Íþrótta og ólympíu samband Íslands

Arnar Ólafsson sæmdur Gullmerki ÍSÍ á ársþingi FSÍ

09.09.2021

Ársþing Fimleikasambands Íslands (FSÍ) fór fram laugardaginn 4. september sl. í Laugardalashöll. Þinghald var með breyttu sniði að þessu sinni vegna kórónuveirufaraldursins, en einungis einn fulltrúi mætti frá hverju félagi og fór þá með öll atkvæði viðkomandi félags. Ein nefnd var starfrækt á þinginu og var öðrum nefndarstörfum frestað til 27. nóvember, þegar framhaldsþing FSÍ mun fara fram.

Sigurbjörg Fjölnisdóttir var kjörin þingforseti en þingritarar voru Eir Andradóttir og Fanney Magnúsdóttir. Kjörbréfanefnd skipuðu Sigríður Harðardóttir (formaður), Dóra Sigurjónsdóttir og Olga Bjarnadóttir. Kjörbréf bárust frá 12 félögum og voru alls 104 atkvæði sem félögin fóru með. Þingstörf gengu vel fyrir sig.

Arnar Ólafsson, formaður FSÍ frá 2014, lét af störfum á þinginu. Fimleikasambandið hefur gengið í gengum miklar breytingar í hans tíð. Var honum og öðru fráfarandi stjórnarfólki þakkað fyrir vel unnin störf. Hafsteinn Pálsson, varaforseti ÍSÍ var fulltrúi ÍSÍ á þinginu. Hann afhenti Arnari, fráfarandi formanni FSÍ, Gullmerki ÍSÍ fyrir góð störf í þágu fimleikaíþróttarinnar á Íslandi.

Nýr formaður FSÍ var kjörinn Kristinn Arason. Með honum í stjórn eru Halldóra Sigríður Guðvarðardóttir, Magnús Heimir Jónasson, Marta Sigurjónsdóttir, Sigurbjörg Fjölnisdóttir og Þór Ólafsson. Í varastjórn sitja Guðbjörg Snorradóttir og Jarþrúður Hanna Jóhannsdóttir.

Á meðfylgjandi myndum er annars vegar Arnar Ólafsson fráfarandi formaður FSÍ og Hafsteinn Pálsson 2. varaforseti ÍSÍ við afhendingu heiðursviðurkenningarinnar og hins vegar Kristinn Arason, nýkjörinn formaður FSÍ í ræðustól.

Íþrótta og ólympíu samband Íslands

Afreksbúðir ÍSÍ þann 25. september

24.09.2021

Laugardaginn 25. september verður fyrsti fyrirlesturinn í Afreksbúðum ÍSÍ en sérsambönd ÍSÍ tilnefna íþróttafólk úr sínum röðum á aldrinum 15-18 ára í Afreksbúðir ÍSÍ.

Þátttakendur hafa kost á að mæta í Íþróttamiðstöðina í Laugardal til að fylgjast með fyrirlestrinum en einnig verður hægt að fylgjast með í gegnum Teams. Fleiri fyrirlestrar verða haldnir fyrir ungt og upprennandi íþróttafólk sérsambanda ÍSÍ á næstu mánuðum. 

Íþróttasálfræðingurinn Hreiðar Haraldsson hjá Haus hugarþjálfun verður með fyrsta fyrirlesturinn í lotunni. Fyrirlesturinn fjallar um kvíða fyrir keppnum sem er algengur meðal íþróttafólks og getur haft áhrif á líðan og frammistöðu þess. Mikilvægt er að íþróttafólk hafi verkfæri í sínum verkfærakassa til að takast á við kvíðann svo hann hafi sem minnst áhrif á líðan og frammistöðu. Hreiðar útskýrir á fyrirlestrinum hvað kvíði fyrir keppnum er og hvernig árangursríkast er að takast á við hann.

Áhugasamir geta séð fyrirlestrana frá því 2020-2021 hér á heimasíðu ÍSÍ en marga áhugaverða fyrirlestra er að finna þar sem geta nýst áhugasömu íþróttafólki.

Halda áfram að lesa

Íþrótta og ólympíu samband Íslands

Hreyfum okkur saman í Íþróttaviku Evrópu

23.09.2021

Íþróttavika Evrópu (The European Week of Sport) er haldin 23. – 30. september í yfir 30 Evrópulöndum. Íþrótta- og Ólympíusamband Íslands hefur líkt og undanfarin ár hlotið styrk frá Evrópusambandinu í gegnum Erasmus+ styrkjakerfið vegna Íþróttaviku Evrópu.

Markmiðið með Íþróttaviku Evrópu er að kynna íþróttir og almenna hreyfingu um alla Evrópu og sporna við auknu hreyfingarleysi meðal almennings. Íþróttavikan er ætluð öllum óháð aldri, bakgrunni eða líkamlegu ástandi. Sérstök áhersla er lögð á að höfða til grasrótarinnar og að hvetja Evrópubúa til að sameinast undir slagorðinu #BeActive og til þess að hreyfa sig oftar og meira í sínu daglega lífi.

Íþróttavika Evrópu er nú hafin með fullt af fjölbreyttum og skemmtilegum viðburðum um allt land. Íþrótta- og Ólympíusamband Íslands hvetur alla sem hafa áhuga á að kynna sér verkefnið nánar og allt það sem í er boði er með því að kíkjainná www.beactive.is eða á Facebook síðu verkefnisins undir BeActive Iceland. 

ÍSÍ hvetur almenning að skella sér á opna æfingu eða prófa eitthvað alveg nýtt og deila því svo með okkur á @BeActive.is.

Frekari upplýsingar gefur Hrönn Guðmundsdóttur sviðsstjóri Almenningsíþróttasviðs ÍSÍ á netfangið [email protected] eða í síma 514 4000. 

 

Halda áfram að lesa

Íþrótta og ólympíu samband Íslands

Auglýst eftir umsóknum um styrki

23.09.2021

Íþrótta- og Ólympíusamband Íslands (ÍSÍ) og Ungmennafélag Íslands (UMFÍ) auglýsa eftir umsóknum um styrki frá sérsamböndum, íþróttahéruðum og íþrótta- og ungmennafélögum landsins.

Um er að ræða styrk að upphæð 250.000 krónur til að standa fyrir verkefni sem hvetur börn og ungmenni af erlendum uppruna og fjölskyldur þeirra til þátttöku í skipulögðu íþróttastarfi. Fjórir styrkir eru í boði. Til þess að hljóta styrk þurfa félög að skila áætlun um hvernig þau hyggjast nýta fjármagnið.

Tímarammi verkefnisins er veturinn 2021 – 2022. Eftir að verkefnunum lýkur munu ÍSÍ og UMFÍ taka saman gögn styrkþega og deila reynslunni til annarra íþrótta- og ungmennafélaga. Með þekkingaröflun og miðlun upplýsinga gerum við gott starf enn betra. Þetta er í annað sinn sem ÍSÍ og UMFÍ útdeila styrkjum til aukinnar þátttöku barna og ungmenna af erlendum uppruna.

Umsóknarfrestur er til 22. október. Smelltu hér til þess að sækja um.

Vertu með bæklingar

ÍSÍ og UMFÍ minna á bæklinginn Vertu með sem kom út haustið 2018. Markhópur bæklingsins eru foreldrar barna og ungmenna af erlendum uppruna og markmiðið með útgáfu hans er að vekja athygli á mikilvægi þess að börn taki þátt í skipulögðu íþróttastarfi. Í bæklingnum eru hagnýtar upplýsingar um starfsemi íþrótta- og ungmennafélaga landsins.

  • Upplýsingar um æfingagjöld íþróttafélaga.
  • Frístundastyrki
  • Mikilvægi þátttöku foreldra og kosti þess að hreyfa sig í skipulögðu starfi.

Bæklingurinn er á níu tungumálum, þ.e. á íslensku, ensku, pólsku, taílensku, litháísku, filippseysku, arabísku, víetnömsku og spænsku (væntanlegur).

Smelltu hér til þess að skoða bæklinginn.

 

Halda áfram að lesa

Vinsælast

Allur réttur áskilin © 2021 Tíðin