Connect with us

Stjórnarráðið

Ríkisstjórnin samþykkir enn frekari efnahagsaðgerðir vegna kórónuveirufaraldursins

Birt

on

Ríkisstjórnin samþykkti á fundi sínum í morgun að grípa til frekari efnahagsaðgerða vegna kórónuveirufaraldursins. Er þar annars vegar um að ræða tillögur að útvíkkun tekjufallsstyrkja, en frumvarp um þá er þegar til meðferðar á Alþingi, og hins vegar nýtt úrræði, viðspyrnustyrki, sem ætlað er að styðja við rekstur fyrirtækja á komandi mánuðum.

Fjármála- og efnahagsráðherra mun leggja til við efnahags- og viðskiptanefnd Alþingis að gerðar verði breytingar til útvíkkunar á frumvarpi um tekjufallsstyrki þannig að úrræðið nái til fleiri rekstraraðila og gildi í lengri tíma. Tekjufallsstyrkir eru hugsaðir til að styðja við fyrirtæki sem hafa orðið fyrir verulegu tekjufalli vegna faraldursins frá vori til nóvembermánaðar (1. apríl – 31. október). Úrræðið mun nýtast fjölmörgum einstaklingum og fyrirtækjum sem m.a. hafa þurft að sæta takmörkunum vegna sóttvarnaráðstafana án þess að hafa verið gert að loka:

– fallið er frá skilyrðum um hámarksfjölda starfsmanna (3 skv. frumvarpi);
– lagt er til að styrkir verði veittir fyrir allt að 5 stöðugildi;
– styrkfjárhæð tekur mið af rekstrarkostnaði og tekjufalli: rekstraraðilar sem verða fyrir 40-70% tekjufalli geta átt rétt á styrk að fjárhæð 400 þús.kr. á mánuði á hvert stöðugildi, en sé tekjufallið 70-100% getur styrkur orðið 500 þús.kr. á hvert stöðugildi á mánuði;
– tímabil er lengt í sjö mánuði frá 1. apríl sl. að telja;
– hámarksstyrkur verður samkvæmt þessu 17,5 m.kr. á rekstraraðila.

Dæmi um styrkveitingar miðað við framangreindar breytingar er að finna hér að aftan.

Ennfremur mun fjármála- og efnahagsráðherra leggja fram frumvarp sem nú er í undirbúningi um nýtt úrræði, viðspyrnustyrki, sem gert er ráð fyrir að verði veittir í framhaldi af tekjufallstyrkjum og fram á næsta ár. Úrræðinu er ætlað tryggja að fyrirtæki sem orðið hafa fyrir tekjufalli vegna kórónaveirufaraldursins geti viðhaldið nauðsynlegri lágmarksstarfsemi á meðan áhrifa faraldursins gætir, varðveitt viðskiptasambönd og tryggt viðbúnað þegar úr rætist. Um viðspyrnustyrki munu gilda sambærileg skilyrði og eiga við um tekjufallsstyrki og verða þeir veittir með reglulegum greiðslum yfir a.m.k. sex mánaða tímabil eða allt fram á mitt næsta ár.

Þá ræddi ríkisstjórnin um mögulega framlengingu hlutabótaleiðarinnar sem rennur út nú um áramót. Hefur félags- og barnamálaráðherra þegar hafið undirbúning að framlengingu úrræðisins.

Loks má nefna að Alþingi hefur til meðferðar frumvarp fjármála- og efnahagsráðherra um framhald lokunarstyrkja. Í því felst að heimildir til greiðslu lokunarstyrkja miðast ekki eingöngu við takmarkanir sóttvarnaryfirvalda sem þegar hafa komið til framkvæmda heldur taka einnig til frekari takmarkana sem kunna að koma til síðar. Mun úrræðið ná til þeirra sem gert er að loka eða stöðva starfsemi og miðast undirbúningur að framkvæmd þess við að hægt verði að taka við umsóknum um lokunarstyrki um leið og málið er afgreitt á Alþingi.

Markmið framangreindra aðgerða er að tryggja sem best getu fyrirtækja til öflugrar viðspyrnu að faraldrinum loknum, að viðhalda samkeppnishæfni og að einfalda sem mest framkvæmd aðgerða til aðstoðar rekstraraðilum.

Dæmi um styrkveitingar miðað við framangreindar breytingar á fyrirliggjandi frumvörpum.

Rekstraraðili með fimm starfsmenn eða fleiri  sem gert var að loka (lokunarstyrkur og tekjufallsstyrkur)

Lokunarstyrkur í vor

3.600.000

Lokunarstyrkur í sept

1.000.000

Lokunarstyrkur í okt og til 3. nóv

2.900.000

Tekjufallsstyrkur ef 70% – 100% tekjufall

17.500.000

Hámark tekjufallsstyrks ef rekstraraðili hefur fengið hámark lokunarstyrkja fyrir

lokanir til 3. nóv.

10.000.000

Lokunarstyrkur í vor

3.600.000

Lokunarstyrkur í sept

1.000.000

Lokunarstyrkur í okt og til 3. nóv

2.900.000

Tekjufallsstyrkur ef 40% – 70% tekjufall

14.000.000

Hámark tekjufallsstyrks ef rekstraraðili

hefur fengið hámark lokunarstyrkja fyrir lokanir til 3. nóv. 

6.500.000

Rekstraraðili með 5 starfsmenn eða fleiri sem ekki var gert að loka en myndi eingöngu eiga rétt á tekjufallsstyrk – miðast við hámark tekjufallsstyrks

70% – 100% tekjufall

17.500.000

2.500.000 á hvern mánuð

40% – 70% tekjufall

14.000.000

2.000.000 á hvern mánuð

Lesa meira

Innlent

COVID-19: Forgangsröðun vegna bólusetningar

Birt

on

By

Heilbrigðisráðherra hefur staðfest reglugerð um forgangsröðun við bólusetningu vegna COVID-19. Tilgangur reglugerðarinnar er að ákveða forgangsröðunina á grundvelli málefnalegra sjónarmiða og með eins miklum fyrirsjáanleika og mögulegt er.

Við smíði reglugerðarinnar var horft til leiðbeininga Alþjóðaheilbrigðis­málastofnunarinnar um forgangsröðun við bólusetningu vegna COVID-19 og sjónarmiða sem fram hafa komið í sambærilegri vinnu hjá nágrannaþjóðum.

Líklegt er að notuð verði fleiri en ein tegund bóluefna hér á landi. Gera má ráð fyrir að bóluefnin kunni að henta ólíkum hópum með mismunandi hætti sem getur haft áhrif á forgangsröðunina. Sóttvarnalæknir ber ábyrgð á skipulagningu og samræmingu bólusetningar, svo sem hvaða bóluefni er notað og fyrir hvaða hópa og er einnig heimilt að víkja frá forgangsröðun reglugerðarinnar ef nauðsyn ber til.

Lögð verður sérstök áhersla á að bólusetja fyrst þá einstaklinga sem eru í framlínunni í baráttunni við sjúkdóminn. Þetta á við um heilbrigðisstarfsfólk og annað starfsfólk sem starfar á bráðamóttökum og gjörgæsludeildum sjúkrahúsa, á COVID-19 göngudeild og legudeildum fyrir sjúklinga sem smitast hafa af COVID-19, heilbrigðisstarfsmenn sem framkvæmda sýnatökur vegna gruns um COVID-19 og starfsfólk hjúkrunar- og dvalarheimila. Bólusetning einstaklinga sem dvelja á hjúkrunar- og dvalarheimilum og öldrunardeildum sjúkrahúsa verður einnig í miklum forgangi.

Í reglugerðinni eru skilgreindir tíu forgangshópar. Í mestum forgangi eru tiltölulega fámennir hópar en áætlað er að að í fyrstu fimm forgangshópunum séu rúmlega 20.000 einstaklingar. Í sjötta hópnum fjölgar hins vegar umtalsvert því þar er forgangsraðað þeim sem eru 60 ára og eldri. Í sjöunda hópnum eru einstaklingar með undirliggjandi langvinna sjúkdóma, í áttunda hópnum starfsfólk leik- grunn- og framhaldsskóla og tiltekið starfsfólk félags- og velferðarþjónustu, í níunda hópnum einstaklingar sem eru í viðkvæmri stöðu vegna félagslegra- og efnahagslegra aðstæðna og loks eru í tíunda hópnum allir aðrir sem óska bólusetningar, eftir því sem sóttvarnalæknir ákveður.

Ekki er gert ráð fyrir í reglugerðinni að börnum fæddum 2006 og síðar verði boðin bólusetning gegn COVID-19 nema þau hafi undirliggjandi langvinna sjúkdóma og séu í sérstökum áhættuhópi.

Reglugerðin hefur verið send Stjórnartíðindum og öðlast gildi við birtingu.

Lesa meira

Innlent

Fjölþætt viðbrögð við skýrslum rannsóknarnefnda Alþingis

Birt

on

By

Forsætisráðherra hefur lagt fram á Alþingi skýrslu, um ábendingar sem varða stjórnsýsluna í rannsóknarskýrslum Alþingis um orsakir falls íslensku bankanna 2008, orsakir falls sparisjóðanna og erfiðleika Íbúðalánasjóðs og viðbrögð við þeim.Eins og ítarlega er rakið í skýrslunni er það mat hlutaðeigandi stjórnvalda að brugðist hafi verið við flestum ábendingum rannsóknarnefndanna en það hefur verið gert með fjölþættum hætti.

Dregnar eru fram 339 ábendingar. Flestar heyra þær undir Fjármálaeftirlit Seðlabanka Íslands, fjármálaráðuneytið og forsætisráðuneytið og hefur verið brugðist við þeim í yfirgnæfandi hluta tilfella.

Skýrslan á rót sína að rekja til skýrslubeiðni sem Alþingi samþykkti 148. löggjafarþingi þar sem þess var beiðst að dregnar yrðu fram allar ábendingar er varða stjórnsýsluna í þeim þremur rannsóknarskýrslum sem beiðnin tók til og að greint yrði frá því hvort og þá hvernig brugðist hafi verið við einstökum ábendingum. Þeim stjórnvöldum sem nú bera ábyrgð á málefnunum sem ábendingar varða var síðan falið að svara því hvort og þá að hvaða marki brugðist hafi verið við ábendingum.

Lesa meira

Innlent

Fjallað um Covid-19 og Norðurlönd á opnum fjarfundi samstarfsráðherra

Birt

on

By

Sigurður Ingi Jóhannsson, samstarfsráðherra Norðurlanda, tók í dag þátt í pallborðsumræðum á norrænum fjarfundi um Covid-19 og Norðurlönd, sem var liður í formennsku Danmerkur, Færeyja og Grænlands í Norrænu ráðherranefndinni 2020.

Á fundinum var m.a. rætt um þau áhrif sem kreppan af völdum Covid-19 hefur haft á einstök ríki og á norrænt samstarf og álag á stjórnvöld einstakra ríkja, heilbrigðiskerfi, atvinnulíf og einstaklinga. Kaj Leo Holm Johannesen, samstarfsráðherra Færeyja, opnaði fundinn þar sem fram kom að með umræðum eins og þessum gætum við lært af hinni stormasömu tilveru árið 2020, séð hvar samstarfið hefur verið til góðs og safnað reynslu sem nýta má áfram í norrænu samstarfi. 

Sigurður Ingi Jóhannsson lagði áherslu á í sínu innleggi gott samstarf Norðurlandanna á tímum heimsfaraldsins og lagði áherslu á sameiginlega gildi, lýðræði, sjálfbærni og virðingu fyrir mannréttindum og mikilvægi þess að standa vörð um þau á tímum sem þessum. Þá tók hann undir þá hugmund að eftir að mótefni yrði aðgengileg að Norðurlöndin myndu draga úr þeim hindrunum sem upp hafa komið milli landanna á tímum Covid.

Meðal þeirra sem fluttu erindi á þessari ráðstefnu var dr. Hans Kluge, forstjóri WHO í Evrópu, Pál Weihe, prófessor í lýðheilsufræðum í Færeyjum, og Lasse Ilkka, sérfræðingur í finnska heilbrigðisráðuneytinu.

Lesa meira

Vinsælast

Allur réttur áskilin © 2020 Tíðin