Stjórnarráðið

Mikilvægt að hlusta á ungt fólk í umræðum um loftslagsmál

Sigurður Ingi Jóhannsson, samgöngu- og sveitarstjórnarráðherra og samstarfsráðherra Norðurlandanna, tók þátt í málþingi um loftslagsmál í gær með ungu fólki á norrænum loftslagsaðgerðadögum í Stokkhólmi, sem haldnir verða dagana 2.-13. desember samhliða loftslagsráðstefnu Sameinuðu þjóðanna (COP 25) í Madrid. Markmiðið með viðburðunum er að veita eins konar sýndarbakdyr að COP25 og fylgjast með viðræðum í Madrid.

Tilgangurinn með málþinginu í gær var að eiga samtal við ungt fólk á Norðurlöndum um þær væntingar sem þau hafa til stjórnmálafólks í loftslagsmálum og til COP25. Fulltrúar stjórnmálanna voru, auk Sigurðar Inga, Isabella Lövin, ráðherra umhverfis- og loftslagsmála í Svíþjóð og Marjo Nummelin, loftslagssérfræðingur í Finnlandi. Sú síðarnefnda var stödd í Madrid ásamt ungmennum frá Nepal og Ungverjalandi sem tóku virkan þátt í umræðum í beinni útsendingu frá COP25. Ungmennin hafa öll tekið virkan þátt í vinnu í þágu loftslagsmála í heimalöndum sínu og þau lögðu fram sínar óskir við ráðherrana um að vinna að framtíðarlausnum á loftslagsvandanum.

Rætt var um mikilvægi þess að hraða lausnum sem draga úr losun eins og orkuskiptum í samgöngum og mælingum á kolefnisspori sem gæti aukið gagnsæi á vörum og þjónustu svo dæmi séu tekin.

Í máli Sigurðar Inga kom fram að lausnir þurfi að miða að sjálfbærni. „Loftslagsmálin verða ekki leyst nema með samvinnu allra, þar sem allir leggjast á eitt með það að markmiði að draga úr losun og binda kolefni. Þetta snýst ekki einungis um tækni, heldur um breytta hegðun í okkar fari, stjórnvalda, sveitarfélaga, fyrirtækja og einstaklinga. Framtíðarsýn Norðurlandanna er að vera sjálfbærasta og samþættasta svæði heims. Til að ná árangri verða allir að vera með. Þessa vegna er mikilvægt að rödd unga fólksins heyrist.“

Halda áfram að lesa

Innlent

Ráðherra undirritar Bratislava yfirlýsingu

Guðmundur Ingi Guðbrandsson, umhverfis- og auðlindaráðherra, undirritaði í dag s.kBratislava yfirlýsingu er hann tók þátt í fundi Forest Europe, en fjöldi ráðherra skógarmála í Evrópu sátu fundinn. Forest Europe er samstarf ráðherra á því sviði í álfunni sem hefur það markmið að efla og samhæfa, vernd, ræktun og nýtingu skóga í Evrópu.

Bratislava yfirlýsingin sem ráðherrarnir undirrituðu felur meðal annars í sér að stefnt er að því að stöðva eyðingu líffræðilegrar fjölbreytni í skógum, endurheimt skóga og að hlutverk skóga í jarðvegsvernd sé að fullu viðurkennt. Jafnframt felur hún í sér staðfestingu á  að skógar leiki stórt hlutverk við að sjálfbærni nái fram að ganga þ.á.m. í baráttunni gegn loftslagsbreytingum. Einnig er viðurkennt að hagaðilar hafi mikilvægu hlutverki að gegna í leiðinni að sjálfbærni sem og mikilvægi rannsókna í skógrækt og kynning á vísindalegri þekkingu.

Með undirritun sinni staðfestu ráðherrarnir einnig áframhaldandi vinnu og samstarf um þætti skógræktar á borð við gerð landsáætlana fyrir skógrækt, aðlögun skóga að loftslagsmálum og stuðning við hringrásarhagkerfið.

„Með þessari yfirlýsingu erum við að efla samstarf í Evrópu á sviði skóga, skógverndar, endurheimtar skóga og nýskógræktar. Þetta er mikilvægur liður í að styðja við stefnu um náttúrumiðaðar lausnir í loftslagsmálum þar sem á sama tíma er horft til loftslagsmála, endurheimtar líffræðilegrar fjölbreytni og að sporna gegn landeyðingu með samhæfingu þessara stóru umhverfismála að leiðarljósi, en ég hef lagt ríka áherslu á þessa nálgun í ráðherratíð minni. Það var jafnframt ánægjulegt að heyra hversu víða hefur komið í ljós síðasta árið hvað skógar sem útivistarsvæði geta haft jákvæð áhrif á heilsu og lífsgæði fólks,“ sagði Guðmundur Ingi Guðbrandsson, umhverfis- og auðlindaráðherra.

Halda áfram að lesa

Innlent

Öll þingmál heilbrigðisráðherra komin til nefndar

Hafa samband

Ábending / fyrirspurn