinsdóttir, forstöðumaður Rannsóknarstofu í bráðafræðum og dósent við Háskóla Íslands
Styrkhafi sem ungur vísindamaður 2012

Afhending styrkja

Páll Matthíasson, forstjóri Landspítala

Styrkhafar kynna vísindaverkefni sín með örfyrirlestrum

Lesa meira

Heilsa

Forstjórapistill: Ánægjuleg fækkun samfélagssmita og stytting vinnuvikunnar

Birt

on

By

Kæra samstarfsfólk!

Árangursrík viðbrögð sóttvarnaryfirlækna og landsmanna allra eru nú að skila þeim árangri að samfélagssmitum fækkar ört. Það er afar ánægjulegt og vonandi horfum við fram á betri tíma hvað þennan vágest varðar. Við megum þó alls ekki sofna á verðinum. Við þurfum að viðhalda ítrustu sýkingavörnum áfram enda sýnir reynslan að lítið má út af bregða til að illa fari. Starfið á Landakoti færist nú aftur í fyrra horf og hið öfluga starf sem þar er unnið. Ég veit að margir, sérstaklega á Landakoti, eru sárir eftir opinbera umræðu síðustu vikna og finnst hún óvægin. Ég get vissulega tekið undir að hún hefur verið það á köflum, jafnvel ósanngjörn og stundum sett fram af þröngri sýn á afar flókið verkefni. En mér finnst þó ástæða til að árétta að oftast hefur gagnrýnin beinst að stjórnun og skipulagi heilbrigðisþjónustunnar og eðlilegt að forsvarsmenn spítalans svari fyrir þann þátt sem að spítalanum snýr, innan þess ramma sem starfseminni hefur verið skipaður. Gagnrýninni hefur sjaldnast verið beint gegn ykkar frábæra starfi og þeim góða árangri sem við höfum náð, heilt yfir. Munum það.

COVID-19 hefur sannarlega haft mikil áhrif víða um spítalann og innleiða hefur þurft nýja þekkingu í rauntíma, þegar hún varð til! Þriðja bylgja faraldursins sem við glímum við núna er talsvert öðru vísi en fyrri bylgjur og þekking okkar hefur aukist. Það hefur verið makalaust að fylgjast með þessu ótrúlega starfi sem unnið hefur verið á spítalanum. Við erum þakklát öllum þeim sem lagt hafa okkur lið, t.d. úr bakvarðasveitinni, en auðvitað hefur starfsfólkið sem fyrir er á spítalanum borið hitann og þungann af verkinu og það mun færa þekkinguna áfram. Sjaldan hefur gildi teymisvinnu sannað sig betur eða eins og Anna Harðardóttir, hjúkrunarfræðingur og meistaranemi í görgæsluhjúkrun segir í meðfylgjandi myndbandi „Þetta hefst ekki nema með góðri samvinnu“.

Í nýgerðum kjarasamningum hefur víða verið samið um breytingu á vinnutíma og er það mikilvægt framfaraskref eftir óbreytta lengd hefðbundinnar vinnuviku í 40 ár. Fyrir okkur á Landspítala gefur þessi breyting okkur tækifæri á að þróa vinnustaðinn í takti við nútíma kröfur og aðlaga vinnuna betur fjölskyldu- og einkalífi. Verkefnið er þó ekki einfalt og krefst þess að starfsfólk og stjórnendur taki sameiginlega ábyrgð á að láta breyttan vinnutíma ríma við kröfur þjónustunnar og hagkvæmni rekstrar. Útfærsla Landspítala á verkefninu verður samkvæmt svokallaðri umsóknaleið en í því felst að skipulagseiningar geta sótt um að breyta vinnutímanum meira en lágmarkið gerir ráð fyrir, að undangengnu umbótasamtali. Í því samtali finna starfsfólk og stjórnendur leiðir til að hagræða vinnutímanum án þess að þjónusta skerðist eða kostnaður aukist. Breyting á vinnutíma í vaktavinnu mun eiga sér lengri aðdraganda þar sem þar er um að ræða flóknari breytingu, meðal annars með talsverðri uppstokkun á því hvernig umbunað er fyrir störf vaktavinnufólks utan dagvinnutíma. Í vaktavinnunni getur stytting vinnuvikunnar orðið umtalsverð, að því gefnu að starfsfólk jafni vaktabyrðinni sín á milli. Sú breyting tekur gildi 1. maí á næsta ári, einnig að undangengnu samráðsferli á einingum, þar sem starfshlutföll verða endurskoðuð og mögulega skipulag vakta einnig. Það er von mín að starfsfólk og stjórnendur finni tíma á næstu vikum til að hefja þessi mikilvægu umbótaverkefni og ég vil vekja athygli á að allir geta kynnt sér hvað málið snýst um á vefsetrinu www.betrivinnutimi.is. Ég er sannfærður um að þessi umbreyting mun á endanum skila okkur betri vinnustað og öruggari spítala.

Góða helgi!

Páll Matthíasson

 


Lesa meira

Vinsælast

Allur réttur áskilin © 2020 Tíðin