Innlent

Innköllun og sölubann á leikföngum hjá Eyrnes

09.09.2021

FréttamyndNeytendastofa hefur fyrirskipað innköllun og bannað sölu og afhendingu á tjaldhúsi fyrir börn og ungbarnaleikteppi með píanói sem voru seld hjá Hópkaup.is. Eyrnes ehf. er innflytjandi varanna. Tjaldhúsið er samsett úr ýmsum smáum hlutum ásamt stórri ábreiðu sem börnin byggja sér hús úr. Ungbarna leikteppið er hins vegar útbúið rafhlöðuknúnu píanói með áföstum ramma og hangandi munum.

Neytendastofa fékk ábendingu um að verið væri að selja leikföng sem gætu verið hættuleg fyrir börn þar sem þau væru ekki CE merkt. Í kjölfarið óskaði stofnunin eftir gögnum frá Eyrnes sem gætu staðfest að leikföngin væru örugg.

Gögn sem stofnunin fékk afhent frá Eyrnes reyndust ófullnægjandi. Þá skorti jafnframt á upplýsingagjöf um framleiðanda leikfanganna á eða með leikföngunum. Taldi stofnunin að Eyrnes hafi ekki sýnt fram á að leikföngin uppfylltu lágmarkskröfur um öryggi sem leikföng þurfa að uppfylla svo heimilt sé að markaðssetja þau hér á landi. Strangar kröfur eru gerðar til hönnunar og framleiðslu leikfanga fyrir börn og þá sérstaklega fyrir börn yngri en 3 ára til dæmis hvort smáir munir gætu valdið köfnunarhættu, hvort ákveðnar einingar séu brothættar, aðgengi að rafhlöðum eða hvort auðvelt sé að klemmast á milli eininga.

Í ljósi framangreinds taldi Neytendastofa nauðsynlegt að banna alla sölu og afhendingu leikfanganna, og að nauðsynlegt væri að innkalla vörurnar af markaði vegna áhættuþátta í garð ungra barna.

Neytendastofa skorar á alla þá sem keypt hafa umrædd leikföng að hætta notkun þeirra og skila þeim til Eyrnes gegn endurgreiðslu eða að farga þeim.

Neytendastofa vill ítreka að það má ekki selja leikföng nema að þau séu CE merkt. Merkið þýðir að varan hafi verið prófuð miðað við ætlaða notkun og þann aldurshóp sem varan er framleidd fyrir. Ef varan er í lagi og stenst allar prófanir ásamt því að allar merkingar og leiðbeiningar séu í lagi má setja CE merkið á vöruna.

Ákvörðunina má lesa hér

Almannavarnir

Hættustig Almannavarna vegna veðurs á Austurlandi.

Ríkislögreglustjóri í samráði við lögreglustjórann á Austurlandi lýsa yfir hættustigi Almannavarna vegna veðurs,  á morgun sunnudaginn 25. september.

Fyrr í dag var óvissustigi lýst yfir á svæðinu en hefur nú verið breytt í hættustig.

Fólk sem hugar að ferðalögum á þessum landshlutum er hvatt til þess að fylgjast vel með veðurspám á www.vedur.is og upplýsingar um ástand á vegum á www.vegagerdin.is

Halda áfram að lesa

Innlent

Slæm veðurspá fyrir Suðausturland – lokun vega frá því snemma í fyrramálið

24 September 2022 17:54

Ríkislögreglustjóri í samráði við Lögreglustjórinn á Suðurlandi hefur lýst yfir hættustigi vegna yfirvofandi óveðurs á morgun.

Okkar verðmætu samstarfsmenn á Veðurstofunni rýna nú í veðurspá næsta sólarhringsins.  Búið er að boða rauða viðvörun vegna fyrirsjáanlegs óveðurs á Austfjörðum á morgun og  appelsínugul viðvörun er fyrir Suðausturland.  Vegagerðin boðar að búast megi við lokun vega frá Kirkjubæjarklaustri og austur um frá því snemma í fyrramálið allt þar til veðrinu slotar,  mögulega ekki fyrr en á aðfaranótt mánudags.  Veðurfræðingar hafa varað við því að í verstu útkomu gæti komið til þess að færa þurfi viðbúnaðarstigið á rautt fyrir Suðausturland um tíma á morgun.

Í stuttu máli er þetta þannig:

Appelsínugul viðvörun er í gildi fyrir Suðausturland frá því klukkan 06:00 í fyrramálið og fram til klukkan 03:00 á aðfaranótt mánudags.  Norðvestan 20-28 m/s með vindhviður staðbundið yfir 40 m/s. Fólk er hvatt til að tryggja lausamuni. Ekkert ferðaveður.

Gul viðvörun er fyrir vesturhluta Suðurlands frá því kl. 10:00 á morgun til klukkan 21:00.  Norðvestan 18-23 m/s undir Eyjafjöllum og vindhviður yfir 30 m/s. Varasamt að vera á ferðinni á ökutækjum sem taka á sig mikinn vind. Fólk er hvatt til að ganga frá lausamunum.

Við hvetjum fólk til að fylgjast vel með veðurspám, ferðaþjónustuaðila til að upplýsa ferðamenn um veðurspár og á Suðausturlandi er eins og áður sagði ekkert ferðaveður.

Aðgerðastjórn verður mönnuð á skrifstofu lögreglustjóra ef farið verður yfir á rautt í umdæminu.

Halda áfram að lesa

Innlent

Utanríkisráðherra hvatti til samstöðu um alþjóðakerfið

Sameiginleg ábyrgð þjóða heims á þeim gildum sem alþjóðakerfið hvílir á var leiðarstefið í ræðu Þórdísar Kolbrúnar Reykfjörð Gylfadóttur utanríkisráðherra á allsherjarþingi Sameinuðu þjóðanna í kvöld. Innrás Rússa í Úkraínu, umhverfis- og loftslagsmál og mannréttindi, meðal annars út frá máli ungrar konu sem lést í varðhaldi Íran, voru á meðal helstu umfjöllunarefna ræðunnar.

Á 77. allherjarþingi Sameinuðu þjóðanna sem nú stendur yfir í New York kynna aðildaríkin utanríkistefnu sína og sýn á alþjóðamálin. Fyrr í kvöld flutti Þórdís Kolbrún Reykfjörð Gylfadóttir utanríkisráðherra ræðu Íslands. Í upphafi ávarpsins áréttaði hún að mikilvægi allsherjarþingsins og að þar stæðu öll ríki heims jöfn. „Hvort sem við erum fulltrúar risaveldis eða eins af þeim rúmlega sjötíu aðildarríkjum sem hafa, líkt og Ísland, innan við eina milljón íbúa þá eigum við öll jafn mörg sæti við borðið, hvert okkar hefur eitt atkvæði og við megum öll láta rödd okkar heyrast úr þessum ræðustól,“ sagði ráðherra í ræðunni.

Í framhaldinu ræddiÞórdís Kolbrún fundarhamarinn sem Íslendingar gáfu Sameinuðu þjóðunum og notaður er í sal allsherjarþingsins. Sagði hún að þótt hann léti lítið yfir sér fylgdi honum dagskrárvald í umræðum valdamesta fólks heims og áletrunin „Með lögum skal land byggja“ minnti á þá reglu sem ríkja á í samskiptum þjóða. Eftir margra ára friðar- og uppbyggingartímabil væru nú blikur á lofti vegna styrjalda, náttúrhamfara og annarrar ógna. „Það er skylda okkar sem leiðtoga, ekki síst okkar sem tilheyrum yngri kynslóðum, að sofna ekki á verðinum í skjóli þess sem hefur áunnist undanfarna áratugi. Við verðum að láta einskis ófreistað að styðja við hið alþjóðlega kerfi og sannfæra íbúa heims um að þrátt fyrir vankanta sé það miklu betra en nokkur önnur leið til þess að leysa úr ágreiningi milli ríkja,“ sagði hún.

Stríðið í Úkraínu var ráðherra ofarlega í huga í ræðunni, sem hún sagði hrollvekjandi áminningu um hvernig heimurinn liti út ef eyðileggingaröfl fengju að ráða örlögum þjóða frekar en sköpunargeta. „Því vil ég árétta áður en ég fjalla um alþjóðamálin að öðru leyti að í þágu mannkyns verður Úkraína að sigra. Árás Rússlands verður að hrinda og þeim sem bera ábyrgð á voðaverkum í skjóli innrásarinnar verður að refsa.”

Þórdís Kolbrún fjallaði um ýmsar aðrar áskoranir samtímans, til dæmis náttúruhamfarir vegna hlýnunar jarðar, fátækt og fæðuskort og hvaða lærdóm mætti draga af heimsfaraldri kórónuveiru sem hefði afhjúpað alvarlegar brotalamir í viðbrögðum þjóða við hnattrænum krísum, en einnig að framtíðin myndi leiða í ljós hversu skynsamleg viðbrögð heimsins við faraldrinum voru. Þá minnti hún á nauðsyn þess að standa vörð um heilbrigði hafsins og sjálfbæra auðlindanýtingu og benti í því sambandi á hve vel hafréttarsamningur Sameinuðu þjóðanna hefði reynst.

Mannréttindamál voru fyrirferðarmikil í ræðunni og lýsti ráðherra meðal annars áhyggjum af uppgangi kynþáttahaturs, gyðingahaturs og þjóðernisöfga víða um heim. Þá ætti tjáningarfrelsið víða í vök að verjast, ríki á borð við Rússland dreifðu vísvitandi áróðri og samsæriskenningum og kæfðu alla gagnrýna þjóðfélagsumræðu. Samfélög þar sem ekki mætti draga í efa yfirvöld og þeirra boðskap gætu ekki með nokkru móti talist frjáls. „Ef fólki á að takast að finna þær róttæku lausnir sem heimurinn þarf svo á að halda nú verður það að geta hnekkt kyrrstöðu. Það verður að geta látið skoðanir sínar í ljós og rætt viðkvæmustu málefni á opinskáan hátt. „Sviatlana Tsikhanouskaja berst fyrir þessum gildum í þágu fólksins í Belarús. Þetta eru gildin sem konur og stúlkur í Afganistan fá ekki notið. Og það er á grunni þessara gilda sem ekki verður við það unað að Masha Amini hafi látist af barsmíðum í Íran fyrir að bera ekki höfuðklút í samræmi við opinber fyrirmæli,“ sagði Þórdís Kolbrún.

Ráðherra lauk ávarpi sínu á brýningu til leiðtoga heimsins að taka höndum saman við að leysa þær miklu og mörgu áskoranir sem mannkyn stendur frammi fyrir. „Ég er þakklát fyrir að fá tækifæri til að ávarpa 77. allsherjarþingið og vera enn einu sinni minnt á að þrátt fyrir allt sé það hinn hefðbundni farvegur alþjóðsamskipta að þjóðir heims komi saman og skiptist á hugmyndum og skoðunum á siðmenntaðan hátt og þau ríki sem brjóta reglurnar hljóta nánast undantekningalaust fordæmingu,“ sagði Þórdís Kolbrún að lokum.

Ræðu utanríkisráðherra má lesa í heild sinni hér á Stjórnaráðsvefnum. 

Halda áfram að lesa

Vinsælast

Allur réttur áskilin © Tíðin