Íþrótta og ólympíu samband Íslands

Hertar takmarkanir á samkomum taka gildi 25. júlí

24.07.2021

Hraðvaxandi fjölgun COVID-19 smita í samfélaginu undanfarna daga hefur nú haft þær afleiðingar að stjórnvöld hafa neyðst til að herða sóttvarnir og setja á ný takmarkanir á samkomur. Ný reglugerð heilbrigðisráðherra þar að lútandi tekur gildi sunnudaginn 25. júlí nk. og gildir til og með 13. ágúst nk. Vonast er til að hertar reglur séu til skamms tíma á meðan verið er að ná tökum á fjölgun smita.

Helstu takmarkanirnar sem viðkoma íþróttastarfinu í landinu eru eftirfarandi: 

  • Almennar fjöldatakmarkanir verða 200 manns. Börn fædd 2016 og síðar eru undanþegin.
  • Nándarregla verður almennt 1 metri. Börn fædd 2016 og síðar verði undanþegin.
  • Grímuskylda verður tekin upp innanhúss og þar sem ekki er unnt að viðhafa 1 metra reglu. Börn fædd 2006 og síðar eru undanþegin.
  • Heilsu- og líkamsræktarstöðvum sem og sund- og baðstöðum verður heimilt að hafa opið fyrir 75% af hámarksfjölda leyfilegra gesta. Sameiginlegan búnað skal sótthreinsa milli notenda.
  • Íþróttaæfingar og -keppnir barna og fullorðinna heimilar með og án snertinga. Hámarksfjöldi þeirra sem fæddir eru 2005 og fyrr verður 100 manns í rými. Hámarksfjöldi áhorfenda verður 200 manns í rými sem skulu skráðir í númeruð sæti með nafni, kennitölu og símanúmeri. Mögulegt er að hafa fleiri en eitt rými, þ.e. með sérinngangi fyrir hvert rými og að komið sé í veg fyrir blöndun fyrir og eftir viðburð.Veitingasala óheimil á keppnisstöðum.

Frétt á vef heilbrigðisráðuneytis.

Reglugerð heilbrigðisráðherra sem gildir frá 25. júlí 2021.

Minnisblað sóttvarnalæknis 22. júlí 2021.

Íþrótta og ólympíu samband Íslands

Afreksbúðir ÍSÍ þann 25. september

24.09.2021

Laugardaginn 25. september verður fyrsti fyrirlesturinn í Afreksbúðum ÍSÍ en sérsambönd ÍSÍ tilnefna íþróttafólk úr sínum röðum á aldrinum 15-18 ára í Afreksbúðir ÍSÍ.

Þátttakendur hafa kost á að mæta í Íþróttamiðstöðina í Laugardal til að fylgjast með fyrirlestrinum en einnig verður hægt að fylgjast með í gegnum Teams. Fleiri fyrirlestrar verða haldnir fyrir ungt og upprennandi íþróttafólk sérsambanda ÍSÍ á næstu mánuðum. 

Íþróttasálfræðingurinn Hreiðar Haraldsson hjá Haus hugarþjálfun verður með fyrsta fyrirlesturinn í lotunni. Fyrirlesturinn fjallar um kvíða fyrir keppnum sem er algengur meðal íþróttafólks og getur haft áhrif á líðan og frammistöðu þess. Mikilvægt er að íþróttafólk hafi verkfæri í sínum verkfærakassa til að takast á við kvíðann svo hann hafi sem minnst áhrif á líðan og frammistöðu. Hreiðar útskýrir á fyrirlestrinum hvað kvíði fyrir keppnum er og hvernig árangursríkast er að takast á við hann.

Áhugasamir geta séð fyrirlestrana frá því 2020-2021 hér á heimasíðu ÍSÍ en marga áhugaverða fyrirlestra er að finna þar sem geta nýst áhugasömu íþróttafólki.

Halda áfram að lesa

Íþrótta og ólympíu samband Íslands

Hreyfum okkur saman í Íþróttaviku Evrópu

23.09.2021

Íþróttavika Evrópu (The European Week of Sport) er haldin 23. – 30. september í yfir 30 Evrópulöndum. Íþrótta- og Ólympíusamband Íslands hefur líkt og undanfarin ár hlotið styrk frá Evrópusambandinu í gegnum Erasmus+ styrkjakerfið vegna Íþróttaviku Evrópu.

Markmiðið með Íþróttaviku Evrópu er að kynna íþróttir og almenna hreyfingu um alla Evrópu og sporna við auknu hreyfingarleysi meðal almennings. Íþróttavikan er ætluð öllum óháð aldri, bakgrunni eða líkamlegu ástandi. Sérstök áhersla er lögð á að höfða til grasrótarinnar og að hvetja Evrópubúa til að sameinast undir slagorðinu #BeActive og til þess að hreyfa sig oftar og meira í sínu daglega lífi.

Íþróttavika Evrópu er nú hafin með fullt af fjölbreyttum og skemmtilegum viðburðum um allt land. Íþrótta- og Ólympíusamband Íslands hvetur alla sem hafa áhuga á að kynna sér verkefnið nánar og allt það sem í er boði er með því að kíkjainná www.beactive.is eða á Facebook síðu verkefnisins undir BeActive Iceland. 

ÍSÍ hvetur almenning að skella sér á opna æfingu eða prófa eitthvað alveg nýtt og deila því svo með okkur á @BeActive.is.

Frekari upplýsingar gefur Hrönn Guðmundsdóttur sviðsstjóri Almenningsíþróttasviðs ÍSÍ á netfangið [email protected] eða í síma 514 4000. 

 

Halda áfram að lesa

Íþrótta og ólympíu samband Íslands

Auglýst eftir umsóknum um styrki

23.09.2021

Íþrótta- og Ólympíusamband Íslands (ÍSÍ) og Ungmennafélag Íslands (UMFÍ) auglýsa eftir umsóknum um styrki frá sérsamböndum, íþróttahéruðum og íþrótta- og ungmennafélögum landsins.

Um er að ræða styrk að upphæð 250.000 krónur til að standa fyrir verkefni sem hvetur börn og ungmenni af erlendum uppruna og fjölskyldur þeirra til þátttöku í skipulögðu íþróttastarfi. Fjórir styrkir eru í boði. Til þess að hljóta styrk þurfa félög að skila áætlun um hvernig þau hyggjast nýta fjármagnið.

Tímarammi verkefnisins er veturinn 2021 – 2022. Eftir að verkefnunum lýkur munu ÍSÍ og UMFÍ taka saman gögn styrkþega og deila reynslunni til annarra íþrótta- og ungmennafélaga. Með þekkingaröflun og miðlun upplýsinga gerum við gott starf enn betra. Þetta er í annað sinn sem ÍSÍ og UMFÍ útdeila styrkjum til aukinnar þátttöku barna og ungmenna af erlendum uppruna.

Umsóknarfrestur er til 22. október. Smelltu hér til þess að sækja um.

Vertu með bæklingar

ÍSÍ og UMFÍ minna á bæklinginn Vertu með sem kom út haustið 2018. Markhópur bæklingsins eru foreldrar barna og ungmenna af erlendum uppruna og markmiðið með útgáfu hans er að vekja athygli á mikilvægi þess að börn taki þátt í skipulögðu íþróttastarfi. Í bæklingnum eru hagnýtar upplýsingar um starfsemi íþrótta- og ungmennafélaga landsins.

  • Upplýsingar um æfingagjöld íþróttafélaga.
  • Frístundastyrki
  • Mikilvægi þátttöku foreldra og kosti þess að hreyfa sig í skipulögðu starfi.

Bæklingurinn er á níu tungumálum, þ.e. á íslensku, ensku, pólsku, taílensku, litháísku, filippseysku, arabísku, víetnömsku og spænsku (væntanlegur).

Smelltu hér til þess að skoða bæklinginn.

 

Halda áfram að lesa

Vinsælast

Allur réttur áskilin © 2021 Tíðin