Íþrótta og ólympíu samband Íslands

Ólympíudeginum fagnað í Hveragerði

24.06.2021

Á hverju ári er haldið upp á Alþjóða Ólympíudaginn þann 23. júní út um allan heim í tilefni af stofnun Alþjóðaólympíunefndarinnar (IOC) 23. júní 1894. Íþrótta- og Ólympíusamband Íslands (ÍSÍ) fagnaði Ólympíudeginum 2021 í gær ásamt alþjóðaólympíuhreyfingunni og íþrótta- og Ólympíusamböndum um heim allan.

Ólympíudagurinn á Íslandi var haldinn hátíðlegur í Lystigarðinum í Hveragerði í gær í samstarfi við Héraðssambandið Skarphéðinn og Hveragerðisbæ. Föruneyti ÍSÍ lagði snemma af stað ásamt Valdimari Gunnarssyni framkvæmdastjóra Ungmennasambands Kjalarnesþings (UMSK) sem lánaði ÍSÍ kerru fulla af ýmsu skemmtilegu dóti til íþróttaiðkunar. Í Lystigarðinum tóku þau Guðríður Aadnegard formaður HSK og Engilbert Olgeirsson framkvæmdastjóri á móti hópnum en þau voru ÍSÍ innan handar með skipulag og framkvæmd dagsins. Einnig heilsaði bæjarstóri Hvergerðinga Aldís Hafsteinsdóttir upp á mannskapinn. 

Á Ólympíudeginum er kjörið að spreyta sig á ýmiss konar íþróttum og þrautum, en ekki einungis íþróttum sem keppt er í á Ólympíuleikum. Í Lystigarðinum voru settar upp fjórar ólíkar stöðvar; skotfimi, ringó, krossbolti/fótbolti og æfing sirkusatriða. Um 40 unglingar Vinnuskólans mættu á svæðið, skipt var í hópa og fjörið hófst. Unglingarnir tóku virkan þátt og voru áhugasamir um að læra nýjar, skemmtilegar íþróttir. Veðrið var gott og sól skein í heiði. Mikla lukku vakti fimleikameistarinn Jón Sigurður Gunnarsson, en hann bauð unglingunum upp á að læra sirkusatriði eins og að djöggla með keilum og boltum, snúa diskum á spýtu o.fl., en einnig er óhætt að segja að skotfimin hafi vakið mikinn áhuga unglinganna.  Í lokin var grillað og fóru því sáttir unglingarnir aftur í vinnuna eftir skemmtilegan morgunn.

Eftir hádegi mætti yngri kynslóðin í garðinn.  Hópurinn taldi um 60 krakka á aldrinum 5-10 ára sem flest voru á leikjanámskeiðum í bænum. Krökkunum var skipt á fjórar ólíkar stöðvar sem flestar byggðust á leikjum en svo var ein sirkusstöð. Eftir að krakkarnir höfðu farið á allar stöðvar mætti Blossi á svæðið og dansaði með krökkunum, en hann vekur alltaf lukku. Í lokin fengu allir íspinna í boði Kjöríss.

Allur dagurinn var tekinn upp og sýndur í Story á Instagram aðgangi ÍSÍ (@isiiceland)

Á morgun föstudag verður Elísa Viðarsdóttir næringar- og matvælafræðingur og landsliðskona í knattspyrnu með hádegisfyrirlestur í E-sal Íþróttamiðstöðvarinnar í tilefni af Ólympíudeginum. Sýnt verður beint frá fyrirlestrinum á fésbókarsíðu ÍSÍ.

Myndir frá Ólympíudeginum í Hveragerði má sjá hér.

Íþrótta og ólympíu samband Íslands

Tókýó 2020 – Snæfríður Sól keppti í dag

28.07.2021

Snæfríður Sól keppti í 100 metra skriðsundi í undanrásum á Ólympíuleikunum í dag. Hún synti sundið af miklum krafti, sérstaklega seinustu 50 metrana, þar sem hún vann sig upp í 4. sætið upp úr því seinasta. Það nægði samt ekki til að koma henni áfram. Þrátt fyrir það þá bætti hún sitt persónulega met í dag, náði 56,15 sek. en fyrra persónulega met hennar var 56,32, þannig að bætingin var 17/100 úr sekúndu. Snæfríður Sól endaði í 34. Sæti af 52 keppendum. Til að komast upp úr riðlinum og vera þá á meðal 16 vestu hefði hún þurft að synda á 53,70 sek.

Íslenska sundfólkið okkar hefur þá lokið keppni á Ólympíuleikunum í Tókýó og munu öll halda heim á leið á föstudaginn.

Halda áfram að lesa

Íþrótta og ólympíu samband Íslands

Tókýó 2020 – Anton Sveinn Mckee keppti í dag

27.07.2021

Anton Sveinn McKee synti í undanrásum 200 metra bringusunds á Ólympíuleikunum í dag.

Þrátt fyrir að vera annar í mark í sínum riðli, á 2:11,64 eftir æsispennandi sund, þá var það ekki nóg til að komast áfram í undanúrslit. Hann hafnaði í 24. sæti af 40, en 16 efstu komust áfram. Anton Sveinn hefði þurft að ná tímanum 2:09,95 til að komast áfram. Íslandsmet Antons frá 2015 er 2:10,21, þannig að hann var nokkuð frá sínum besta tíma, þó að vissulega hafi sundið gengið nokkuð snurðulaust fyrir sig.

Anton Sveinn er skiljanlega vonsvikinn með niðurstöðuna en lætur engan bilbug á sér finna og sagði meðal annars í viðtali við RÚV, aðspurður um framhaldið:

„Þetta er alla veganna það skemmtilegasta sem ég geri, þótt það sé hundleiðinlegt að ganga illa.”

Það verður áhugavert að sjá hvað hann gerir næst, við fylgjumst spennt með.

Halda áfram að lesa

Íþrótta og ólympíu samband Íslands

Snæfríður Sól bætti eigið met í Tókýó

26.07.2021

Snæfríður Sól Jór­unn­ar­dótt­ir sló sitt eigið Íslands­met í 200 metra skriðsundi í morgun með frumraun sinni á Ólympíuleikum. Hún synti á 2:00,20 mín­út­um en fyrra Íslands­met henn­ar í grein­inni var 2:00,50 mín­út­ur. Það nægði samt ekki til að tryggja henni sæti í undanúrslitum en hún endaði í 22. sæti af 30 keppendum í undanrásum, 16 efstu komust áfram. Snæfríður Sól hefði þurft að ná 1:58,33 til að komast í undanúrslitin.

Engu að síður er þetta stórglæsilegur árangur hjá henni og magnað að ná að bæta sitt eigið met á svona stóru móti.

Næst keppir Snæfríður Sól í undanrásum 100 metra skriðsunds á miðvikudag.  Bein útsending hefst klukkan 10 á RÚV.

Halda áfram að lesa

Vinsælast

Allur réttur áskilin © 2021 Tíðin