Íþrótta og ólympíu samband Íslands

Lífshlaupið er hafið og skráning enn í fullum gangi

11.02.2021
Lífshlaupið 2021 hófst þann 3. febrúar sl. Nú þegar hafa yfir 19.000 þátttakendur skráð sig til leiks og það stefnir í hörku skemmtilega keppni. Stöðuna í vinnustaðakeppninni má finna hér en það er vert að minna á það að til þess að ganga sem best í vinnustaðakeppninni þarf að virkja sem flesta á vinnustaðnum til að hreyfa sig í að lágmarki 30 mínútur á dag á meðan á Lífshlaupinu stendur. Ef þú ert ekki þegar búinn að skrá þig til leiks í Lífshlaupið 2021 er það ekki of seint. Það er hægt að skrá sig til leiks hér og það er hægt að skrá sína hreyfingu frá 3. febrúar.

Ef þú vilt rifja upp meira um Lífshlaupið getur þú lesið allt um Lífshlaupið hér á vefsíðu Lífshlaupsins.
 
Nú er orðið ennþá einfaldara að skrá hreyfingu sína á meðan á Lífshlaupinu stendur því útbúið hefur verið smáforrit Lífshlaupsins. Í smáforritinu er hægt að skrá og sjá alla hreyfingu viku aftur í tímann. Þar er einnig hægt að lesa hreyfingu beint úr Strava. Það er þó rétt að benda á að það þarf að fara á vefsíðu Lífshlaupsins til þess að stofna aðgang og til þess að stofna lið/ganga í lið, en eftir að það er búið er hægt að skrá sig inn í gegnum smáforritið og skrá alla hreyfingu þar. Smáforritið finnst bæði í App Store (iOS) og í Play Store (Android) undir heitinu „Lífshlaupið“.
 
Á meðan Lífshlaupinu stendur eru bæði úrdráttarverðlaun alla virka daga sem og myndaleikur á samfélagsmiðlum og eru veglegir vinningar í boði. Hér á facebook síðu Lífshlaupsins má fylgjast með gangi mála.

Íþrótta og ólympíu samband Íslands

Sundfélagið Óðinn Fyrirmyndarfélag ÍSÍ

04.03.2021

Sundfélagið Óðinn á Akureyri fékk viðurkenningu sem Fyrirmyndarfélag ÍSÍ miðvikudaginn 3. mars síðastliðinn. Það var vel við hæfi að afhenda viðurkenninguna á sundlaugarbakka Sundlaugar Akureyrar í fallegu norðlensku veðri.

Það voru þeir Ingi Þór Ágústsson úr framkvæmdastjórn ÍSÍ og Viðar Sigurjónsson skrifstofustjóri ÍSÍ á Akureyri sem afhentu formanni félagsins Guðrúnu Rósu Þórsteinsdóttur viðurkenninguna.

Á myndinni eru frá vinstri Ingi Þór, Guðrún Rósa, Viðar og Helgi Rúnar Bragason framkvæmdastjóri Íþróttabandalags Akureyrar. Ungir iðkendur úr Óðni halda á fána Fyrirmyndarfélagsins.

Fyrirmyndarfélag ÍSÍ og Fyrirmyndarhérað ÍSÍ eru gæðaverkefni íþróttahreyfingarinnar er snúa að íþróttastarfi. Með því að taka upp gæðaviðurkenningu fyrir íþróttastarf geta íþróttafélög, -deildir eða -héruð sótt um viðurkenningu til ÍSÍ miðað við þær gæðakröfur sem ÍSÍ gerir. Standist þau þessar kröfur fá þau viðurkenningu á því frá ÍSÍ og geta kallað sig Fyrirmyndarfélag ÍSÍ, Fyrirmyndardeild ÍSÍ eða Fyrirmyndarhérað ÍSÍ. ÍSÍ hvetur íþróttafélög, -deildir og -héruð til að sækja um þessa viðurkenningu til ÍSÍ.

Umsjón með verkefninu hefur Viðar Sigurjónsson ([email protected]), skrifstofustjóri ÍSÍ á Akureyri.

Lesa má meira um Fyrirmyndarfélag ÍSÍ hér.

Lesa má meira um Fyrirmyndarhérað ÍSÍ hér. 

Halda áfram að lesa

Íþrótta og ólympíu samband Íslands

75. ársþing KSÍ streymt í beinni

03.03.2021

75. ársþing Knattspyrnusambands Íslands (KSÍ) fór fram þann 27. febrúar, en það var haldið í fyrsta sinn með rafrænum hætti frá höfuðstöðvum KSÍ í Laugardal. Lárus L. Blöndal, forseti ÍSÍ, sótti þingið fyrir hönd ÍSÍ.

Nokkrar tillögur lágu fyrir þinginu og er hægt að lesa um afgreiðslu þeirra á síðu KSÍ.

Þingskjöl má sjá hér.

Ársskýrslu KSÍ má sjá hér.

Guðni Bergsson gaf kost á sér til áframhaldandi formennsku og var sjálfkjörinn, þar sem ekkert mótframboð barst.

Ásgeir Ásgeirsson, Borghildur Sigurðardóttir, Magnús Gylfason og Þorsteinn Gunnarsson voru sjálfkjörin í stjórn þar sem ekkert mótframboð barst. Auk þeirra sitja í stjórn Gísli Gíslason, Ingi Sigurðsson, Ragnhildur Skúladóttir og Valgeir Sigurðsson. Varamenn í stjórn eru Guðjón Bjarni Hálfdánarson, Jóhann K. Torfason og Þóroddur Hjaltalín.

Ómar Smárason, deildarstjóri samskiptadeildar KSÍ, sagði um þingið: „Þó vissulega sé komin nokkur reynsla á fjarfundi á þessum Covid-tímum, þá er eitt að halda fjarfund og annað að skipuleggja og framkvæma ársþing sem þetta og að gríðarlega mörgu að hyggja. Fundurinn sjálfur og samskipti innan hans er eitt verkefni, annað verkefni er atkvæðagreiðsla og kosningar, og þriðja verkefnið er svo samskipti og kynning út á við. Tæknistjórnun var í höndum Advania og starfsfólks KSÍ og gekk það samstarf afar vel. Framkvæmdin á þinginu gekk vonum framar, atkvæðagreiðslur um málefni sem lágu fyrir þinginu voru hnökralausar og ársþinginu var nú í fyrsta sinn streymt í beinni og opinni vefútsendingu á miðlum KSÍ og voru vel á annað þúsund tengingar inn á útsendinguna yfir daginn.“

Tvenn grasrótarverðlaun KSÍ voru veitt fyrir árið 2020, annars vegar til Fótboltafélagsins Múrbrjóta og hins vegar til Kormáks/Hvatar. Nánar má lesa um grasrótarverðlaunin á vefsíðu KSÍ hér.

Jafnréttisviðurkenningu KSÍ fyrir árið 2020 hlaut Heimavöllurinn fyrir brautryðjendastarf á sviði umfjöllunar um knattspyrnu kvenna. Nánar má lesa um jafnréttisviðurkenninguna á vefsíðu KSÍ hér.

Knattspyrnudómarafélag Norðurlands (KDN) hlaut dómaraverðlaun KSÍ fyrir 2020 og Marc Boal hlaut fjölmiðlaviðurkenningu KSÍ fyrir bók sína „Sixty four degrees north“.

Halda áfram að lesa

Íþrótta og ólympíu samband Íslands

97. ársþing UMSK – Nýr formaður

02.03.2021

 
97. ársþing Ungmennasambands Kjalarnesþings (UMSK) fór fram þann 25. febrúar sl. rafrænt. Guðmundur Sigurbergsson var kosinn formaður UMSK, en hann tekur við af Valdimar Leo Friðrikssyni sem verið hefur formaður síðustu tuttugu ár.

Á þinginu var kosin ný stjórn fyrir UMSK. Í nýrri stjórn eru eftirfarandi: Guðmundur Sigurbergsson formaður. Í aðalstjórn: Pétur Örn Magnússon, Þorsteinn Þorbergsson, Lárus B. Lárusson og Halla Garðarsdóttir. Í varastjórn: Geirarður Long, Rakel Másdóttir og Margrét Dögg Halldórsdóttir.

Á þinginu voru Valdimar Leó og Magnús Gíslason, sem gengu báðir úr stjórn UMSK, sæmdir gullmerki UMSK fyrir störf sín.

Arnar Pétursson og Karen Sif Ársælsdóttir, bæði úr frjálsíþróttum, voru valin íþróttakarl og íþróttakona UMSK 2020 og fengu þau viðurkenningar sínar á þinginu.

Hvatningaverðlaun UMSK voru veitt á þinginu í fyrsta skipti. Stjórn UMSK var sammála um að veita klappstýruliði Stál-Úlfs verðlaunin í ár fyrir nýja og skemmtilega viðbót við keppnishald félagsins.

Meistarflokkur kvenna í knattspyrnu hjá Breiðablik var valinn Lið ársins en liðið vann Íslandsmeistaratitilinn á árinu 2020.

Lárus Blöndal, forseti ÍSÍ, sótti þingið fyrir hönd ÍSÍ.

Halda áfram að lesa

Vinsælast

Allur réttur áskilin © 2021 Tíðin