Samherji

Fersk afurð tilbúin til afhendingar innan við klukkustund frá löndun

Fersk afurð tilbúin til afhendingar innan við klukkustund frá löndun

Í nýju kynningarmyndbandi fyrir vinnslu á ferskum fiski í hátæknivinnsluhúsi Samherja á Dalvík er farið ítarlega yfir allt vinnsluferlið frá því að fisknum er landað beint úr skipum Samherja í vinnsluhúsið og þangað til ferskum afurðum er pakkað eftir kröfum viðskiptavina og þær tilbúnar til afhendingar.

Í vinnsluhúsinu er megináhersla lögð á vinnslu þorsks og ýsu og er vinnslan mjög sérhæfð þar sem allar afurðir eru ferskar eða lausfrystar. Framleiddir eru ferskir, sérskornir bitar af ýmsum stærðum og gerðum, eftir þörfum kaupenda hverju sinni.

Í myndbandinu, sem fjallar eingöngu um vinnslu á ferskum fiski, kemur fram að notkun róbótatækni í húsinu tryggi stöðugt flæði í gegnum allt framleiðsluferlið. Þá er þar hægt að sjá skurð á ferskum bolfiski með nýrri tækni Völku en með henni næst mjög mikill sveigjanleiki og nákvæmni í bitaskurði. Þessi tækni gerir Samherja kleift að mæta ýtrustu kröfum viðskiptavina sinna.

Nýjar tæknilausnir og aukin sjálfvirkni í vinnsluhúsinu á Dalvík styttir tímann við framleiðsluferlið og geta ferskar afurðir verið tilbúnar til afhendingar innan við 60 mínútum frá því að fiskinum var landað.

Í vinnsluhúsinu, sem var tekið í notkun hinn 14. ágúst í á síðasta ári, eru vinnslulínur frá Völku, flökunarvélar frá Vélfagi, hausarar frá Baader Ísland, lausfrystar frá Frost, stöflunarróbótar og róbót sem losar kör frá Samey. Þá er þar að auki búnaður frá Skaganum 3X, Marel, Raftákn, Slippnum og fleiri íslenskum fyrirtækjum. Tækin í húsinu og sá hugbúnaður sem þar er notaður er afrakstur þróunarsamstarfs Samherja og fyrirtækjanna sem framleiddu þau. Í reynd er um að ræða nýjar, sérhæfðar lausnir sem byggja á nýsköpun og frumkvöðlastarfi.

Hægt er að nálgast myndbandið hér.

Samherji

Nýr Vilhelm er kominn til landsins

Vilhelm Þorsteinsson EA 11 með Dalvík í baksýn. Mynd: Haukur Arnar Gunnarsson

Vilhelm Þorsteinsson EA 11 með Dalvík í baksýn.
Mynd: Haukur Arnar Gunnarsson

Vilhelm Þorsteinsson EA 11, nýtt skip til uppsjávarveiða sem var smíðað sérstaklega fyrir Samherja, sigldi inn Eyjafjörðinn í fyrsta sinn í gær. Vilhelm Þorsteinsson er stórt, glæsilegt og fullkomið skip, 89 metrar á lengd og 16,6 metrar á breidd. Burðargetan er vel yfir þrjú þúsund tonn í þrettán lestartönkum þar sem aflinn verður kældur niður til að sem best hráefni komi að landi.

Karstensens skipasmíðastöðin í Skagen Danmörku hannaði og smíðaði skipið eftir þörfum Samherja og naut ráðgjafar starfsfólks Samherja við verkið. Beðið hefur verið eftir skipinu með nokkurri eftirvæntingu en samningar um smíði þess voru undirritaðir 4. september 2018. Þann dag hefðu tvíburarnir Baldvin og Vilhelm Þorsteinssynir orðið 90 ára. Nýsmíðin leysir af hólmi eldri Vilhelm Þorsteinsson EA 11 sem kom nýr til landsins um síðustu aldamót.

Nýjasta fáanlega tækni um borð

Kristján Vilhelmsson, framkvæmdastjóri útgerðarsviðs Samherja, segir að allur aðbúnaður í nýja skipinu sé eins og best verður á kosið. „Skipið er stórt og það er mjög vel útbúið. Um borð er öll sú nýjasta tækni sem er fáanleg við meðferð afla og besta gerð af veiðarfærum sem við þekkjum. Skip af eins og þetta, sem er bæði með troll og nót, er með breytilega notkun á vélarafli. Þannig að við erum með tvær vélar í skipinu. Á heimasiglingunni notuðum við aðeins aðra þeirra og við þær aðstæður eyðir skipið mun minna,“ segir Kristján. Í skipinu eru klefar fyrir fimmtán manns auk sjúkraklefa. Þá er skipið einstaklega rúmgott og má þar nefna borðsal og tvær setustofur. Um borð er einnig líkamsræktaraðstaða og gufubað fyrir skipverja.

Þorsteinn Már Baldvinsson, forstjóri Samherja, sigldi með skipinu heim til Íslands frá Skagen. „Þetta er þriðja kynslóð uppsjávarskipa sem maður tekur þátt í að reka. Við ákváðum að fela Karstensens skipasmíðastöðinni þetta verkefni. Aðalhönnuðir skipsins starfa hjá stöðinni en starfsfólk Samherja hefur komið að þessu ferli með sínar hugmyndir, meðal annars varðandi orkunýtingu. Þannig má segja að skipið sé afrakstur samstarfs stöðvarinnar og okkar starfsfólks. Ég held að útkoman sé mjög góð og það var frábært að sigla með skipinu heim. Tímanum var vel varið með áhöfninni,“ segir Þorsteinn Már.

Endurnýjun er forsenda samkeppnishæfni

Samherji hefur lagt höfuðáherslu á að fjárfesta eins og kostur er í nýjum skipum, búnaði og tækni. Á síðustu árum hefur skipafloti Samherja verið endurnýjaður mikið. Á síðasta ári var nýtt hátæknivinnsluhús á Dalvík tekið í notkun og þá hafa húsnæði og tæki bolfiskvinnslunnar á Akureyri verið endurnýjuð. Samherji ræðst í slíka fjárfestingu til að tryggja að fyrirtækið sé ávallt í stakk búið að mæta ýtrustu kröfum viðskiptavina sinna en einnig svo starfsfólk Samherja vinni við bestu mögulegu aðstæður hverju sinni. Endurnýjun af þessu tagi þarf reglulega að eiga sér stað í íslenskum sjávarútvegi svo fyrirtæki í greininni séu samkeppnishæf.

Guðmundur Þ. Jónsson, skipstjóri á Vilhelm Þorsteinssyni EA 11, segir að skipið sé framúrskarandi vel hannað. „Á siglingunni heim prófuðum við að lesta skipið með sjó og prófuðum að snúa því á fullri ferð og hallinn var mjög lítill. Skipið kom einstaklega vel út úr þessari siglingu heim. Ég hef verið skipstjóri í um þrjátíu ár og ég held að það sé óhætt að fullyrða að þetta er eitt besta skip sem ég hef stýrt á mínum ferli,“ segir Guðmundur. Áætlað er að skipið haldi til veiða á fimmtudaginn í næstu viku.

Öll áhöfn skipsins og gestir um borð fóru í skimun vegna Covid-19 áður en lagt var af stað frá Skagen og svo að nýju þegar komið var til landsins í gær. Vegna sóttvarnarráðstafana var ekki mögulegt að bjóða Akureyringum og öðrum gestum að líta um borð eins og venjan er þegar ný skip koma heim en Ásthildur Sturludóttir, bæjarstóri Akureyrarbæjar, færði Guðmundi Jónssyni skipstjóra blómvönd við látlausa athöfn eftir komuna til heimahafnar í morgun.

Dagskrárgerðar- og kvikmyndatökumenn frá sjónvarpsstöðinni N4 sigldu með Vilhelm Þorsteinssyni EA 11 frá Skagen og tóku upp efni um borð. Mun N4 sýna sérstakan þátt um skipið sem verður á dagskrá stöðvarinnar á annan í páskum, mánudaginn 5. apríl kl. 20:00. Í þættinum verður fjallað ítarlega um skipið, tæknina um borð og aðbúnað skipverja.

Halda áfram að lesa

Samherji

Vilhelm Þorsteinsson EA er kominn í íslenska lögsögu

Vilhelm Þorsteinsson EA er kominn í íslenska lögsögu

Vilhelm Þorsteinsson EA 11 sigldi inn fyrir 200 mílna lögsögu Íslands í morgun og voru þessar fallegu myndir teknar við það tilefni. Myndatökumaður var Árni Rúnar Hrólfsson. Skipið mun koma til heimahafnar á Akureyri kl.10.00 á laugardagsmorgun og leggjast að við Togarabryggjuna. Vegna sóttvarnarráðstafanna verður því miður ekki hægt að hafa skipið til sýnis að svo stöddu en fyrir áhugasama minnum við á klukkutíma þátt á sjónvarpsstöðinni N4 sem sýndur verður á mánudaginn annan í páskum kl. 20.00.

Halda áfram að lesa

Samherji

Helgi Seljan fundinn sekur um alvarlegt brot vegna skrifa um Samherja

Helgi Seljan fundinn sekur um alvarlegt brot vegna skrifa um Samherja

Siðanefnd Ríkisútvarpsins telur að fréttamaðurinn Helgi Seljan hafi brotið siðareglur RÚV með ummælum sínum um Samherja. Telur nefndin að ýmis ummæli hans sem höfðu að geyma „skýra og persónulega afstöðu“ um málefni Samherja feli í sér „alvarlegt brot“ gegn siðareglunum. Þetta er niðurstaða úrskurðar siðanefndarinnar sem kveðinn var upp í dag.

Samherji lagði fram kæru hjá siðanefndinni hinn 31. ágúst á síðasta ári vegna ýmissa ummæla Helga Seljan og tíu annarra starfsmanna RÚV. Samherji taldi að starfsmennirnir hefðu brotið ákvæði í siðareglum RÚV sem leggur bann við því að starfsfólk, sem sinnir fréttum og dagskrárgerð, taki opinberlega afstöðu um umdeild eða pólitísk mál á samfélagsmiðlum. Þessu ákvæði er meðal annars ætlað að koma í veg fyrir hagsmunaárekstra og tryggja hlutleysi fréttamanna og fréttastofu RÚV.

Siðanefnd Ríkisútvarpsins kemst að þeirri niðurstöðu í úrskurði sínum að með ýmsum ummælum um Samherja á Facebook og Twitter yfir tæplega eins árs tímabil hafi Helgi Seljan „gerst hlutdrægur“ og „gengið lengra“ en svigrúm hans sem fréttamaður leyfir. Í úrskurðinum segir: „Því er það mat siðanefndarinnar að í ofangreindum ummælum felist skýr og persónuleg afstaða í málefni kæranda sem 4. mgr. 3. gr. siðareglnanna er ætlað að taka til, og því um að ræða brot á greininni.“

Kemst siðanefndin að þeirri niðurstöðu að brot Helga Seljan sé alvarlegt á mælikvarða starfsreglna siðanefndarinnar. „Hér er um að ræða ítrekuð tilvik yfir langan tíma. Í því ljósi telur siðanefndin að brot Helga sé alvarlegt,“ segir í úrskurðinum.

Hvað varðar aðra starfsmenn RÚV lítur siðanefndin framhjá skýlausu ákvæði siðareglnanna um bann við því að taka afstöðu í umdeildu máli, jafnvel þótt ummæli hafi orkað tvímælis og kunnað að tefla hlutleysi í tvísýnu. Gerir siðanefndin ákvæðið í reynd marklaust nema gengið hafi verið langt út fyrir öll siðferðismörk, eins og var raunin í tilviki Helga Seljan.

Í þessu máli var Ríkisútvarpið dómari í eigin sök því tveir af þremur nefndarmönnum siðanefndarinnar eru skipaðir í Efstaleiti. Formaðurinn er skipaður af útvarpsstjóra og Starfsmannasamtök Ríkisútvarpsins skipa einn nefndarmann. Má nærri geta hversu hlutlaus niðurstaða slíkrar nefndar kann að vera. Engu að síður kemst nefndin að afdráttarlausri niðurstöðu um „alvarlegt brot“ Helga.

Helgi Seljan hefur ítrekað viðhaft ámælisverð og óheiðarleg vinnubrögð í tengslum við umfjöllun um Samherja í miðlum Ríkisútvarpsins undanfarinn áratug. Hefur fréttamaðurinn orðið uppvís að því að hagræða gögnum, slíta upplýsingar úr samhengi og laga fréttaflutning að eigin geðþótta. Í ljósi niðurstöðu siðanefndar RÚV í dag mun Samherji krefjast þess að hann fjalli ekki frekar um málefni fyrirtækisins á vettvangi Ríkisútvarpsins og vinni ekki að slíkri umfjöllun í samstarfi við aðra. Þá verður gerð sú krafa að Ríkisútvarpið áminni hann fyrir brot í starfi.

Úrskurð siðanefndar RÚV má nálgast hér

Halda áfram að lesa

Vinsælast

Allur réttur áskilin © 2021 Tíðin