Connect with us

Stjórnarráðið

Ræddi leiðir að öflugum efnahagsbata á ráðherrafundi OECD

Birt

on

Bjarni Benediktsson, fjármála- og efnahagsráðherra tók þátt í ráðherrafundi Efnahags- og framfarastofnunarinnar (OECD) í dag og í gær. Meginefni fundarins var að ræða leiðir að öflugum og grænum efnahagsbata sem sé sem flestum til hagsbóta.

Ráðherra var frummælandi í tveimur málstofum á fundinum og ræddi m.a. aðgerðir til að örva hagkerfi ríkjanna, stefnu einstakra ríkja og alþjóðlega samvinnu.

„Það er gríðarleg áskorun fyrir okkur öll að takast á við heimsfaraldur kórónuveiru. Á næstunni er eitt helsta verkefni okkar að koma í veg fyrir að sú mikla aukning atvinnuleysis sem við höfum séð verði varanlegt,“ sagði fjármála- og efnahagsráðherra á fundinum. Hann sagði einnig að á Íslandi væri tekist á við þennan vanda með viðamiklum vinnumarkaðsaðgerðum sem og umfangsmiklu fjárfestingarátaki sem beindist ekki aðeins að þeim innviðum sem fyrir væru heldur einnig að því að efla rannsókna- og þróunarstarfsemi og opinbera tækniinnviði.

„Það er mitt mat að efling stafrænna innviða sé lykilatriði til að hjálpa okkur að komast út úr þessari kreppu sem samkeppnishæfara samfélagi. Við höfum fylgst grannt með þróuninni í Eistlandi og Finnlandi, sem standa framarlega í þessum efnum, og erum þakklát fyrir samstarfið við þessar þjóðir á þessu sviði.“

„Þrátt fyrir að við séum nú í miðjum faraldri er mikilvægt að leggja línur til framtíðar og huga að áætlanagerð til lengri tíma,“ sagði Bjarni og tók sem dæmi að á Íslandi væri nú unnið að því að ljúka síðasta hluta umfangsmikilla breytinga á tekjuskattskerfinu og nýlega hefði verið lögð fram fjármálaáætlun til fimm ára með markmið um stöðvun skuldasöfnunar árið 2025, áður en skuldir færu yfir 60% af landsframleiðslu.

Á fundinum var jafnframt rætt um stefnu ríkja og alþjóðlega samvinnu til lausnar vandanum sem hlýst af heimsfaraldrinum. Bjarni sagði að þegar séð væri fyrir endann á faraldrinum væri brýnt að huga að því að mikilvæga verkefni að endurreisa þrótt opinberra fjármála. „Þetta á ekki síst við í litlum hagkerfum sem reka sjálfstæðan gjaldmiðil eins og Ísland,“ sagði ráðherra.

Bjarni sagði að Ísland hefði sérstakan áhuga á að horfa til grænna lausna til framtíðar. „Orkan sem við nýtum er næstum 100% endurnýjanleg og 40% nýrra bíla í landinu eru annaðhvort rafbílar eða vetnisknúnir og við erum að leita leiða til að auka græna fjárfestingu fyrirtækja með sérstökum skattaafslætti á græna fjárfestingu í kreppunni.“

Lesa meira

Innlent

Flugsamgöngur til Boston tryggðar út árið

Birt

on

By

Samgöngu- og sveitarstjórnarráðuneytið hefur framlengt samning við Icelandair um að tryggja lágmarksflug til Bandaríkjanna út árið. Samningurinn gerir ráð fyrir að flogið verði minnst tvisvar í viku til Boston á tímabilinu. 

Samningur við Icelandair um að tryggja millilandaflug til Bandaríkjanna með flugi til Boston hefur verið framlengdur í þrígang í ár. Nýr viðauki gildir til og með 31. desember. Allar tekjur Icelandair af flugi til Boston munu lækka greiðslur vegna samningsins.

Markmiðið er sem fyrr að tryggja lágmarks flugsamgöngur til og frá landinu vegna þess ástands sem skapast hefur vegna Covid-19 faraldursins. Það voru Sigurður Ingi Jóhannsson, samgöngu- og sveitarstjórnarráðherra, og Bogi Nils Bogason, forstjóri Icelandair, sem undirrituðu samninginn með rafrænum hætti.

Lesa meira

Innlent

Lög á deilu flugvirkja

Birt

on

By

Dómsmálaráðherra hefur sent frá sér yfirlýsingu vegna frumvarps sem lagt verður fyrir alþingi í dag sem bindur enda á verkfall flugvirkja hjá Landhelgisgæslu Íslands. Yfirlýsingin er svohljóðandi:

„Landhelgisgæsla Íslands er ein af grunnstoðum öryggis- og almannavarna í landinu. Þörfin fyrir öfluga björgunarþjónustu er hvað brýnust á þessum tíma árs þegar dimmasta skammdegið fer í hönd. Hættulegar veðurfarslegar aðstæður geta skapast víða um land og þá ekki síst fyrir sjófarendur á miðunum í kringum landið. Þyrlur Landhelgisgæslunnar eru ekki aðeins nauðsynlegar við leit og björgun á sjó og landi heldur sinna þær einnig sjúkraflugi og eru þannig einnig mikilvægur hlekkur í heilbrigðis- og öryggisþjónustu fyrir allan almenning. Verkfall flugvirkja hefur stefnt þessu öryggi í mikla tvísýnu. Staðan er óviðunandi og ég tel ekki rétt að ein stétt hjá Landhelgisgæslunni geti haft þessi gífurlegu áhrif á öryggismál þjóðarinnar, einkum og sér í lagi þegar haft er í huga að öðrum mikilvægum starfsmönnum stofnunarinnar er óheimilt að fara í verkfall með vísan til almannahagsmuna.Samninganefnd ríkisins hefur boðið flugvirkjum Gæslunnar nýjan samning með sömu hækkunum og aðrir hafa fengið en ekki samþykkt eldra fyrirkomulag með tengingu við kjarasamning Icelandair. Þessar viðræður hafa nú siglt í strand og flugvirkjar hafa hafnað sáttatillögu ríkissáttasemjara um eins árs samning. Kjaradeilan varðar almannahagsmuni og almannaöryggi. Starfsemi flugdeildar Landhelgisgæslunnar verður einfaldlega að komast í eðlilegt horf án tafar.Ég hef því lagt það til og ríkisstjórnin hefur samþykkt að leggja fyrir Alþingi frumvarp að lögum til að stöðva verkfallið og gerðardómi verði falið að ákveða kaup og kjör flugvirkja hjá Landhelgisgæslunni hafi samningar ekki tekist fyrir 4. janúar nk. Einnig verður gerðardómi ætlað að taka til meðferðar útfærslu á tengingu kjarasamnings flugvirkja við aðrar sambærilegar starfsstéttir á almennum vinnumarkaði. Allt er þetta skýrt mun nánar í greinargerð með frumvarpinu sem ég mun mæla fyrir í þinginu í dag.“

Lesa meira

Innlent

Brandenburg valið úr hópi umsækjenda í hönnun og þróun einkennis Fyrirmyndaráfangastaða

Birt

on

By

Atvinnuvega- og nýsköpunarráðuneytið og umhverfis- og auðlindaráðuneytið í samstarfi við Miðstöð hönnunar og arkitektúrs auglýstu á dögunum eftir hönnuði eða hönnunarteymi til að vinna að hönnun og þróun einkennis og kynningarefnis fyrir nýtt kerfi áfangastaðastjórnunar, sem ber vinnuheitið Fyrirmyndaráfangastaðir í ferðaþjónustu.

Alls bárust 13 umsóknir um að taka verkefnið að sér en að lokum var það niðurstaða valnefndar að bjóða auglýsingastofunni Brandenburg verkefnið. 

„Ég vil þakka Miðstöð hönnunar og arkitektúrs fyrir að leiða valferlið og við hlökkum til að vinna að mótun ásýndar Fyrirmyndaráfangastaða með Brandenburg, í þágu íslenskrar ferðaþjónustu”, segir Þórdís Kolbrún Reykfjörð Gylfadóttir, ferðamála- ,iðnaðar – og nýsköpunarráðherra.  „Undanfarin ár hefur uppbygging innviða á áfangastöðum ferðamanna um land allt verið í fyrirrúmi, með áherslu á náttúruvernd og öryggismál. Með þessu verkefni höldum við áfram á þeirri braut en með nýrri nálgun á áfangastaðastjórnun, sem tekur aukið tillit til upplifunar gesta og sérkenna hvers staðar. Það er okkar von að Fyrirmyndaráfangastaðir efli jákvæða ímynd Íslands sem lands sjálfbærrar þróunar, í takt við framtíðarsýn og leiðarljós ferðaþjónustunnar til 2030.” 

Markmiðið með Fyrirmyndaráfangastöðum er að skapa umgjörð utan um hugmyndafræði heildstæðrar nálgunar í áfangastaðastjórnun. Hægt er lesa nánar um verkefnið hér.

Við á Brandenburg erum einstaklega ánægð með að hafa verið valin úr sterkum hópi umsækjenda og mjög spennt fyrir þessu mikilvæga verkefni. Við tökum glöð við þeirri ábyrgð sem það felur í sér. Okkar hlutverk verður að skapa bæði merki og umgjörð Fyrirmyndaráfangastaða með skírskotun í allt hið sérstæða sem gerir Ísland að spennandi áfangastað ásamt því að finna verkefninu viðeigandi heiti,“ segir Rúna Dögg Cortez, viðskiptastjóri hjá Brandenburg „Við sóttumst eftir því að taka þátt í verkefninu því það vakti áhuga okkar og sameinaði ástríðu okkar fyrir hönnun og Íslandi. Fyrirmyndaráfangastaðir er verkefni sem augljóslega hefur verið lögð mikil vinna í að undirbúa og er ánægjulegt að vera hluti af áframhaldandi vinnu við að styrkja sjálfbæra þróun ferðaþjónustunnar.“

Í valnefnd sátu María Reynisdóttir, sérfræðingur, fulltrúi atvinnuvega- og nýsköpunarráðuneytis, Einar Á. E. Sæmundssen, þjóðgarðsvörður á Þingvöllum, fulltrúi umhverfis- og auðlindaráðuneytis og Magnús Hreggviðsson, grafískur hönnuður, fulltrúi Miðstöðvar hönnunar og arkitektúrs.

Lesa meira

Vinsælast

Allur réttur áskilin © 2020 Tíðin