Samherji

„Enginn vill lenda í því að taka á móti þyrlunni vegna slyss um borð“

Einar Kristinn og Jóhann Pálsson Rist bátsmaður fara yfir öryggismálin/myndir/Björn Steinbekk/samher…

Einar Kristinn og Jóhann Pálsson Rist bátsmaður fara yfir öryggismálin/myndir/Björn Steinbekk/samherji.is

Einar Kristinn Kristgeirsson annar stýrimaður á Björgu EA 7, togara Samherja, hefur umsjón með öryggismálum um borð í umboði skipstjórans. Hann segir að skipverjarnir séu mjög áhugasamir og tali mikið um öryggismál og æfingar séu haldnar reglulega.

Fjárhagslegur stuðningur frá Samherja vegna náms

„Ég útskrifaðist með skipstjórnarréttindi frá Stýrimannaskólanum 2019 og hef verið á Björgu svo að segja frá því skipið kom til landsins. Reyndar hef ég stundað sjómennsku alla mína starfsævi. Samherji studdi mig fjárhagslega til náms í Stýrimannaskólanum, sem gerði mér í raun og veru kleift að afla mér þessarar menntunar, full skipstjórnarréttindi,“ segir Einar Kristinn.

Æfingar nokkrum sinnum í mánuði

Annar stýrimaður og bátsmaður sjá í sameiningu um að öryggismálin um borð séu í góðu lagi.

„Aðalatriðið er að allir skipverjar séu klárir á sínum málum og hlutverkum, komi upp neyðartilvik. Æfingar eru haldnar nokkrum sinnum í mánuði og oftar en ekki setjum við upp aukaæfingar ef okkur sýnist ástæða til. Allir eru annars mjög svo meðvitaðir um öryggismálin og eru á varðbergi gagnvart öllum þáttum. Þegar nýr skipverji bætist við, förum við með skipulögðum hætti yfir öll öryggismál með viðkomandi. Maður er í raun og veru alltaf með hugann við öryggismál, sérstaklega þegar við erum að störfum,“ segir Einar Kristinn.

Ör þróun í öryggismálum

Einar Kristinn segir að viðhorf sjómanna til öryggismála hafa tekið miklum breytingum á undanförnum árum. Þróunin sé ör, til dæmis séu allar upplýsingar um öryggismálin að færast yfir í rafrænt form. Það sé mikill munur, enda úreldast prentaðar upplýsingar nokkuð fljótt.

Alltaf á tánum

„Slysavarnarskóli sjómanna er mjög mikilvægur í þessum efnum og svo auðvitað viðhorf sjómanna og útgerðanna. Hjá Samherja er til dæmis starfandi sérstakur öryggisfulltrúi sem hefur það hlutverk að styðja við bakið á okkur og þróa alla ferla í þessum efnum. Ekkert banaslys hefur orðið á íslenskum skipum vegna slysa á síðustu árum og sú staðreynd segir okkur auðvitað heilmikið. Björg er mjög vel útbúið skip varðandi öryggismál og meira að segja er gengið lengra en staðlar segja til um á sumum sviðum. Þannig er það reyndar á öllum skipum Samherja. Það vill enginn taka á móti þyrlu Landhelgisgæslunnar vegna slyss um borð. Það er bara þannig og þess vegna erum við alltaf á tánum,“ segir Einar Kristinn Kristgeirsson annar stýrimaður á Björgu EA.

Samherji

Anna EA 305 seld til Kanada

Anna EA á Akureyri í morgun/myndir samherji.is

Anna EA á Akureyri í morgun/myndir samherji.is

Útgerðarfélag Akureyringa hefur selt línuskipið Önnu EA 305 til kanadíska fyrirtækisins Arctic Fishery Alliance.

Skipið var smíðað í Noregi 2001 og endurnýjað 2008. Lengdin er 52 metrar og breiddin 11 metrar.

Kristján Vilhelmsson útgerðarstjóri Samherja segir að nokkrar útgerðir hafi sýnt áhuga á að kaupa skipið eftir að það var sett á söluská.

„Anna er mjög gott línuveiðiskip, sérstaðan er meðal annars sú að línan er dregin í gegnum brunn sem er á miðju skipsins. Helsta ástæða sölunnar er að útgerðin borgaði sig ekki fjárhagslega og þess vegna þótti okkur rökrétt að selja. Anna hefur ekki stundað veiðar í nokkurn tíma og skipverjar eru komnir yfir á önnur skip Útgerðarfélags Akureyringa eða Samherja,“ segir Kristján Vilhelmsson.

Halda áfram að lesa

Samherji

Pottar með hreinu og köldu Atlantshafi ryðja sér til rúms

Magnús Sævarsson kokkur á Björgu EA 7 í ísköldum pottinum / myndir samherji.is/björn Steinbekk

Magnús Sævarsson kokkur á Björgu EA 7 í ísköldum pottinum / myndir samherji.is/björn Steinbekk

Störfin til sjós eru á köflum erfið og mikilvægt að áhöfnin hugi að líkamlegri heilsu. Því skiptir miklu máli að aðbúnaður um borð sé sem bestur.

Í flestum stærri togurum er líkamsræktaraðstaða og gufubað, sem áhafnirnar nýta sér óspart. Nýjasta nýtt í þessum efnum eru ískaldir pottar, einn slíkur er einmitt um borð í Björgu EA 7, ísfisktogara Samherja. Pottinum hefur verið haganlega komið fyrir í stefninu á trolldekkinu og segir Magnús Sævarsson kokkur að notkunin hafi aukist jafnt og þétt, enda allra meina bót að fara í ískalt sjóbað. Sömuleiðis er pottur um borð í Harðbak EA 3, sem hannaður er fyrir bæði kaldan sjó og heitt vatn.

Helmingur áhafnarinnar fer reglulega í pottinn

“Við vorum lengi með venjulegt kar en í fyrra fengum við sérsmíðaðan pott og í kjölfarið hefur notkunin aukist jafnt og þétt. Tandurhreinn sjór úr Atlantshafinu er einfaldlega settur í pottinn og til þess að kæla sjóinn er ískrapa úr vinnslukerfinu dælt í hann, sérstaklega yfir sumartímann. Mér er sagt að sjóböð bæti ónæmiskerfi líkamans, þannig að hann geti unnið betur á ýmsum kvillum, svo sem slitgigt og bólgum. Ég giska á að rúmlega helmingur áhafnarinnar fari í pottinn reglulega enda er þetta afskaplega hollt og gott, um það eru allir sammála sem ánetjast pottinum,” segir Magnús Sævarsson kokkur á Björgu.

Ávanabindandi

Sjálfur segist Magnús gjarnan fara snemma á morgnana í pottinn, venjulega eftir að hafa afgreitt morgunkaffið.

“Þegar menn eru lengi í aðgerð er fátt betra en að skella sér í ískaldan pottinn og kannski í gufu eða líkamsræktina á eftir. Við getum kallað þetta frost og funa, fara í íspottinn og síðan í vel heitt gufubaðið. Svona pottur er líka um borði í Kaldbaki EA og ég er nokkuð viss um að pottum fjölgi í flotanum í framtíðinni. Ég finn jákvæðan mun á mér eftir að hafa legið í pottinum í þrjár til fimm mínútur, þetta er hreinlega ávanabindandi.”

Heitt og kalt í Harðbak EA

Um borði Harðbak EA er sömuleiðis pottur, sem ýmist er fylltur með heitu vatni eða köldu og hreinu Atlantshafinu. Guðmundur I. Guðmundsson skipstjóri segir að potturinn sé ágætlega nýttur.

„Strákarnir fara venjulega í pottinn í upphafi frívaktar og flestum þykir gott að dýfa sér ofan í hreint og kalt Atlantshafið. Potturinn hjá okkur er einangraður, þannig að hann hentar undir bæði kalt og heitt vatn sem er ákveðinn kostur. Fyrir nokkrum árum síðan datt sjálfsagt engum í hug þægindi á borð við slíka potta, ég er ekki frá því að svona pottar verði taldir sjálfsagðir eftir nokkur ár. Maður les ekki annað út úr orðum sérfræðinga en að þetta geri fólki gott, ég tala nú ekki um sjómenn sem stunda líkamlega erfiða vinnu,“ segir Guðmundur skipstjóri á Harðbak.

Íspottum fjölgi í framtíðinni

“ Nýjustu skipin í flotanum eru hönnuð með það í huga að búa sem best að áhöfn og gera lífið sem þægilegast eftir því sem slíkt er hægt. Eftir nokkur ár verða svona pottar staðalbúnaður,“ segja þeir Magnús Sævarsson og Guðmundur I. Guðmundsson.

Halda áfram að lesa

Samherji

„Sjómennskan snýst um liðsheild“

Jóhann Pálsson Rist bátsmaður á Björgu EA 7/myndir: samherji/Björn Steinbekk

Jóhann Pálsson Rist bátsmaður á Björgu EA 7/myndir: samherji/Björn Steinbekk

Jóhann Pálsson Rist bátsmaður á Björgu EA 7 hefur verið sjómaður í rúmlega fjóra áratugi, þar af á nokkrum skipum Samherja í þrjá áratugi. Hann segir að sjómennskan hafi breyst mikið á þessum árum. Sjómennskunni fylgi óhjákvæmilega að vera stundum fjarri fjölskyldu og vinum á gleði- eða sorgarstundum.

Til ellefu þjóðlanda á þremur mánuðum

„Fyrsta plássið mitt var á gömlu Eddunni sem var í millilandasiglingum, aðallega með saltfisk og fiskimjöl. Ég hafði aldrei komið til útlanda en á stuttum tíma náði ég að koma til ellefu landa, sem var auðvitað töluvert ævintýri fyrir ungan strák, þar sem yfirleitt tók nokkra daga að landa í hverri höfn. Þarna kynntist ég sem sagt sjómennskunni, sem varð mitt ævistarf. Ég var aðeins í rúma þrjá mánuði í millilandasiglingunum, munstraði mig þá á Óla Magg EA, sem gerður var út frá Akureyri og var þar í nokkur ár. Síðan lá leiðin þvert yfir landið til Vestmannaeyja þar sem ég var í fjögur örlagarík ár, því þar kynntist ég ungri konu, Brynhildi Margréti Pétursdóttur, sem varð lífsförunautur minn.“

Þrjá áratugi hjá Samherja

„Ég hef verið á Björgu EA 7 frá því skipið kom nýtt til landsins fyrir um fimm árum síðan. Reyndar eru áratugirnir sem ég hef verið á skipum Samherja þrír talsins og ég sé ekki annað fyrir mér en að ljúka ævistarfinu hjá þessu ágæta fyrirtæki, enda samstarfið farsælt í alla staði. Þegar maður lítur til baka hafa orðið gríðarlegar breytingar á sjómennskunni.“

Sami kjarninn

„Við erum nokkrir sem höfum verið hérna frá upphafi en flestir í áhöfninni voru áður á Oddeyrinni EA sem var seld á sínum tíma. Þetta er góður kjarni og við þekkjumst nokkuð vel. Sjómennska er í grunninn hópvinna, þar sem hver og einn þarf að vera klár á sínu hlutverki. Annars eru menn nokkuð fljótir að kynnast, enda nándin óhjákvæmilega ansi mikil á sjónum. Björg er gott skip í alla staði, vel hugsað fyrir öllum þáttum.“

Fjarveran erfið á gleði- og sorgarstundum

Brynhildur Margrét og Jóhann eiga þrjú börn og hann var á sjónum er tvö þeirra komu í heiminn.

„Já, en þetta hefur breyst á undanförnum árum, skilningurinn er víðtækari varðandi frí og svo hefur orðið bylting í fjarskiptamálum. Ég var til dæmis á sjónum þegar fyrsta barnið okkar fæddist. Reyndar ætlaði ég að fara í frí en þar sem síldartúrarnir voru yfirleitt í tvo sólarhringa töldum við óhætt að fara í einn túr til viðbótar, ekki væri von á barninu á þeim tíma. Túrinn varð hins vegar ein vika, aðallega vegna brælu. Skipstjórinn kallaði á mig upp í brú, þar sem tengdapabbi sagði mér frá því að stúlkubarn væri fætt, þá var NMT síminn kominn til sögunnar. Síðan var ég líka á sjónum þegar annar sonur okkar fæddist og auðvitað var það erfitt á vissan hátt. Þetta er einfaldlega fylgifiskur sjómennskunnar, vera fjarri fjölskyldu og vinum á gleðistundum og sömuleiðis sorgarstundum.“

Samviskusemi einkennir góðan sjómann

Jóhann hefur eðli málsins samkvæmt unnið með fjölda sjómanna í gegnum tíðina. Hann er því ekki í vafa um hvað einkenni góðan sjómann.

„Áður fyrr var sagt að sá sem gargaði mest og hæst væri besti sjómaðurinn en það er nú sem betur fer liðin tíð og líklega var þetta meira sagt í gamni en alvöru. Góður sjómaður er samviskusamur og leysir sín hlutverk vel af hendi, enda snýst sjómennskan um liðsheild. Öryggismálin hafa tekið miklum breytingum til hins betra á undanförnum árum, góður sjómaður hugsar mjög um öryggismál og er umhugað um að öll áhöfnin sé meðvituð um mikilvægi þess að allir þættir öryggismála séu í fullkomnu lagi.“

Ferskleikinn í fyrirrúmi

„Kvótakerfið breytti miklu, áður fyrr voru túrarnir á ísfisktogurunum hálfur mánuður til þrjár vikur en núna er algengt að landað sé eftir fimm til sjö sólarhringa. Meðferðin á aflanum er allt önnur og ferskleikinn er í fyrirrúmi. Núna er til dæmis langt liðið á kvótaárið og við þurfum að forðast þorskinn eins og kostur er þar sem veiðiheimildir eru takmarkaðar. Við höfum verið að eltast við ufsa undanfarnar vikur og gengið prýðilega. Veiðarnar snúast líka mikið um jafnt flæði til fiskvinnsluhúsanna. Staðan á mörkuðum, sem sagt eftirspurnin er líka stór liður í þessu öllu saman. Það er himinn og haf á milli veiða þegar ég var að byrja og svo í dag.“

Sjómannadagurinn er dagur fjölskyldunnar

Allur flotinn er í landi á sjómannadaginn. Jóhann segir að áhöfnin geri sér glaðan dag á frídegi sjómanna.

„Áhöfnin fer saman út að borða og sjálfsagt gerum við líka eitthvað annað skemmtilegt í tilefni dagsins. Annars er þetta fyrst og fremst dagur fjölskyldunnar. Sjómannadagurinn minnir líka þjóðina alla á mikilvægi sjávarútvegsins og ég neita því ekki að maður er alltaf svolítið stoltari á þessum degi,“ segir Jóhann Pálsson Rist bátsmaður á Björgu EA 7.

Halda áfram að lesa

Vinsælast

Allur réttur áskilin © Tíðin