Innlent

Helstu verkefni lögreglu á Suðurlandi dagana 05.04.21 til 11.04.21

12 Apríl 2021 10:28

Þrír ökumenn sem lögregla hafði afskipti af á Suðurlandi í liðinni viku eru grunaðir um að hafa ekið bifreiðum sínum ölvaðir.  Tveir þeirra í Sveitarfélaginu Hornafjörður en einn í Árnessýslu.

45 ökumenn voru kærðir fyrir að aka of hratt í umdæminu, 32 þeirra í Árnessýslu, 9 í V-Skaftafellssýslu og 4 í Rangárvallasýslu.   16 þessara ökumanna eru meira en 30 km/klst yfir leyfðum hraða og sá sem hraðast ók var á 138 km/klst hraða á vegi þar sem leyfður hraði er 90 km/klst.

3 ökumenn voru kærðir fyrir að nota farsíma án handfrjáls búnaðar við akstur bifreiða sinna í umdæminu.   40 þúsund króna sekt við slíku broti svona svo því sé haldið til haga.

Erlendum ferðamanni sem hugðist leggja bifreið sinni í stæði við húsvegg hótels síns í Vestur Skaftafellssýslu  fipaðist við það og steig á bensíngjöf en ekki bremsu.  Bíllinn lenti á húsveggnum og rúða brotnaði auk þess sem klæðning skemmdist.   Ekki urðu slys á fólki.   Þrjú önnur umferðarslys voru tilkynnt í liðinni viku öll án alvarlegra meiðsla.

Tvö slys voru tilkynnt þar sem hestamenn duttu af baki.  Í öðru tilfellinu er um að ræða áverka á höfði og baki en í hinu á fæti.    Í báðum tilfellum voru hestamennirnir fluttir á sjúkrahús til aðhlynningar.

Sina brann á allstóru svæði í A-Skaftafellssýslu þann 5. apríl s.l.  Upptök eldsins reyndust vera frá ruslabrennu bónda en hvorutveggja er óheimilit, að brenna rusli og að brenna sinu.   Málið fer áfram til ákæruvalds til meðferðar.

Tvö andlát í heimahúsi eru til rannsóknar eftir vikuna.   Um þessi verkefni er jafnan lítið getið í  upplýsingagjöf lögreglu en lögreglu er skylt að rannsaka andlát utan sjúkrastofnana og felur sú rannsókn að jafnaði í sér vettvangsskoðun  og líkskoðun ásamt réttarkrufningu til að komast að því með óyggjandi hætti hvert banamein viðkomandi var.   Alls hafa 9 slík mál komið inn á borð lögreglu frá áramótum og er það í samræmi við fjölda fyrri ára.

Eitt mál er varðar heimilisofbeldi kom upp í liðinni viku og er nú í vinnslu rannsóknardeildar.

Við erum enn að fást við Covid og brýnt að standa sig hvað persónulegar sóttvarnir varðar.   Sýnatökur eru á vegum heilbrigðisstofnana í umdæminu á hverjum degi eftir þeirra skipulagi og allir sem finna fyrir einkennum hvattir til að láta taka sýni hjá sér.   Í þessu þarf hver og einn að taka ábyrgð á sjálfum sér.   Nokkurrar óþolinmæði gætir orðið nú þegar bólusetningar eru komnar vel  af stað en enn sem fyrr er árangurinn fyrst og fremst undir því kominn að hver og einn gæti að sínu og sýni metnað hvað það varðar.    Lögreglan hefur aðstoðað við sýnaflutning frá heilsugæslum í umdæminu og í rannsóknarstofu eftir því sem þörf er á og 6 slík verkefni eru bókuð hjá okkur í liðinni viku en í flestum tilfellum sér viðkomandi heilsugæsla um slíkt sjálf.   Þá hefur lögreglan sinnt eftirliti á veitinga og gististöðvum um umdæmið auk þess sem brugðist hefur verið við tilkynningum þar sem grunur leikur á að sóttvarnarreglur séu brotnar.  Í einu slíku tilviki tilkynnti starfsmaður á bensínstöð  um erlendan mann, sem hann taldi ferðamann, sem ekki fékkst til að setja upp grímu og var vikið út af staðnum vegna þess.  Lögreglumenn fóru á vettvang en maðurinn þá farinn.    Athugun lögreglu leiddi í ljós að maðurinn var a.m.k. ekki á meðal þeirra sem skráðir voru í sóttkví á þessum tíma.

Almannavarnir

Óvissustig vegna hættu á gróðureldum á Norðurlandi Vestra

Ríkislögreglustjóri, í samráði við lögreglustjóra og slökkviliðsstjórana á Norðurlandi Vestra hafa ákveðið að lýsa yfir óvissustigi almannavarna vegna hættu á gróðureldum. Þessi ákvörðun er byggð á því að lítið hefur rignt á svæðinu undanfarið og veðurspá næstu daga sýnir heldur ekki neina úrkomu af ráði. Óvissustig almannavarna þýðir að aukið eftirlit er haft með atburðarás sem á síðari stigum gæti leitt til þess að heilsu og öryggi fólks, umhverfis eða byggðar verði ógnað. Að lýsa yfir óvissustigi er hluti af verkferlum í skipulagi almannavarna til að tryggja formleg samskipti og upplýsingagjöf á milli viðbragðsaðila og almennings.

Almenningur er hvattur til að sýna aðgát með opinn eld á þessum svæðum og öðrum þar sem gróður er þurr. Það þarf ekki mikinn neista til þess að af verði stórt bál.

Ef fólk verður vart við gróðurelda á strax að hringja í 112. Á heimasíðu almannavarnadeildar ríkislögreglustjóra má nálgast upplýsingar um ýmsar varnir til að draga úr hættu af gróðureldum https://www.almannavarnir.is/natturuva/eldhaetta/ og einnig inn á https://www.grodureldar.is/

Halda áfram að lesa

Alþingi

Forsætisnefnd afgreiðir erindi um siðareglumál

12.5.2021

Forsætisnefnd afgreiddi á fundi sínum 10. maí erindi sem henni barst 18. apríl sl. frá Birni Leví Gunnarssyni alþingismanni þar sem hann óskaði álits forsætisnefndar á því hvort ummæli hans í grein í Morgunblaðinu 3. apríl sl. stæðist siðareglur alþingismanna. Niðurstaða forsætisnefndar er birt í meðfylgjandi bréfi til Björn Levís Gunnarssonar

Var niðurstaðan sú að skilyrði brysti til þess að nefndin tæki erindið til athugunar á grundvelli siðareglna fyrir alþingismenn, sbr. 1. málslið 1. mgr. 18. gr. siðareglnanna.

Halda áfram að lesa

Innlent

Landlæknir spurður út í bólusetningar vegna COVID-19

Umboðsmaður Alþingis hefur óskað eftir að landlæknir veiti upplýsingar um hvernig staðið hefur verið að leiðbeiningum og upplýsingagjöf vegna COVID-19 bólusetningar. Einkum með tilliti til þeirra sem, af heilsufarslegum ástæðum, telja ekki öruggt að þiggja tiltekið bóluefni.

Halda áfram að lesa

Vinsælast

Allur réttur áskilin © 2021 Tíðin