Samherji

Enginn í áhöfn Vilhelms Þorsteinssonar í land. Loðnan orðin hæf til manneldis.

Vilhelm Þorsteinsson við bryggju í Neskaupstað/mynd:Hákon Ernuson

Vilhelm Þorsteinsson við bryggju í Neskaupstað/mynd:Hákon Ernuson

Vilhelm Þorsteinsson EA landaði í gær 2.060 tonnum í Neskaupstað og fer hluti aflans til manneldis í fiskiðjuveri Síldarvinnslunnar. Þetta var annar loðnutúr Vilhelms á árinu, skipið hélt aftur á loðnumiðin í morgun.

Til þessa hefur öll loðna sem borist hefur til Síldarvinnslunnar á vertíðinni farið til framleiðslu á mjöli og lýsi en eftir því sem loðnan stækkar er hægt að frysta loðnuna til manneldis. Birkir Hreinsson skipstjóri segir að bræla á miðunum hafi gert flotanum erfitt fyrir síðustu sólarhringana.

Loðnan að stækka

„Veiðin hefur verið skást á morgnana og seinni partinn. Stærsta holið í þessum öðrum túr ársins var um 450 tonn, annars voru þau um og yfir 100 tonn. Þannig að þetta var nudd á okkur. Loðnan er hins vegar að stækka, sem þýðir að hægt er að vinna hana til manneldis og hluti aflans var frystur.“

Skipið sóttkví, enginn í land

Um tíu klukkustunda sigling er á miðin og fór Vilhelm af stað aftur á miðin, strax og búið var að dæla aflanum í land til vinnslu.

„Enginn í áhöfninni fór í land, skipið er í raun og veru sóttkví. Löndunargengið þurfti að athafna sig á framdekkinu, annars kom enginn um borð. Við förum eins varlega og hægt er á tímum Covid-19. Þetta er náttúrulega erfið og snúin staða en það er ekkert annað í boði,“ segir Birkir Hreinsson.

Samherji

Tölvur gegna lykilhlutverki í eftirlitinu

Sigmar Harðarson Völkumaður á Dalvík/myndir samherji.is

Sigmar Harðarson Völkumaður á Dalvík/myndir samherji.is

Segja má að hátæknibúnaðurinn frá Völku sé hjartað í fiskvinnsluhúsi Samherja á Dalvík. Búnaðurinn og öll tæknin hafa vakið mikla athygli, enda um að ræða eitt fullkomnasta vinnsluhús í heiminum í bolfiskvinnslu. Sigmar Harðarson fylgist grannt með öllum búnaðinum frá Völku og sér til þess að hann þjóni sínu hlutverki í hvívetna. Tölvur gegna lykilhlutverki í því sambandi.

Mikil nákvæmni

„Vinnsla hefst klukkan átta á morgnana, þannig að ég er mættur tveimur klukkustundum áður til þess að tryggja að vélar og allur búnaður gangi eins og til er ætlast. Stundum þarf að skipta um slöngur eða þétta svo eitthvað sé nefnt. Búnaðurinn er afskaplega nákvæmur og þess vegna þarf að fylgjast náið með öllum stillingum, enda eins gott þar sem mikil verðmæti fara í gegnum vélarnar á hverjum degi. Það getur verið ansi dýrkeypt ef til dæmis vatnsskurðarvélarnar eru ekki nákvæmlega rétt stilltar eða róbótarnir á pökkunarlínunni grípa ekki kassana eins og til er ætlast.“

Góður undirbúningur

Heimsfaraldurinn hafði eðlilega umtalsverð áhrif á starfsemi hátækni fiskvinnsluhúss Samherja á Dalvík. Með nýjum búnaði og gerbreyttri tækni komu engir utanaðkomandi sérfræðingar inn í húsið mánuðum saman, meðal annars frá Völku. Sigmar segir að áskoranirnar hafi því verið ansi margar, góður og hnitmiðaður undirbúningur við byggingu hússins hafi skipt sköpum. Hann hefur unnið í fiskvinnslu í um áratug.

„Ég hafði starfað við hátæknibúnað á Fáskrúðsfirði og áður en ég futti hingað til Dalvíkur fékk ég góða þjálfun í fiskvinnsluhúsi ÚA á Akureyri, þar er líka vélbúnaður frá Völku. Ég kom hingað sem sagt þokkalega vel undirbúinn, sem var eins gott. Þetta hefur allt saman gengið vonum framar með samstilltu átaki allra.“

Ekki oft þurft að stöðva vinnsluna

„Á daginn fer mikill tími í að fylgjast með öllu saman í gegnum tölvur, sem gegna lykilhlutverki í eftirlitinu. Stundum þurfum við að hægja á búnaðinum eða auka hraðann, stærð fisksins ræður því hverju sinni. Helsta ógnin er líklega rafmagns- eða vatnsskortur en sem betur fer eru þau mál komin í ágætis horf og ekki hefur oft þurft að stöðva vélarnar vegna bilana.“

Dalvík stærsta framfaraskrefið

„Já, þetta er fjölbreytt starf, enda ég daglega í samskiptum við ansi marga. Framfarirnar í fiskvinnslu hafa verið örar á þessum átatug sem ég hef unnið í greininni og allur þessi búnaður í vinnsluhúsinu á Dalvík er örugglega stærsta skrefið sem stigið hefur verið í þeim efnum. Þetta er klárlega fullkomnasta fiskvinnsluhús heimsins í bolfiski,“ segir Sigmar Harðarson Völkumaður.

Halda áfram að lesa

Samherji

Aflaverðmæti skipa Samherja og ÚA 11,7 milljarðar

Systurskipin Björg, Kaldbakur og Björgúlfur / myndir samherji.is

Systurskipin Björg, Kaldbakur og Björgúlfur / myndir samherji.is

Bolfiskskip Samherja og ÚA veiddu samtals 34,3 þúsund tonn á nýliðnu ári og afli uppsjávarskipsins Vilhelms Þorsteinssonar var 42,5 þúsund tonn. Verðmæti afla bolfiskskipanna var 9,3 milljarðar króna og Vilhelms Þorsteinssonar 2,4 milljarðar. Heildarverðmæti afla skipa félaganna var því samtals 11,7 milljarðar króna. Framkvæmdastjóri útgerðarsviðs Samherja segir að veiðarnar hafi heilt yfir gengið vel, enda valinn maður í hverju rúmi og skipaflotinn góður og vel búinn. 

Afli og verðmæti eftir skipum

Byrjum á bolfiskskipunum, afli Björgúlfs EA var 7.536 tonn og aflaverðmætið 2,1 milljarður króna.

Afli Kaldbaks EA var á árinu 7.264 tonn og verðmætið tæpir tveir milljarðar króna.

Afli Björgvins EA var á nýliðnu ári 6.461 tonn og verðmætið 1,7 milljarðar króna.

Afli Harðbaks EA var 5.890 tonn og verðmætið 1,5 milljarðar króna.

Afli Bjargar EA var 6.186 tonn og verðmætið 1,7 milljarðar króna.

Tvö önnur skip, Oddeyrin og Bergur veiddu samtals 1.010 tonn og var verðmætið samtals 349 milljónir króna.

Eins og fyrr segir var afli uppsjávarskipsins Vilhelms Þorsteinssonar EA 42.500 tonn og verðmætið 2,4 milljarðar. Vilhelm kom nýr til landsins á síðasta ári og hóf veiðar í lok apríl.

Þorskurinn vegur þungt

Langmest var veitt af þorski, þegar litið er á einstaka tegundir. Alls voru veidd 22,2 þúsund tonn af þorski á árinu. Þar á eftir kemur gullkarfi, 3,8 þúsund tonn. Í þriðja sæti er svo ýsa 3,3 þúsund tonn og þar á eftir ufsi, 3,2 þúsund tonn.

Valinn maður í hverju rúmi

„Við þurftum á ýmsan hátt að hafa meira fyrir veiðunum á síðasta ári vegna óveðurs, sérstaklega í haust og vetur. Heilt yfir gengu veiðarnar þó vel, enda valinn maður í hverju rúmi og skipaflotinn góður og vel búinn. Þegar verið er að gera upp aflatölur er ekki síður mikilvægt að líta á verðmætið. Markmiðið er alltaf að framleiða gæðaafurðir, meðferð aflans er einmitt stór þáttur í þeirri viðleitni og sjómenn eru vel með á nótunum í þeim efnum,“ segir Kristján Vilhelmsson framkvæmdastjóri útgerðarsviðs Samherja.

Halda áfram að lesa

Samherji

Kveður eftir 40 ára starf hjá ÚA „Þetta er góður vinnustaður“

Sigríður Jóna Gísladóttir / mynd samherji.is

Sigríður Jóna Gísladóttir / mynd samherji.is

Sigríður Jóna Gísladóttir lét af störfum hjá ÚA um áramótin eftir fjörutíu ára starf. Hún segir að gríðarlegar breytingar hafi orðið á þessum fjórum áratugum, sérstaklega tæknilegar. „Jú, auðvitað er svolítið skrýtið að vakna á morgnana og þurfa ekki að mæta í vinnuna,“ segir Sigríður Jóna.

„Ég flutti til Akureyrar frá Grindavík fyrir 43 árum og hafði unnið þar í fiski, þannig að mér þótti nærtækast að sækja um vinnu hjá ÚA. Gunnar Lórentsson réði mig svo að segja á staðnum og hérna hef ég sem sagt verið allan þennan tíma, fyrir utan um þrjú ár. Eins og lög gera ráð fyrir lætur fólk af störfum við ákveðinn aldur og mér þótti áramótin tilvalinn tími til að stimpla mig út og skila starfsmannakortinu.“

Alltaf í eftirlitinu

„Ég var í eftirlitinu svo að segja allan tímann, auk kennslu. Eftirlitið felst í því að fylgjast með gæðum afurðanna áður en þær fara til útflutnings. Þegar ég byrjaði var vinnslan ekki eins tæknivædd og hún er í dag, breytingin er í raun og veru ótrúleg á þessum árum. Í dag sér fullkominn vélbúnaður um að skila gæðaafurðum til kaupenda en þegar ég byrjaði hérna voru vélarnar ekki upp á marga fiska.“

Góð samskipti

Sigríður Jóna hefur verið trúnaðarmaður starfsfólks í Einingu-Iðju í um tvo áratugi. Meginhlutverk trúnaðarmanna er að gæta þess að lög og samningar séu haldnir á vinnustaðnum og vera tengiliður starfsmanna við stéttarfélagið.

„Jú, auðvitað getur þetta hlutverk verið strembið á köflum en mér var trúað fyrir þessu í allan þennan tíma, þannig að eitthvað hlýt ég að hafa gert rétt. Samskiptin við fyrirtækið hafa almennt verið góð þótt auðvitað hafi blásið á móti stöku sinnum á öllum þessum árum. En heilt yfir er ÚA afskaplega góður vinnustaður, enda margir sem hafa starfað hjá fyrirtækinu svo að segja alla starfsæfina. Launin eru þokkalega góð og aðbúnaðurinn til fyrirmyndar.“

Skrýtið að vakna á morgnana og þurfa ekki í vinnuna

Að loknum síðasta vinnudegi var Sigríður Jóna kvödd og henni færður veglegur blómvöndur. „Ég ákvað að setja punktinn um áramótin og ég neita því ekki að morgnarnir í byrjun ársins eru svolítið skrýtnir. Að vakna og þurfa ekki að drífa sig í vinnuna er skrýtið en ég er afskaplega sátt og glöð á þessum tímamótum. Ég hef auðvitað kynnst mörgum á þessum fjórum áratugum og vinasambönd hafa skapast sem breytast ekkert þótt ég hafi kvatt vinnustaðinn.“

Halda áfram að lesa

Vinsælast

Allur réttur áskilin © 2021 Tíðin