Íþrótta og ólympíu samband Íslands

„Mér fannst virkilega gaman að koma inn til ÍSÍ og fá að kynnast starfseminni sem þar fer fram”

13.05.2022

Tveir nemar úr íþróttafræði í Háskólanum í Reykjavík þau Karólína Jack og Ketill Helgason hafa verið í vettvangsnámi hjá ÍSÍ undanfarnar þrjár vikur. Þau unnu fjölbreytt verkefni og fengu kynningu á starfsemi ÍSÍ og sambandsaðilum ÍSÍ.  

Að verknáminu loknu horfðu þau Karólína og Ketill um öxl og höfðu þetta að segja um dvöl sína hjá ÍSÍ:

Ketill: Ég fann fyrir góðum starfsanda á vinnustaðnum og hversu samheldinn hópurinn er sem er að vinna hjá ÍSÍ. Starfsfólkið er alltaf til í að ræða málin og svara öllum spurningum sem ég hafði um starfsemina.

Karólína: „Mér fannst virkilega gaman að koma inn til ÍSÍ og fá að kynnast starfseminni sem þar fer fram. Það tóku allir virkilega vel á móti okkur og voru til í að miðla sinni reynslu til okkar og segja okkur í hverju sitt starf felst. Það er mikið af reynslumiklu fólki á skrifstofunni sem við vorum svo heppin að fá að læra af.”

Ketill: „Það kom mér á óvart að einungis 15 manns séu að vinna í svo mörgum, stórum verkefnum og sinna öllu því sem að ÍSÍ á að gera. Þetta er ekki nútímalegasta skrifstofuhúsnæðið og það er þröngt á þingi. Það kom mér líka á óvart hversu opin skrifstofan er í raun og veru, alltaf vel tekið á móti fólki sem leitar þangað. Það sem stendur upp úr hjá mér eftir þessar þrjár vikur er að ég er mun nær því að skilja hvernig ÍSÍ starfar, t.d. með íþróttahéruðum og sérsamböndum. Annað sem stendur upp úr og mér þykir áhugavert er að mikill munur er á hvernig sérsambönd og íþróttahéruð eru rekin og hvernig samstarfi þeirra við ÍSÍ er háttað. Ég mundi vilja kynnast þessari ólíku starfsemi betur.”

Karólína: „Það kom mér á óvart hve fáir starfa hjá ÍSÍ miðað við hve mikilvæg vinna fer hér fram. Starfsmenn ÍSÍ eru að sinna mjög mörgum verkefnum og þyrfti að mínu mati að fá inn fleira starfsfólk til að íþróttahreyfingin yrði ennþá öflugri. Það kom mér einnig á óvart hvað starfsfólkið er með fjölbreytta menntun. Eftir þessar þrjár vikur þá standa samskipti við starfsfólkið og aðra helst upp úr og mér fannst ég hreinlega læra mest á því að tala við fólk og spyrja spurninga. Svo fannst mér áberandi hvað starfsandinn á skrifstofunni er góður og hve velkomin mér fannst ég vera allan tímann.”

Starfsfólk ÍSÍ þakkar þeim Karólínu og Katli fyrir góð kynni, áhugasemi og flott starf í verknáminu og óskar þeim alls góðs í framtíðinni. 

Íþrótta og ólympíu samband Íslands

Ársþing DSÍ

23.05.2022

Ársþing Dansíþróttasambands Íslands (DSÍ) 2022 var haldið þann 18. maí sl. í Íþróttamiðstöðinni í Laugardal. Valdimar Leó Friðriksson úr framkvæmdastjórn ÍSÍ var þingforseti og Andri Stefánsson framkvæmdastjóri ÍSÍ ávarpaði þingið.

Atli Már Sigurðsson var kjörinn nýr formaður DSÍ til  eins árs og tekur við af Bergrúnu Stefánsdóttur sem hefur verið formaður sambandsins síðastliðin þrjú ár.

Aðalmenn í stjórn sem kjörnir voru til tveggja ára voru Kara Arngrímsdóttir og Helga Björg Gísladóttir.
Aðalmenn í stjórn sem fyrir voru til eins árs voru Ólafur Már Hreinsson og Magnús Ingólfsson.
Varamenn sem kjörnir voru til eins árs voru Jóhann Gunnar Arnarsson og Ragnar Sverrisson.

Veittar voru heiðranir þeim Örvari Möller og Kjartani Birgissyni fyrir óeigingjarnt starf í þágu dansíþróttarinnar.

Halda áfram að lesa

Íþrótta og ólympíu samband Íslands

Fyrirlestur um anabólíska stera

22.05.2022

Mánudaginn 23. maí mun Ingunn Hullstein, annar af forstöðumönnum vísinda á norsku WADA-rannsóknarstofunni í Osló, halda fyrirlestur undir yfirskriftinni: Anabólískir sterar. Fyrirlesturinn fer fram í húsakynnum ÍSÍ, Engjavegi 6 í Laugardal (D-sal – 3. hæð) og hefst kl 17:00. Áætluð lengd er u.þ.b. 30 mínútur.

Ingunn er einnig yfirmaður NAPMU (Nordic Athlete Passport Management Unit) sem sjá um svokölluð „vegabréf íþróttamanna. Tilgangur „vegabréfs íþróttamannsins“, Athlete Biological Passport (ABP), er að fylgjast með ákveðnum líffræðilegum breytum hjá íþróttafólki sem gætu bent til eða staðfest lyfjamisferli. Lyfjaeftirlit um allan heim notast við ABP til þess að betur tímasetja lyfjapróf og „target testa“ íþróttafólk.

Fyrirlesturinn verður á mannamáli og er sniðinn að þeim aðilum sem hafa á einhvern hátt, beint eða óbeint, með lyfjamál og/eða fræðslumál að gera hjá sérsamböndum/nefndum innan ÍSÍ sem og íþróttafólki. Að sjálfsögðu eru auk þess allir velkomnir sem hafa áhuga á.

Halda áfram að lesa

Íþrótta og ólympíu samband Íslands

Samstarfssamningur ÍF og KRAFT

20.05.2022

Íþróttasamband fatlaðra (ÍF) og Kraftlyftingasamband Íslands (KRAFT) hafa gert með sér samstarfssamning. Gott samstarf hefur verið milli sambandanna um nokkurra ára skeið, en með samningnum er samstarfið formgert og er það von beggja að samningurinn muni auka enn á fagmennsku við æfingar, keppni og mótahald og um leið bæta aðstöðu fatlaðra til að iðka kraftlyftingar.

Kraftlyftingar er kjörin íþrótt fyrir alla, ekki síst íþróttamenn sem búa við fötlun. Þegar frá líður er vonin að fatlaðir kraftlyftingamenn og -konur geti tekið þátt á mótum KRAFT innanlands og IPC og IPF á alþjóðavettvangi, til viðbótar við mót ÍF. Sett verður á laggirnar samstarfsnefnd sem skipuleggur framþróun samstarfs sambandanna framvegis.

Þeir sem vilja vita meira um málið geta leitað upplýsinga hjá ÍF og KRAFT. Nýja samninginn undirrituðu þeir Jóhann Arnarson varaformaður ÍF og Hinrik Pálsson varaformaður KRAFT í tengslum við Íslandsmót ÍF í kraftlyftingum fór fram í CrossFit á Selfossi.

Halda áfram að lesa

Vinsælast

Allur réttur áskilin © Tíðin