Íþrótta og ólympíu samband Íslands

Metþátttaka í Lífshlaupinu – Skráning enn í gangi

11.02.2021
Lífshlaupið 2021 hófst þann 3. febrúar sl. Nú þegar hafa yfir 19.000 þátttakendur skráð sig til leiks og það stefnir í hörku skemmtilega keppni. Stöðuna í vinnustaðakeppninni má finna hér en það er vert að minna á það að til þess að ganga sem best í vinnustaðakeppninni þarf að virkja sem flesta á vinnustaðnum til að hreyfa sig í að lágmarki 30 mínútur á dag á meðan á Lífshlaupinu stendur. Ef þú ert ekki þegar búinn að skrá þig til leiks í Lífshlaupið 2021 er það ekki of seint. Það er hægt að skrá sig til leiks hér og það er hægt að skrá sína hreyfingu frá 3. febrúar.

Ef þú vilt rifja upp meira um Lífshlaupið getur þú lesið allt um Lífshlaupið hér á vefsíðu Lífshlaupsins.
 
Nú er orðið ennþá einfaldara að skrá hreyfingu sína á meðan á Lífshlaupinu stendur því útbúið hefur verið smáforrit Lífshlaupsins. Í smáforritinu er hægt að skrá og sjá alla hreyfingu viku aftur í tímann. Þar er einnig hægt að lesa hreyfingu beint úr Strava. Það er þó rétt að benda á að það þarf að fara á vefsíðu Lífshlaupsins til þess að stofna aðgang og til þess að stofna lið/ganga í lið, en eftir að það er búið er hægt að skrá sig inn í gegnum smáforritið og skrá alla hreyfingu þar. Smáforritið finnst bæði í App Store (iOS) og í Play Store (Android) undir heitinu „Lífshlaupið“.
 
Á meðan Lífshlaupinu stendur eru bæði úrdráttarverðlaun alla virka daga sem og myndaleikur á samfélagsmiðlum og eru veglegir vinningar í boði. Hér á facebook síðu Lífshlaupsins má fylgjast með gangi mála.

Íþrótta og ólympíu samband Íslands

TOKYO 2020 – 100 dagar til stefnu

14.04.2021

Í dag eru 100 dagar þangað til Ólympíuleikarnir í Tókýó verða settir.
Ólympíustöðin (Olympic Channel) hefur af því tilefni gefið út handteiknaða teiknimyndaþætti sem bera nafnið Hetjur eða Heroes.
Í þessum þáttum er fjallað um upphaf Ólympíuleikanna til forna í gegnum hetjur leikanna, allt frá Leonidas til Kyniska. Um er að ræða fimm þætti sem fjalla um bestu keppendurna til forna og þeirra sögu.  
Hægt er að horfa á þættina hér:  Heroes – Watch the Ancient Olympic Games Come to Life (olympicchannel.com)

Á Ólympíustöðinni er auk þess að finna fjölbreytt efni um íþróttir, allt frá beinum útsendingum frá viðburðum til heimildaþátta sem tengjast íþróttastarfi og þá sérstaklega Ólympíuleikunum.

Watch Live Sports Events & Latest News | Olympic Channel

 

Halda áfram að lesa

Íþrótta og ólympíu samband Íslands

Verulegar tilslakanir á íþróttastarfi á ný!

14.04.2021

Heilbrigðisráðherra hefur nú gefið út nýja reglugerð sem tekur gildi 15. apríl og gildir til 5. maí nk.
Með henni eru gerðar verulegar tilslakanir á íþróttastarfi á ný og verður aftur opnað fyrir starfsemi sundstaða og líkamsræktarstöðva, að uppfylltum ákveðnum skilyrðum.  
Helstu breytingar í reglugerð heilbrigðisráðherra sem snerta íþróttastarfið eru eftirfarandi:

• Íþróttaæfingar og -keppnir barna og fullorðinna verða heimilar og hámarksfjöldi þátttakenda miðast við 50 manns í rými. Heimilt verður að hafa allt að 100 áhorfendur á íþróttaviðburðum, að uppfylltum ákveðnum skilyrðum sem lúta að skráningu, eins meters nándarmörkum á milli ótengdra aðila og grímuskyldu. Einungis er heimilt að hafa tvö sótthólf fyrir að hámarki 100 áhorfendur í hvoru hólfi, á íþróttaviðburðum.

• Sund- og baðstaðir mega opna fyrir 50% af leyfilegum hámarksfjölda gesta. Börn fædd 2015 eða síðar telja ekki með í hámarksfjölda.

• Líkamsræktarstöðvar mega opna að uppfylltum ákveðnum skilyrðum, m.a. um sótthreinsun, skráningu í tíma, hólfun og 20 manna hámarksfjölda.

• Skíðasvæði mega opna fyrir 50% af hámarksfjölda gesta en þar verður að gæta að tveggja metra lágmarksfjarlægð og nota grímur sé ekki hægt að tryggja hana.

• Opinberir staðir mega taka á móti gestum, en hámarksfjöldi í rými er 20. Gæta þarf að tveggja metra lágmarksfjarlægð og nota grímur sé ekki hægt að tryggja hana.

Lárus Blöndal, forseti ÍSÍ: „Íþróttahreyfingunni er mjög létt við þessar tilslakanir enda öllum mikið í mun að koma íþróttastarfinu aftur af stað af fullum krafti. Það var afar erfitt að fá þetta bakslag í starfið þegar allt var komið á fullt eftir erfiðan fyrri part veturs en nú erum við vonandi komin fyrir vind. Maður leyfir sér að vera bjartsýnn á framhaldið þó að kórónuveiran sé ólíkindatól. Það hefur verið unnið baki brotnu undanfarnar vikur að úrlausnum, af hálfu yfirvalda og forystu íþróttahreyfingarinnar og við erum afskaplega ánægð með að fá þessar tilslakanir varðandi íþróttirnar. Við erum þakklát mennta- og menningarmálaráðherra fyrir aðkomu hennar að þessum lausnum og samstarfið við hreyfinguna. Það er ekki nema vika í sumardaginn fyrsta og varla hægt að hugsa sé betri sumargjöf en að hefja aftur æfingar og keppni í íþróttum í landinu.“ 

Sjá frétt á vef heilbrigðisráðuneytis.

Ný reglugerð heilbrigðisráðherra, sem gildir til 5. maí 2021.

Halda áfram að lesa

Íþrótta og ólympíu samband Íslands

Boðaðar tilslakanir varðandi íþróttastarf

13.04.2021

Það stefnir í bjartari tíma varðandi íþróttastarfið í landinu, samkvæmt frétt frá heilbrigðisráðuneytinu, sjá hér:

Í fréttinni er að finna minnisblað frá sóttvarnalækni þar sem fram kemur m.a.:

Íþróttir barna og fullorðinna

a.  Íþróttaæfingar barna og fullorðinna með eða án snertinga í íþróttum innan sem utan ÍSÍ verði heimilar. Hámarksfjöldi fullorðinna í hverju hólfi verði 50 manns. Sameiginleg búningsaðstaða verði opnuð. Gæta skal að því að búningsaðstaða sé þrifin og snertifletir sótthreinsaðir milli hópa. Sameiginleg áhöld verði sótthreinsuð eftir notkun og þess gætt að loftræsting sé í lagi og loftað vel út nokkrum sinnum yfir daginn.

b.  Íþrótta- og Ólympíusamband Íslands setur sérsamböndum reglur um sóttvarnir og um framkvæmd æfinga og keppna í sínum greinum í samvinnu við sóttvarnalækni. Í íþróttum sem ekki tilheyra Íþrótta- og ólympíusambandi  Íslands skal setja leiðbeiningar eða fylgja sömu leiðbeiningum og sambærilegar íþróttir innan sambandsins.

c.  Um hámarksfjölda barna á íþróttaæfingum gilda sömu fjöldatakmarkanir og í skólastarfi.

d.  Íþróttakeppni barna og fullorðinna verði heimilar án áhorfenda. Hámarksfjöldi í hólfi hjá börnum og fullorðnum verði 50 manns.

e.  Skíðasvæði megi opna fyrir 50% af hámarksfjölda gesta. Gætt verði að tveggja metra nándarreglu og grímuskylda verði ef verði ef ekki verði hægt að tryggja nándarreglu. Um veitingarekstur á skíðasvæðum gildi sömu reglur og um veitingasölu almennt.

Núgildandi reglugerð gildir til 16. apríl n.k. þannig að ofangreindar tilslakanir taka ekki gildi fyrr en við setningu nýrrar reglugerðar ráðherra.

Höldum í bjartsýnina, virðum sóttvarnir og stöndum vaktina, eftir sem áður.

Halda áfram að lesa

Vinsælast

Allur réttur áskilin © 2021 Tíðin