Íþrótta og ólympíu samband Íslands

Forvarnadagurinn 2021 kynntur

04.10.2021

Miðvikudaginn 6. október 2021 verður Forvarnardagurinn haldinn í  grunn- og framhaldsskólum landsins.

Í morgun fór fram fjölmiðlafundur í Dalskóla til að kynna Forvarnardaginn 2021. Skólastjóri Dalskóla Hildur Jóhannesdóttir bauð gesti velkomna, því næst tók við fundarstjórn Dóra Guðrún Guðmundsdóttir, sviðsstjóri Lýðheilsusviðs hjá Embætti landlæknis. Forseti Íslands, Hr. Guðni Th. Jóhannesson, gat að þessu sinni ekki verið viðstaddur þar sem hann var í smitgát, en tók engu að síður þátt í gegnum fjarfundabúnað. Hann sló á létta strengi jafnframt því að tala um hversu kært þetta verkefni væri honum. Auk hans tóku til máls Dagur B. Eggertsson borgarstjóri og Alma D. Möller landlæknir og beindu sínu máli að fulltrúum nemenda sem sátu fundinn í morgun.

Í ár verður áhersla lögð á andlega líðan ungmenna. Samkvæmt rannsóknum eru margir þættir sem hafa þar áhrif, meðal annars notkun orkudrykkja, nikótínnotkun, of lítill svefn og fleira.

Alma Möller landlæknir ræddi á fundinum um mikilvægi svefns fyrir börn og ungmenni, en góður svefn hefur mikil áhrif á ónæmiskerfið, vöxt, námsgetu og einbeitingu. Mikilvægt sé því að huga vel að því að ná góðum nætursvefni og ná þar jafnvægi, m.a. með því að sofna og vakna á sömu tímum alla vikuna.

Að erindum loknum var opnað fyrir umræður og boðið upp á léttar veitingar.

Hér má sjá síðu Forvarnardagsins

Íþrótta og ólympíu samband Íslands

Úttektarnefnd ÍSÍ hefur lokið störfum

07.12.2021

 

Úttektarnefnd sem ÍSÍ skipaði fyrr á árinu, til að gera úttekt á viðbrögðum og málsmeðferð KSÍ vegna kynferðisofbeldismála sem tengst hafa leikmönnum í landsliðum Íslands, hefur skilað af sér lokaskýrslu til ÍSÍ. Í nefndinni sátu Dr. Hafrún Kristjánsdóttir sálfræðingur, Kjartan Bjarni Björgvinsson héraðsdómari, sem jafnframt var formaður nefndarinnar og Rán Ingvarsdóttir lögfræðingur.

Úttektarnefndin komst að þeirri niðurstöðu að vitneskja hafi verið innan KSÍ um alls fjórar frásagnir um að leikmenn eða aðrir sem starfa fyrir hafi beitt kynbundnu eða kynferðislegu ofbeldi á árunum 2010 – 2021. Nefndin telur ljóst að KSÍ hafi brugðist við í þremur þessara mála, annaðhvort með því að leikmaður var sendur heim úr landsliðsverkefni eða því að viðkomandi starfaði ekki aftur fyrir KSÍ.
Það er jafnframt niðurstaða nefndarinnar að upplýsingar sem þáverandi formaður KSÍ veitti fjölmiðlum og almenningi í ágúst sl. um vitneskju KSÍ af frásögnum um ofbeldismál hafi verið villandi, enda var formaðurinn á sama tíma með á borði tilkynningu frá starfsmanni KSÍ um alvarlegt kynferðisofbeldi gagnvart tengdadóttur starfsmannsins. Yfirlýsingarnar samræmdust heldur ekki vitneskju um eldri tilkynningu um kæru á hendur öðrum leikmanni vegna ofbeldis.

Úttektarnefndin telur ekki efni til að fullyrða að framganga stjórnar, framkvæmdastjóra eða annarra starfsmanna KSÍ í málinu beri almennt einkenni þöggunar- og/eða nauðgunarmenningar umfram það sem gerist í íslensku samfélagi. Fyrir liggur að stjórnarfólk, framkvæmdastjóri KSÍ og starfsfólk sem kom að málinu gerði verulegar athugasemdir við þær yfirlýsingar sem formaður lét frá sér fara.
Að öðru leyti telur nefndin ekki forsendur til að fullyrða að fyrir hendi séu atvik í formannstíð Guðna Bergssonar sem beri sérstök einkenni þöggunar- og nauðgunarmenningar. Úttektarnefndin hefur t.d. engin gögn fundið eða aðrar vísbendingar fengið sem gefa til kynna að KSÍ hafi boðið kæranda í máli B sem kom til kasta KSÍ í mars 2018 þagnarskyldusamning eða komið með öðrum hætti að slíkum tilboðum. Þá telur nefndin sig ekki hafa neinar forsendur til að álykta að KSÍ hafi með einum eða öðrum hætti reynt að aftra því að mál B kæmi til meðferðar hjá lögreglu eða latt kæranda frá því að leita réttar síns í málinu.

Úttektarnefndin gerir athugasemd við að Geir Þorsteinsson, þáverandi formaður KSÍ, hafi árið 2016 leitað til almannatengils í kjölfar þess að hann frétti af því að lögregla hafi verið kölluð að dvalarstað landsliðsmanns vegna grunsemda um heimilisofbeldi.

Þrátt fyrir að konur séu í miklum minnihluta bæði á skrifstofu KSÍ og í stjórn sambandsins telur nefndin ekki unnt að draga þá ályktun af viðtölum og þeim gögnum sem stuðst hefur verið við að einhverjar þær aðstæður séu uppi innan KSÍ sem hamli þátttöku kvenna í starfi sambandsins. KSÍ starfar hins vegar innan hins alþjóðlega knattspyrnuheims þar sem hallað hefur á konur frá upphafi, líkt og í mörgum öðrum íþróttum, og tekjur af karlaknattspyrnu eru margfaldar á við tekjur af kvennaknattspyrnu.

Úttektarnefndin telur ljóst að KSÍ hefur beitt sér með virkum hætti á síðustu árum til að jafna aðbúnað karla- og kvennalandsliða. Þó er ekki hægt að líta framhjá því að hlutfall kvenna sem starfa innan knattspyrnuhreyfingarinnar er lágt og ekki í takt við hlutfall kveniðkenda. Þá hefur KSÍ einnig gripið til fjölmargra aðgerða til að auka hlut kvenna innan hreyfingarinnar sem hafa gengið misjafnlega vel en ljóst er þó að stór skref hafa verið stigin í rétta átt á síðustu árum.

Nánari upplýsingar gefur Kjartan Bjarni Björgvinsson, formaður úttektarnefndar ÍSÍ, í síma 8530770.

Halda áfram að lesa

Íþrótta og ólympíu samband Íslands

Landsmenn syntu 11,61 hring í kringum Ísland!

06.12.2021

Syndum, landsátak Íþrótta og Ólympíusamband Íslands (ÍSÍ) og Sundsambands Íslands (SSÍ) í sundi hófst með formlegum hætti 1. nóvember í Laugardalslaug og lauk sunnudaginn 28. nóvember. Verkefnið var hluti af Íþróttaviku Evrópu sem er verkefni sem styrkt er af Erasmus+, styrkjakerfi Evrópusambandsins.

Markmiðið með Syndum var að hvetja almenning til að hreyfa sig með því að synda saman hringinn í kringum Ísland. Landsmenn skráðu sig til leiks og skráðu metrana sem þeir syntu á heimasíðu átaksins, www.syndum.is.  Átakinu var vel tekið á landsvísu og samanlagt syntu 2.576 manns 15.354,9 km sem gera 11,61 hring í kringum landið! Þátttakendur gátu bæði skráð þátttöku sína á vefnum en einnig önnuðust sundlaugar landsins skráningu í átakinu á hverjum stað fyrir sig.

Almenn ánægja var meðal þátttakenda með átakið og virðast margir hafa nýtt sér það sem hvatningu til að synda oftar og lengra og einnig til að bæta sundtækni sína. Tvisvar í viku voru  fjórir þátttakendur dregnir út í lukkuleik og hlutu gjafabréf á Speedo sundfatnað, sundvörur og D-vítamín í boði H-verslunar. Aukaverðlaun voru dregin út 1. desember og fengu þá tveir heppnir þátttakendur snyrtivöru frá Taramar og árskort í sund frá ÍTR.

ÍSÍ þakkar öllum þeim sem tóku þátt og einnig starfsmönnum sundlauga sem önnuðust skráningu og hvöttu sundgesti óspart áfram í átakinu. 

Á  heimasíðu Syndum, www.syndum.is, eru allar nánari upplýsingar um verkefnið auk ýmiss  annars fróðleiks og upplýsinga um sundlaugar landsins.

Halda áfram að lesa

Íþrótta og ólympíu samband Íslands

Eldur Vetrarólympíuhátíðar Evrópuæskunnar tendraður í Róm

03.12.2021

Á morgun, 4. desember, verður eldur Vetrarólympíuhátíðar Evrópuæskunnar sem nefndur er Flame of Peace tendraður við Ara Pacis, altari tileinkað friðargyðjunni Pax, í Róm. Áhugasamir geta fylgst með athöfninni í beinu streymi á YouTube kl. 18:30 að staðartíma.

Hátíðin, sem fara mun fram í Vuokatti í Finnlandi að þessu sinni, hefst 12. desember nk. með íshokkíkeppni drengja en aðrir viðburðir leikanna verða svo haldnir í mars næstkomandi, nánar tiltekið dagana 20. – 25. mars 2022.

Ísland mun senda þátttakendur til hátíðarinnar í marsmánuði.

 

Halda áfram að lesa

Vinsælast

Allur réttur áskilin © 2021 Tíðin