Innlent

Helstu verkefni á Suðurlandi dagana 3. til 9. maí 2021

10 Maí 2021 15:02

Lýst hefur verið yfir óvissustigi almannavarna vegna hættu á gróðureldum á SV horni landsins.  Tveir sinubrunar voru tilkynntir til neyðarlínu þann 6. maí s.l.    Vel gekk að ná utan um þá, bæði með dyggri aðstoð vegfarenda og svo skjótu viðbragði brunavarna.  Annar bruninn var í Grímsnes- og Grafningshreppi en hinn í Skeiða- og Gnúpverjahreppi.   Fólk er hvatt til að fara varlega með eld í þeirri þurrkatíð sem verið hefur vestanmegin í umdæminu og ljóst er að sú hætta verður viðvarandi um einhvern tíma miðað við veðurspár.

Eldur kom upp í bílskúr í Hveragerði þann 7. maí.   Mikið tjón varð á skúrnum og eitthvað á aðliggjandi byggingum.    Eldsupptök liggja ekki fyrir og eru til rannsóknar.   Þá kom upp eldur í vélageymslu á sveitabæ í Landbroti þann 9. maí.   Verið var að vinna við rafsuðuvinnu í vélageymslunni þegar eldsins varð vart.   Þrennt leitaði sér lækninga vegna gruns um reykeitrun af völdum eldsins.   Umtalsvert tjón varð á húsnæðinu og vélum og búnaði í því.   Eldsupptök eru í rannsókn.

Frekari akstur 6 ökumanna sem stöðvaðir voru í umdæmi lögreglustjórans á Suðurlandi var stöðvaður og þeir kærðir vegna gruns um að þeir væru undir áhrifum fíkniefna.   Tveir þeirra reyndust að auki sviptir ökurétti vegna fyrri brota.    Sjöundi ökumaðurinn var svo kærður fyrir að aka undir áhrifum áfengis.   Málin bíða niðurstöðu blóðrannsóknar.

52 ökumenn voru kærðir fyrir að aka of hratt í vikunni.  Einn þeirra á ökutæki yfir 3500 kg og fær hann því 20% álag á sektina frá því sem væri ef hann væri á ökutæki undir þessari þyngd.  Sama gildir um bifreiðir sem eru 3,5 tonn eða minna og draga eftirvagn, þ.m.t. fellihýsi, tjaldvagn og hjólhýsi,  Flutninga og vörubifreiðar, hópbifreiðar og bifhjól með hliðarvagni eða skráningarskyldum eftirvagni.   Af þessum 52 ökumönnum voru 41 í Árnessýslu, 8 í Rangárvallasýslu, 2 í Vestur Skaftafellssýslu og 1 í Sveitarfélaginu Hornafjörður.

7 ökumenn voru kærðir fyrir að nota farsíma án handfrjáls búnaðar við akstur ökutækja sinna í umdæminu í liðinni viku.

Árekstur varð með vespu og bifreið í Hveragerði þann 5. maí.   Á vespunni var hjálmlaus farþegi auk ökumanns sem bar hjálm.  Áhöfn vespunnar naut aðhlynningar sjúkraflutningamanna sem kallaðir voru á vettvang en ekki var metin ástæða til flutnings þeirra á sjúkrahús með sjúkrabifreið.   Ökumaður vespunnar taldi að hemlar hennar hafi ekki virkað sem skyldi þegar þeirra gerðist þörf.

Bifreið var ekið á ljósastaur við Suðurhóla á Selfoss þann 4. maí s.l.   Ökumaður og barn bæði í viðeigandi öryggisbúnaði og sluppu án teljandi meiðsla.  Höggið töluvert og staurinn óvígur eftir.

Annarri bifreið var ekið til vestur út af Suðurlandsvegi við Skeiðavegamót þann 3. maí. Bifreiðin, sem dró kerru, fór yfir Skeiðaveg eftir að hafa tekið niður ljósastaur við vegamótin og stöðvaðist á hjólunum út í móa vestan Skeiðavegar.  Eitthvert tjón á undirvagni enda yfir hraungrýti að fara.  Ökumaðurinn einn á ferð og ómeiddur.

Reglulega er farið í eftirlit vegna sóttvarna en við erum enn að fást við Covid og allir með í því.   Þá berast ábendingar um ýmislegt sem betur má fara, einkum á veitinga og gististöðum.   Atvik þessi hafa verið skoðuð og leiðbeint um úrbætur án þess að til kæru hafi leitt.

Innlent

Grein um fullveldi og peningastefnu birt í nýjustu útgáfu Efnahagsmála

24. júní 2021

Ritið Efnahagsmál nr. 10 með greininni „Fullveldi og peningastefna“ eftir Arnór Sighvatsson hefur verið birt á vef Seðlabanka Íslands. Í greininni er fjallað um peningalegt fullveldi, hvernig hugmyndir um það hafa þróast í gegnum aldirnar og því verið beitt til tekjuöflunar, eflingar viðskipta eða hagstjórnar.

Þá er fjallað um takmörk peningalegs fullveldis, m.a. í ljósi óheftra fjármagnshreyfinga og alþjóðavæðingar viðskiptalífsins, hvernig þróun hagfræðikenninga hefur haft áhrif á skilning stjórnvalda og fræðimanna á hlutverki peningalegs fullveldis, togstreitu sem myndast getur á milli trúverðugleika peningastefnu og þarfar fyrir sveigjanleika í hagsstjórn, valið á milli leiða samtryggingar og sjálfstryggingar og samband fullveldis og athafnafrelsis einstaklinga og fyrirtækja.

Efnahagsmál nr. 10 með umfjöllun Arnórs Sighvatssonar um fullveldi og peningastefnu má nálgast hér: Efnahagsmál nr. 10 – Fullveldi og peningastefna.

Sjá hér nánari upplýsingar um útgefin rit Seðlabanka Íslands: Rit og skýrslur

Halda áfram að lesa

Innlent

Hvað með trukkana?

Benedikt S. Benediktsson lögfræðingur SVÞ

Trukkur, samkvæmt orðabók, er stór og kraftmikill vörubíll. Trukkar eru okkur mikilvægir þó flest okkar leiði hugann sjaldnast að þeim. Trukkar eru ekki bara öskubílar, olíubílar og mjólkurbílar heldur flutningabílar sem færa vörur milli staða. Trukkar færa t.d. matinn í verslanirnar, byggingarefnið á byggingastað og fiskinn í útflutning. Sérstakir trukkar flytja túrista en eru þá kallaðir rútur, sem væntanlega á að vísa til dálítils kassa af öli. Í þessu ljósi má t.d. ímynda sér að heiti trukksins, sem er frábær réttur á matseðli Gráa Kattarins, vísi til gagnsemi trukksins enda er hann samansettur úr fjölmörgum hráefnum og fullnægir daglegum þörfum afar vel. Það er sennilega ekki tilviljun að þegar rætt er um að taka eitthvað með trukki er gjarnan skírskotað til þess að gera eitthvað að afli, almennilega, fara alla leið.

Tökum það með trukki

Stjórnvöld hafa sett fram afar metnaðarfull markmið í loftslagsmálum. Í gildandi aðgerðaáætlun er m.a. fjallað um hvernig megi draga úr losun koltvísýrings í samgöngum. Ein af aðgerðunum snýr að því hvernig draga megi úr losun í þungaflutningum innanlands, m.ö.o. hvernig tökum við trukkana með trukki án þess að missa trukkið.

Trukkaland

Hér á landi eru margir trukkar í notkun miðað við höfðatölu eða a.m.k. finnst mér rökrænt að álykta á þennan hátt. Samkvæmt Wikipedíu er Ísland 16. stærsta ríki heims, miðað við höfðatölu. Ef íbúaþéttleiki á Íslandi væri hinn sami og í Mónakó byggju hér tæplega 2 milljarðar Íslendinga. Ef íbúaþéttleiki í Mónakó væri hinn sami og hér á landi byggju þar 8 manns. Ef við gefum okkur að nokkuð margir trukkar séu í notkun í okkar stóra, strjálbýla, veðurbarða og mishæðótta landi, miðað við höfðatölu, má jafnframt álykta sem svo að fjarlægðir manna á milli kalli á töluverðan trukkaakstur.

Réttu trukkarnir

Nýverið keypti ég mér rafmagnsbíl. Kaupin voru ekki sérlega frumleg enda fer hver að verða síðastur að kaupa bensín- eða dísilbíl. Bílinn losar ekki gróðurhúsalofttegundir í akstri og nú kaupi ég eingöngu innlenda orku. Umskiptin voru einföld. Fólksbílar knúnir rafmagni eru vel þróaðir, framleiddir á nokkuð hagkvæman máta og hleðsluinnviðir til staðar, bæði heima hjá mér og víða um landið. En ekki eru allir eins. Hyggist eigandi trukks kaupa nýjan trukk, sem gengur fyrir öðru en dísilolíu, vandast málið. Valkostirnir eru fáir og þeir sem eru þó til staðar kosta svo heiftarlega mikið að kaupin ganga ekki upp. Þá er drægi sumra kostanna enn takmörkuð og flutningagetan óljós. Sé trukki stungið í samband er hætt við að það verði ekki margar innstungur eftir fyrir aðra.

Við þurfum öll á trukkunum að halda. Eigendur trukkanna vilja eiga trukka til að þjónusta okkur. Helst vilja þeir aka trukkunum á innlendri orku. Þar liggur vandinn því slíkir trukkar standa enn vart til boða en eru þó á leiðinni, í framtíðinni og vonandi þeirri nánustu. Að hanna og smíða trukk tekur mörg ár, jafnvel fyrir reyndustu menn, og þegar hann hefur verið smíðaður þarf að prófa hann við ýmsar aðstæður. Þar að auki þarf að koma upp tækjum til að koma orkugjafa á trukkinn, þ.e. hliðstæðu olíudælunnar.

Trukkar í loftslagsvísi atvinnulífsins

Hinn 23. júní var Loftslagsvísir atvinnulífsins gefinn út. Eins og önnur fyrirtæki hafa flutningafyrirtæki verulegan áhuga á að taka virkan þátt í orkuskiptum í samgöngum. Þegar kemur að akstri trukka á lengri leiðum virðist vetnisvæðing helsta lausnin framundan. Nokkrir trukkaframleiðendur eru að prófa sína trukka erlendis en það er enn nokkuð í að hægt verði að kaupa þá. Það er hins vegar ljóst að trukkarnir verða ekki bara dýrir í innkaupum heldur verður það töluvert vesen að fara að nota þá. Til dæmis vantar okkur fjölda vetnisstöðva.

Púslin í nýorkuveruleika trukka eru sannarlega mörg en það er búið að taka lokið af öskjunni. Wasgij-púslið blasir við, menn eru búnir að klóra sér svolítið í hausnum en eru sannfærðir um að þetta muni klárast.

Að lokum skora ég á Gráa köttinn að breyta nafninu á trukknum í vetnistrukkinn, svona til að taka af allan vafa.

Benedikt S. Benediktsson
lögfræðingur SVÞ

Greinin birtist fyrst á Vísi.is, fimmtudaginn 24. júní 2021.

Halda áfram að lesa

Innlent

Heimsókn fulltrúa Geðhjálpar

Formaður og framkvæmdastjóri Geðhjálpar fóru yfir ýmis hagsmunamál umbjóðenda sinna, einkum hvað snertir réttarstöðu þeirra sem vistaðir eru á lokuðum deildum geðheilbrigðisstofnana, á fundi með umboðsmanni í dag.

Halda áfram að lesa

Vinsælast

Allur réttur áskilin © 2021 Tíðin