Kortið sýnir staðsetningu þeirra kvikuinnskota sem talin eru hafa orðið á árinu á Reykjanesskaga. Þetta eru bráðabirgðaniðurstöður og líkönin eru einfölduð, en verða uppfærð eftir því sem gögn berast. Á kortinu er tilgreint hvenær innskotin mynduðust. Innskotið á Reykjanesi er á 8-13 km dýpi en hin á um 3-4 km dýpi.


Staðsetningin er mun vestar en kvikuinnskotin
sem orðið hafa í nágrenni Þorbjarnar

2.4.2020

GPS mælingar ásamt nánari úrvinnslu og líkanreikningum á
fyrirliggjandi gögnum, gefa nú vísbendingar um nýtt kvikuinnskot vestast á
Reykjanesskaganum undir Rauðhólum og Sýrfelli. Þetta staðfesta gögn sem safnað hefur
verið í samstarfi Jarðvísindastofnunar Háskólans, ÍSORs, HS-orku og
Veðurstofunnar eftir að virknin við Þorbjörn hófst. „Gögnin sem við höfum unnið
úr gefa til kynna að kvikuinnskotið hafi átt sér stað frá því um miðjan febrúar
og fram í fyrstu vikuna í mars. Þessi mynd skýrðist betur þegar við fengum gögn
úr GPS mælingum Háskólans, sem ekki eru beintengdar okkar vöktunarkerfi og það
gerir það að verkum að við greinum þetta ekki fyrr en nú“, segir Kristín
Jónsdóttir hópstjóri náttúruvárvöktunar á Veðurstofu Íslands. Líkan staðsetur
kvikuinnskotið á um 8-13 km dýpi, sem er líklega við botn jarðskorpunnar á talsvert meira dýpi en kvikuinnskotin
tvö við Þorbjörn. „Þetta kvikuinnskot undir Sýrfelli er þriðja kvikuinnskotið sem
við greinum á Reykjanesskaganum frá því um áramótin. Tilvist þessa
kvikuinnskots styður
ályktun Vísindaráðs Almannavarna frá því um daginn
um að það sé nauðsynlegt
að skoða virknina á Reykjanesskaganum heildstætt, en ekki einungis út frá
staðbundinni virkni í kringum Svartsengi og Reykjanes“, segir Kristín. Hún
ítrekar að það sé of snemmt á þessu stigi að draga neinar sterkar ályktanir og bendir
á nauðsyn þess að skoða núverandi virkni í sögulegu samhengi við aðra þekkta
atburði á Reykjanesskaganum

Jarðvísindamenn munu halda áfram að fylgjast náið með gangi
mála og vinna frekar úr þeim gögnum sem safnast hafa.