Samherji

Loksins, loksins, geta starfsmannafélögin efnt til viðburða

Loksins, loksins, geta starfsmannafélögin efnt til viðburða

“Já, já, svo að segja öll starfsemi hefur legið niðri hjá okkur síðan heimsfaraldurinn skall á af fullum þunga, þannig að það er mikil tilhlökkun hjá okkur að koma saman á nýjan leik, maður finnur það greinilega á fólki,” segir Ragnheiður Rut Friðgeirsdóttir formaður Fjörfisks, sem er starfsmannafélag Samherja á Dalvík.

“Í lok september ætum við að fara í Skagafjörðinn og í byrjun október verður heljarinnar villibráðakvöld og skráningin er afskaplega góð, sem undirstrikar hversu langþráð það er að hittast á nýjan leik og hafa gaman saman. Öflugt starfsmannafélag er nauðsynlegt, það sem við gerum saman eflir starfsandann og gerir lífið skemmtilegra og innihaldsríkara. Samherji styður okkur dyggilega í öllu sem við gerum og núna sjáum við loksins fram á að geta skemmt okkur saman,” segir Ragnheiður Rut.

Tilhlökkun greinileg

Sama er uppi á teningnum hjá Starfsmannafélagi ÚA á Akureyri, STÚA, þar er farið að skipuleggja líflega dagskrá vetrarins. Óskar Ægir Benediktsson formaður segir að vegna heimsfaraldursins hafi starfsemin legið í dvala, rétt eins og hjá öllum öðrum sambærilegum félögum.

“Við náðum að halda aðalfund í mars og fara saman út að borða í febrúar í fyrra. Að öðru leyti má segja að félagsstarf hafi legið niðri í nærri tvö ár en sem betur fer sjáum við fram á jákvæðar breytingar.”

Óskar Ægir segir að félagsmenn tali eðlilega um afleiðingar heimsfaraldursins á félagsstarfið og hann segir tilhlökkun greinilega í loftinu.

“Já, klárlega. Við erum að undirbúa hópferð austur á Hérað, gistum á Hótel Hallormsstað og höldum þar veislu fyrir hópinn. Þá erum við farin að huga að litlu jólunum og sjálfsagt gerum við eitthvað fleira skemmtilegt í haust. Það er svo greinilegt að fólk þráir að koma saman og þegar farið var að slaka á sóttvarnarreglum varð strax léttara yfir öllum.

Loksins, loksins, eru starfsmannafélögin að lifna við eftir langan dvala og ég er nokkuð viss um að þátttakan í viðburðum verður góð í vetur,” segir Óskar Ægir formaður Starfsmannafélags ÚA.

Samherji

Samherji stækkar landeldisstöðina í Öxarfirði

Tölvugerð mynd af laxeldisstöðinni eftir stækkun

Tölvugerð mynd af laxeldisstöðinni eftir stækkun

Stjórn Samherja fiskeldis hefur ákveðið að stækka landeldisstöð félagsins í Öxarfirði um helming, þannig að framleiðslan verði um þrjú þúsund tonn af laxi á ári. Áætlaður kostnaður er um einn og hálfur milljarður króna. Framkvæmdastjóri Samherja fiskeldis segir miðað við að framkvæmdum verði lokið eftir um það bil eitt ár. Sem hluti af hringrásarhagkerfi eldisins, bættri nýtingu og kolefnisjöfnun er landgræðsla og síðar skógrækt áformuð á nærliggjandi jörð, sem Samherji hefur keypt vegna stækkunarinnar.

Samherji fiskeldi hefur í nokkurn tíma kannað möguleika á að stækka landeldisstöðina í Öxarfirði. Jón Kjartan Jónsson framkvæmdastjóri Samherja fiskeldis segir að framkvæmdir hefjist á næstunni, fyrst þurfi að ljúka vinnu við skipulagsmál á svæðinu sem er á lokastigi.

Silfurstjarnan fyrir stækkun

Fimm sinnum stærri ker

„Þetta er nokkuð umfangsmikið verkefni. Kerin sem við byggjum verða alls fimm vegna stækkunarinnar, um helmingi stærri að umfangi en stærstu ker sem fyrir eru. Þá þarf að auka sjótöku, byggja hreinsimannvirki, stoðkerfi og koma fyrir ýmsum tækjabúnaði. Undirbúningsvinnu er nú að mestu lokið, leyfin eru að klárast og næst er að hefjast handa,“ segir Jón Kjartan.

Undanfari landeldis á Reykjanesi

Samherji hefur keypt lóðina þar sem núverandi starfsemi fer fram og einnig jörðina Akursel, sem er vestan við stöðina. Jón segir að þar verði, auk sjótöku, nýttur áburður frá stöðinni til landgræðslu og síðar skógræktar.

„Samherji áformar að byggja upp allt að 40.000 tonna landeldi á laxi á Reykjanesi á næstu árum og þessi stækkun í Öxarfirði tengist þeim áformum. Það má segja að stækkunin fyrir norðan sé á vissan hátt undanfari þessa stóra verkefnis okkar á Reykjanesi. Við ætlum að prófa nýja hluti og í stærri einingum en áður og nýta þá reynslu við hönnun og rekstur á nýju stöðinni.“

Öxarfjörður hentugur staður

Jón Kjartan segir að stækkunin í Öxarfirði komi nærsamfélaginu til góða á ýmsan hátt.

„Já, klárlega. Með helmingi stærri stöð eykst umfangið að sama skapi. Störfum fjölgar, aðflutningar til og frá stöðinni munu aukast og þörf á aðkeyptri þjónustu til rekstrarins verður meiri. Þetta eflir samfélagið og undirstrikar jafnframt trú okkar á landeldi og að Öxarfjörðurinn sé hentugur staður fyrir slíka atvinnustarfsemi.“

Halda áfram að lesa

Samherji

Helga Steinunn Guðmundsdóttir heiðursfélagi Íþrótta- og Ólympíusambands Íslands

Helga Steinunn Guðmundsdóttir

Helga Steinunn Guðmundsdóttir

Helga Steinunn Guðmundsdóttir var um helgina gerð að heiðursfélaga Íþrótta- og Ólympíusambands Ísland en Helga hefur unnið ómetanlegt starf í þágu íþrótta á Íslandi. Frá þessu er greint á heimasíðum ÍSÍ og Knattspyrnufélags Akureyrar. Helga Steinunn situr í stjórn Samherja og er stjórnarformaður Samherjasjóðsins sem hefur stutt íþróttahreyfinguna dyggilega.

Nafnbótin Heiðursfélagi ÍSÍ er æðsta viðurkenning íþróttahreyfingarinnar og þeir sem geta hlotið þá nafnbót eru þeir sem hafa þegar hlotið Heiðurskross ÍSÍ, æðstu heiðursviðurkenningu ÍSÍ. Helga Steinunn sat í stjórn ÍSÍ frá árinu 2006 til ársins 2017 og var varaforseti sambandsins 2013 til 2017.

Margvígslegar viðurkenningar

„Helga var sæmd Heiðurskrossi ÍSÍ árið 2017 og Gullmerki ÍSÍ árið 2003 en hún gegndi til að mynda starfi formanns Skipulagsnefndar Smáþjóðaleikanna 2015 og vinnuhóps ÍSÍ um ferðasjóð íþróttafélaga frá upphafi sjóðsins.
Þá hefur Helga Steinunn unnið gríðarlega mikið og gott starf fyrir KA en hún var formaður félagsins frá árinu 1998 til ársins 2005. Einnig hefur hún setið í stjórn knattspyrnudeildar KA til viðbótar við öll þau önnur störf sem hún hefur komið að innan félagsins. Helga var gerð að heiðursfélaga KA árið 2008 og var sæmd gullmerki KA árið 2005,“ segir á heimasíðu KA.

Samherji óskar Helgu Steinunni hjartanlega til hamingju með sæmdarheitið.

Halda áfram að lesa

Samherji

Sjávarútvegsfræðingar áberandi hjá Samherja

Sjávarútvegsfræðingar áberandi hjá Samherja

Tveir nýir stjórnendur, sem eiga það sameiginlegt að vera sjávarútvegsfræðingar frá Háskólanum á Akureyri, hafa verið verið ráðnir til Samherja fiskeldis í Sandgerði. Með þessum ráðningum eru sjávarútvegsfræðingarnir sem starfa hjá Samherja samtals tuttugu og fjórir, enda leitast Samherji við að ráða til sín og hafa í sínum hópi einvalalið starfsmanna. 

Rekstrarstjóri

Halldór Pétur Ásbjörnsson hefur verið ráðinn rekstrarstjóri vinnslu Samherja í Sandgerði. Halldór Pétur lauk M.Sc. í auðlindafræðum árið 2011, sjávarútvegsfræði árið 2009 frá Háskólanum á Akureyri og fiskeldisfræðum frá Háskólanum á Hólum 2006. Hann hefur starfað sem verk- og verkefnastjóri í fiskiðjuveri Brims í Reykjavík í tíu ár. 

Gæðastjóri

Sunneva Ósk Þóroddsdóttir hefur verið ráðin gæðastjóri í vinnslu Samherja í Sandgerði. Sunneva Ósk er sjávarútvegs- og viðskiptafræðingur frá Háskólanum á Akureyri og hefur starfað í sjávarútvegi frá fjórtán ára aldri. Meðfram námi starfaði hún hjá Arion banka. Sunneva Ósk er Sandgerðingur, þannig að hún mun starfa í heimabyggð.

Einstakt nám

Nám í sjávarútvegsfræðum við Háskólann á Akureyri er fjölbreytt og krefjandi, segir á heimasíðu skólans. Sjávarútvegsfræðingar eru eftirsóttir til starfa, enda miðast námið við að nemendur takist á við fjölbreytt verkefni að námi loknu.

Segja má að námið sé einstakt í íslenskri námsflóru og veiti góðan grunn til stjórnunarstarfa í öllum greinum sjávarútvegsins, jafnt í sjávarútvegi sem og öðrum greinum atvinnulífsins. 

Nemendur í sjávarútvegsfræði við Háskólann á Akureyri geta einnig fengið gráðu í viðskiptafræði og bæta þá við einu ári í námi, samkvæmt heimasíðu skólans.

Samherji býður þessa nýju starfsmenn velkoma til starfa.

Halda áfram að lesa

Vinsælast

Allur réttur áskilin © 2021 Tíðin