Connect with us

Stjórnarráðið

Stafræn ökuskírteini komin á Ísland.is

Birt

þann

Frá og með deginum í dag er hægt að sækja um og fá stafræn ökuskírteini í símann. Hægt er að nálgast þau á upplýsingaveitunni Ísland.is með því að nota rafræn skilríki. Stafræna ökuskírteinið gengur hvort tveggja fyrir Android- og iOS-stýrikerfi og góðar leiðbeiningar fylgja með umsóknarferlinu. Stafræn ökuskírteini verða jafngild hefðbundnum ökuskírteinum á Íslandi en megintilgangurinn er að notendur geti sannað ökuréttindi sín gagnvart lögreglu.

Áslaug Arna Sigurbjörnsdóttir, dómsmálaráðherra, Bjarni Benediktsson, fjármála- og efnahagsráðherra, Sigurður Ingi Jóhannsson, samgöngu- og sveitarstjórnarráðherra og Sigríður Björk Guðjónsdóttir, ríkislögreglustjóri, opnuðu í dag formlega fyrir aðgang að nýju skírteinunum og urðu fyrst til þess að fá stafræn ökuskírteini í símann.

„Tilkoma stafrænna ökuskírteina var eitt af þeim málum sem ég hafði mikinn áhuga á að koma í gagnið strax og ég mætti í ráðuneytið. Það er því afar ánægjulegt að sjá það verða að veruleika.“ segir Áslaug Arna Sigurbjörnsdóttir, dómsmálaráðherra.

„Það er mikið framfaraskref að fá ökuskírteini í snjallsímann og veitir fólki augljós þægindi. Ísland er annað landið í Evrópu að taka í notkun stafræn ökuskírteini og fetum þar í fótspor Norðmanna. Þetta er stefna stjórnvalda að hið opinbera bjóði upp á stafrænar lausnir í auknum mæli,“ segir Sigurður Ingi Jóhannsson, samgöngu- og sveitarstjórnarráðherra.

„Stafræn ökuskírteini eru áþreifanlegt skref í þá átt að gera þjónustu hins opinbera stafræna og aðgengilega. Flestir eru með símann á sér öllum stundum, en margir þekkja það að plastið gleymist. Þetta er því liður í að einfalda líf fólks, en það er eitt markmiða okkar með öllum þeim breytingum sem við erum nú að gera á opinberri þjónustu gegnum Stafrænt Ísland, verkefnastofu fjármála- og efnahagsráðuneytisins,“ segir Bjarni Benediktsson, fjármála- og efnahagsráðherra.

Hvernig sæki ég stafrænt ökuskírteini?

  • Sótt er um stafræn ökuskírteini á vefnum Ísland.is þar sem notendur auðkenna sig með rafrænum skilríkjum. Með samþykki notenda fer sjálfvirkt umsóknarferli í gang og  samstundis birtist tengill til að sækja skírteinið í símann.
  • Notendum Android-síma er bent á að sækja veski (e. Wallets) í símann áður stafrænu ökuskírteini er hlaðið niður.
  • Þeir sem hafa ekki endurnýjað ökuskírteini sín frá því fyrir árið 1998 þurfa að endurnýja þau hjá sýslumanni til að geta fengið stafrænt ökuskírteini í símann.
  • Einungis er hægt að hafa ökuskírteinið í einu símtæki. Ef það er sett upp á öðrum síma afvirkjast það í fyrsta tækinu.
  • Ökuskírteinin gilda aðeins á Íslandi.

Farsælt samstarf

Verkefnastofan Stafrænt Ísland vann tæknilausn fyrir stafrænu ökuskírteinin í samstarfi við ríkislögreglustjóra og dómsmálaráðuneytið. Innleiðingin var samstarfsverkefni samgöngu- og sveitarstjórnarráðuneytis, sem ber ábyrgð á umferðarlöggjöf og reglum um ökuskírteini, og dómsmálaráðuneytis, sem fer með málefni ríkislögreglustjóra og sýslumanna. Ríkislögreglustjóri gefur út stafræn ökuskírteini en sýslumenn gefa út hefðbundin prentuð ökuskírteini í umboði ríkislögreglustjóra.

Ökuskírteini eru almennt viðurkennd gagnkvæmt milli EES ríkja en það gildir ekki um stafræn ökuskírteini, þar sem þau uppfylla ekki kröfur Evróputilskipunar um ökuskírteini. Þau verða aðeins gild á Íslandi fyrst um sinn.

Lesa meira

Innlent

Sálfræðiþjónusta við Seyðfirðinga efld með auknu fjármagni

Birt

þann

Eftir

Svandís Svavarsdóttir heilbrigðisráðherra hefur ákveðið að veita Heilbrigðisstofnun Austurlands 17 milljóna króna viðbótarfjárframlag til að efla geðheilbrigðisþjónustu í þágu íbúa Seyðisfjarðar í kjölfar hamfaranna sem þar urðu 18. desember síðastliðinn. Starfsfólk heilbrigðisstofnunarinnar hefur fundið fyrir verulega aukinni þörf fólks fyrir áfallameðferð og þjónustu geðteymis eftir atburðinn. Fagfólk telur mikilvægt að bregðast skjótt við með aukinni þjónustu til að fyrirbyggja að einstaklingar sem þurfa á stuðningi að halda þrói með sér alvarlega og langvinna áfallastreituröskun.

Lesa meira

Innlent

Skýrsla um fyrirkomulag úthlutana og ráðgjafar hjálparsamtaka

Birt

þann

Eftir

Félagsvísindastofnun Háskóla Íslands hefur skilað skýrslunni Úttekt á fyrirkomulagi úthlutana og ráðgjafar hjálparsamtaka- Hvaða hópar leita aðstoðar?, sem unnin var fyrir félagsmálaráðuneytið og Velferðarvaktina. Höfundar skýrslunnar eru Ásdís Aðalbjörg Arnalds, Guðný Gústafsdóttir og Steinunn Hrafnsdóttir. Úttektin fólst í því að aflað var gagna með spurningakönnun og viðtölum við hjálparsamtök, notendur og félagsráðgjafa og var meðal annars kannað hvers konar aðstoð hjálparsamtök á Íslandi veita,  kortlagt hvaða hópar leita til hjálparsamtaka eftir aðstoð ásamt því að kanna viðhorf til aðstoðarinnar og hvað megi bæta.

Stærsti hópurinn sem leitar aðstoðar er fólk sem framfleytir sér með fjárhagsaðstoð sveitarfélaga, atvinnuleysisbótum eða örorkubótum. Einnig leita ellilífeyrisþegar og láglaunafólk til samtakanna, þó minna sé um það.

Fólk almennt ánægt með hjálparsamtökin en ýmislegt má bæta

Hjálparsamtök bjóða margþætta aðstoð til fátæks fólks. Könnun meðal þeirra sem nýta sér aðstoðina leiddi í ljós að fólk er almennt ánægt með þjónustuna en þó er ýmislegt sem má bæta. Í ljós kom að stór hluti þeirra sem hafði sótt aðstoð hjá tveimur hjálparsamtökum hafði lent í því að bíða í biðröð utandyra. Þegar spurt var hvort fólk vildi heldur fá úthlutað mat eða inneignarkorti kom í ljós að inneignarkort hugnaðist flestum betur þar sem nærri tveir af hverjum þremur vildu heldur inneignarkort í matvöruverslanir en að fá úthlutað mat.

Bæta þarf úrræði ríkis og sveitarfélaga

Í úttektinni segir að almennt sé þörf á að útvíkka aðgerðir og bæta úrræði sem nýtast fátæku fólki. Sér í lagi þarf að mæta bráðum þörfum hópsins með sérstökum úrræðum á tímum heimsfaraldurs. Viðtölin við félagsráðgjafana veita innsýn í hvaða úrræði þeir telja þarfnist endurskoðunar. Nefndu þeir meðal annars  viðmið fyrir fjárhagsaðstoð og forsendur sérstaks húsnæðisstuðnings þannig að úrræðin mæti þörfum allra sem á þurfa að halda, þar með talið láglaunafólks. Þá telja þeir að endurmeta þurfi og útfæra úrræði fyrir fólk sem bíður örorkumats og styðja betur við fólk af erlendum uppruna. Loks var bent á mikilvægi þess að bjóða upp á varanleg úrræði fyrir fólk með fjölþættan vanda, t.d. fólk með geðröskun- og vímuefnavanda. Félagsvísindastofnun Háskóla Íslands hefur verið falið að afla gagna og skrifa skýrslu um hvert sé fyrirkomulag aðstoðar hjálparsamtaka annars staðar á Norðurlöndunum. Von er á að þeirri skýrslu verði skilað í mars nk.

Í skýrslunni má finna tölulegar upplýsingar og tilvitnanir sem varpa frekara ljósi á viðfangsefnið. 

Frekari upplýsingar um skýrsluna veitir Ásdís Aðalbjörg Arnalds, í netfangi, aa1 att hi.is

Lesa meira

Innlent

Upplýsingasíða vegna Seyðisfjarðar

Birt

þann

Eftir

Sett hefur verið upp sérstök upplýsingasíða á vefsvæðinu Ísland.is vegna hamfaranna sem urðu á Seyðisfirði í desember sl. Þar er að finna upplýsingar um verkefni á vegum stjórnvalda og ýmissa stofnana sem þegar eru í framkvæmd og eru fyrirhuguð vegna hamfaranna.

Upplýsingasíðan er á vegum starfshóps sem ríkisstjórnin skipaði til að fylgja eftir málum er varða aðkomu ríkisins að hreinsun á svæðinu og öðrum aðgerðum sem styðja við að koma samfélaginu í starfhæft horf á ný. Í starfshópnum eiga sæti fulltrúar sex ráðuneyta en auk þess starfa með hópnum Víði Reynisson, yfirlögregluþjónn hjá Almannavarnadeild embættis ríkislögreglustjóra og Gauti Jóhannesson, forseti sveitarstjórnar og tengiliður við sveitarfélagið Múlaþing.

Á upplýsingasíðunni er að finna svör við ýmsum spurningum vegna hamfaranna og verða svör uppfærð í samræmi við nýjustu upplýsingar. Þá munu svör við nýjum spurningum bætast við eftir því sem þurfa þykir.

Upplýsingasíða vegna hamfaranna á Seyðisfirði

Lesa meira

Vinsælast

Allur réttur áskilin © 2020 Tíðin