Íþrótta og ólympíu samband Íslands

Birnir Freyr Hálfdánarsson með brons og nýtt unglingamet á EYOF í dag

27.07.2022

Þriðji keppnisdagur EYOF fór fram í dag þar sem Íslendingar kepptu í sundi, fimleikum og handknattleik. Í fimleikunum kepptu þær Arna Brá Birgisdóttir, Natalía Dóra S. Rúnarsdóttir og Ragnheiður Jenný Jóhannsdóttir í feykisterkum mótshluta. Keppt var í liðakeppni, í fjölþraut og um sæti í úrslitum á einstökum áhöldum og blönduðum úrslitum sem fara fram á morgun. Bestan árangur íslensku stúlknanna átti hún Arna Brá Birgisdóttir í fjölþraut en Ragnheiður Jenný þurfti að hætta keppni eftir tvö áhöld vegna meiðsla. Stelpurnar voru allar að keppa í fyrsta skiptið á upphækkuðum áhöldum (podium) og fara þær heim reynslunni ríkari.

Í sundinu byrjuðu þær Nadia Djurovic og Ylfa Lind Kristmannsdóttir. Nadia synti fyrst 200 metra skriðsund og kláraði í bakkann á 2:11.23 og endaði í 25. sæti með 638 FINA stig. Ylfa synti 100m flugsund næst og náði tímanum 1:06.92. Birnir Freyr Hálfdánarson keppti í átta manna úrslitum í 200 metra fjórsundi og hafnaði þar í þriðja sæti. Hann synti á 2:05.33 sem er bæting á unglingametinu sem hann setti í undanúrslitunum. Þetta er glæsilegur árangur hjá Birni en hann stingur sér til sunds aftur á morgun í 100 metra flugsundi.

Síðasti leikurinn í riðlinum í handknattleik fór fram í dag gegn Spánverjum. Barátta íslensku strákanna dugði ekki til í þetta sinn en Spánverjar höfðu betur í leiknum sem endaði með 9 marka mun, Spánverjum í vil 34:25 en staðan í hálfleik var 16:11.

Það verður mikið um að vera í Banská Bystrica á morgun en þá heldur keppni áfram í sundi, frjálsíþróttum, hjólreiðum og badminton og svo hefst einnig keppni hjá drengjunum okkar í judo.

Hér er hægt að nálgast myndir af mótinu.

Íþrótta og ólympíu samband Íslands

Evrópumeistarar unglinga í klassískri bekkpressu

11.08.2022

Á nýafstöðnu Evrópumóti í bekkpressu og klassískri bekkpressu kraftlyftinga í Búdapest var keppt í öllum aldursflokkum. Í unglingaflokki kepptu ríkjandi heimsmeistarar í sínum flokkum, þær Alexandrea Rán Guðnýjardóttir í -63 kg flokki og Matthildur Óskarsdóttir í +85 kg flokki. Þær gerðu sér lítið fyrir og lönduðu báðar Evrópumeistaratitlum í klassískri bekkpressu í sínum þyngdarflokkum. Alexandrea Rán jafnaði sitt Íslandsmet í greininni en Matthildur bætti Íslandsmetið og er það jafnframt Íslandsmet í opnum flokki.

Í stigakeppni kvenna þá varð Matthildur stigahæst allra og Alexandrea Rán varð í þriðja sæti.

Alexandrea Rán hlaut einnig silfurverðlaun í bekkpressu í búnaði. Hún lyfti jafnþungu og sigurvegarinn í færri tilraunum en keppinautur hennar hreppti gullið á líkamsþyngd.

Þess má geta að Íslendingar eignuðust Evrópumeistara í kraftlyftingum í -74kg flokki á Evrópumeistaramóti öldunga í júlímánuði, Sæmund Guðmundsson, sem fæddur er 1952. Það má því segja að íslenskt kraftlyftingafólk á öllum aldri sé að gera það gott um þessar mundir.

Mynd/KRAFT

Halda áfram að lesa

Íþrótta og ólympíu samband Íslands

Framkvæmdanefnd um uppbyggingu þjóðarhallar í innanhússíþróttum hefur störf

10.08.2022

 

Í dag kom framkvæmdanefnd um uppbyggingu þjóðarhallar í innanhússíþróttum saman í fyrsta skipti en nefndin hóf formlega störf í dag. Fundur nefndarinnar var haldinn i fundarsal framkvæmdastjórnar ÍSÍ í Íþróttamiðstöðinni í Laugardal. Fyrir fundinn funduðu mennta- og barnamálaráðherra og borgarstjóri með nefndinni, fulltrúum úr starfshópi um uppbyggingu þjóðarleikvanga í íþróttum og fleiri aðilum og var meðfylgjandi mynd tekin við það tækifæri.
Hlutverk nefndarinnar er að leiða vinnu vegna hönnunar, útboðs og hvernig staðið verður að fjármögun þjóðarhallar sem og að undirbúa ákvörðun um útfærslu og rekstrarform. Nefndinni er falið að útbúa tímasetta framkvæmdaáætlun um uppbyggingu hallarinnar. Stefnt er að því að framkvæmdum verði lokið árið 2025.

Í sameiginlegri fréttatilkynningu mennta- og barnamálaráðuneytis og Reykjavíkurborgar er vísað í ráðherra og borgarstjóra:

Ásmundur Einar Daðason, mennta- og barnamálaráðherra: „Með stofnun framkvæmdanefndar færumst við skrefi nær því að hefja framkvæmdir á nýrri þjóðarhöll. Ég tel að við séum með öflugan hóp fagfólks sem eigi eftir að skila góðu verki.”

Dagur B. Eggertsson, borgarstjóri: „Það er mjög mikilvægt að koma undirbúningi þjóðarhallar af stað. Henni er ekki bara ætlað að stórbæta umgjörð landsliða og leikja og vera fjölnota hús fyrir þjóðina. Megintilgangurinn með aðkomu borgarinnar að verkefninu er að auka og stórbæta aðstöðu til æfinga og keppni fyrir börn og unglinga í Laugardal. Þróttur og Ármann og skólarnir í hverfinu verða eftir þetta með fyrsta flokks aðstöðu.“

Ríki og Reykjavíkurborg undirrituðu sameiginlega yfirlýsingu um uppbyggingu þjóðarhallar í innanhússíþróttum í Laugardal hinn 6. maí sl. Framkvæmdanefndin skilar reglulega upplýsingum um framgang verkefnisins til starfshóps um uppbyggingu þjóðarleikvanga í íþróttum. Hún starfar í samráði við ráðgjafaráð skipað hagsmunaaðilum og öðrum notendum hallarinnar til að hún uppfylli þarfir sem flestra.

Framkvæmdanefnd um þjóðarhöll í innanhússíþróttum skipa: Gunnar Einarsson formaður, Jón Viðar Guðjónsson fulltrúi ríkisins, Þórey Edda Elísdóttir fulltrúi ríkisins, Ólöf Örvarsdóttir fulltrúi Reykjavíkurborgar og Ómar Einarsson fulltrúi Reykjavíkurborgar.
Ráðinn verður starfsmaður sem vinnur með framkvæmdanefnd.

Myndirnar sem fylgja fréttinni eru fengnar af vefsíðu ráðuneytisins.

Halda áfram að lesa

Íþrótta og ólympíu samband Íslands

Vel heppnað þjálfaranámskeið í bogfimi í samstarfi við Ólympíusamhjálpina

10.08.2022

 

Þjálfaranámskeið á stigi eitt hjá World Archery (WA -Alþjóðabogfimisambandið) var haldið af Bogfimisambandi Íslands (BFSÍ) í Bogfimisetrinu dagana 2.-7. ágúst. Þjálfari á námskeiðinu var Grikkinn Christos Karmoiris sem valinn var af WA og var hann einnig prófdómari ásamt Guðmundi Erni Guðjónssyni, íþróttastjóra BFSÍ.

Aðildarfélög BFSÍ voru hvött til að velja þátttakendur á námskeiðið sem eru nú þegar virkir í starfi innan félaganna, til þess að þekkingin skili sér sem best til iðkenda í íþróttinni. Þetta skilaði sterkum og áhugasömum þátttakendum sem allir stóðust kröfur námskeiðsins með sóma. Alls sátu 11 þátttakendur námskeiðið, á aldrinum 14 ára til rúmlega sextugs. 

Christos Karmoiris var mjög ánægður með aðstöðuna í Bogfimisetrinu og það grasrótarstarf sem þar er unnið og taldi það einsdæmi á heimsvísu. Hann bað um leyfi til að nota Ísland sem gott fordæmi og sniðmát fyrir Grikkland og aðrar þjóðir í grasrótarstarfi þar sem hann vinnur að uppbyggingu og þróun. 

Námskeiðið var styrkt af Ólympíusamhjálpinni með aðstoð ÍSÍ.

Halda áfram að lesa

Vinsælast

Allur réttur áskilin © Tíðin