Innlent

Ráðherravika allsherjarþingsins stendur sem hæst

77. allsherjarþing Sameinuðu þjóðanna stendur nú yfir í New York þar sem leiðtogar aðildarríkjanna 193 koma saman. Í tengslum við þingið hefur Þórdís Kolbrún Reykfjörð Gylfadóttir hitt utanríkisráðherra fjölmargra ríkja bæði nær og fjær og tekið þátt í tengdum viðburðum.

„Það er ómetanlegt að ná að hitta hér á einum stað fulltrúa frá öllum heims hornum og ræða hvernig við getum best tekist á við þær miklu áskoranir sem alþjóðasamfélagið stendur frammi fyrir. Innrás Rússa í Úkraínu og sú stigmögnun sem Pútín boðaði í vikunni hefur auðvitað sett svip sinn á allsherjarþingið enda brýtur hún gegn grundvallarreglum alþjóðakerfisins og stofnsáttmála Sameinuðu þjóðanna,“ segir Þórdís Kolbrún Reykfjörð Gylfadóttir utanríkisráðherra.

Í dag tók utanríkisráðherra þátt í fundi Grænhópsins svonefnda, sem er óformlegur samstarfshópur sex ríkja á sviði umhverfismála: Grænhöfðaeyja, Kosta Ríka, Sameinuðu arabísku furstadæmanna, Singapúr, Slóveníu og Íslands. „Öll ríkin vilja leggja sitt af mörkum í baráttunni við loftslagsvána og heilbrigði sjávar. Sjálfbær nýting auðlinda er sömuleiðis lykillinn að fæðu- og orkuöryggi til framtíðar,“ segir utanríkisráðherra

Þá átti Þórdís Kolbrún tvíhliða fundi með utanríkisráðherrum Georgíu, Svartfjallalands, Portúgals, Kýpur og Rúanda svo og með forsætisráðherra og utanríkisráðherra Andorra. Tvíhliða samband Íslands og þessara ríkja og staða og horfur í alþjóðamálum voru á meðal helstu umræðuefna. Þá áttu þau Þórdís Kolbrún og Philippe Lazzarini, framkvæmdastjóra Palestínuflóttamannaaðstoðar Sameinuðu þjóðanna (UNRWA) fund í morgun, en Ísland hefur stutt starf stofnunarinnar um áratuga skeið.

Í gær sótti utanríkisráðherra fund óformlegs ráðherrahóps til stuðnings Alþjóðlega sakamáladómstólsins (ICC) þar sem Karim Khan, saksóknari ICC, kynnti stöðu og horfur hjá dómstólnum. Aðild að hópnum eiga þrjátíu ríki með skýra stefnu um einarðan stuðning við starf dómstólsins. Að því búnu var Þórdís Kolbrún viðstödd sérstaka umræðu í öryggisráði Sameinuðu þjóðanna um Úkraínu. Síðdegis tók hún svo þátt í fundi norrænna þróunarsamvinnuráðherra með Aminu Mohammed, varaframkvæmdastjóra Sameinuðu þjóðanna. Þar voru til umræðu áskoranir á sviði mannúðar- og þróunarmála og umbætur á starfi Sameinuðu þjóðanna á þessum sviðum. Í kjölfarið sótti Þórdís Kolbrún svo ráðherrafund í fastanefnd Þýskalands um samvinnu um aðgerðir sem miða að því að draga einstaklinga til ábyrgðar vegna voðaverka í Úkraínu. Um kvöldið hitti hún utanríkisráðherra bandalags- og samstarfsríkja í Evrópu og Norður-Ameríku sem utanríkisráðherra Bandaríkjanna bauð til. Þar voru stríðið í Úkraínu í brennidepli og ástand og horfur í alþjóðamálum.

Auk þessara funda hefur Þórdís Kolbrún sótt móttökur og aðra viðburði í tengslum við allsherjarþingið. Má þar sérstaklega nefna móttöku sem Joe Biden, forseti Bandaríkjanna, efndi til í fyrrakvöld í American Museum of Natural History.

Annað kvöld flytur svo utanríkisráðherra ávarp fyrir allsherjarþinginu. Reiknað er með að Þórdís Kolbrún stígi í ræðustól um kl. 18:30 að staðartíma og verður ræðan sýnd í beinu vefstreymi á vefsvæði Sameinuðu þjóðanna.

Hagstofan

Vísitala neysluverðs hækkar um 0,09% á milli mánaða

Vísitala neysluverðs, miðuð við verðlag í september 2022, er 555,6 stig (maí 1988=100) og hækkar um 0,09% frá fyrri mánuði. Vísitala neysluverðs án húsnæðis er 460,0 stig og hækkar um 0,09% frá ágúst 2022.

Verð á fötum og skóm hækkaði um 4,6% (áhrif á vísitöluna 0,15%) og verð á raftækjum til heimilsnota hækkaði um 5,4% (0,10%). Verð á flugfargjöldum til útlanda lækkaði um 17,9% (-0,42%).

Síðastliðna tólf mánuði hefur vísitala neysluverðs hækkað um 9,3% og vísitala neysluverðs án húsnæðis um 7,0%.

Vísitala neysluverðs samkvæmt útreikningi í september 2022, sem er 555,6 stig, gildir til verðtryggingar í nóvember 2022. Vísitala fyrir eldri fjárskuldbindingar, sem breytast eftir lánskjaravísitölu, er 10.970 stig fyrir nóvember 2022.

Talnaefni

Halda áfram að lesa

Almannavarnir

Hættustigi aflýst á Austurlandi og Suðurlandi

Ríkislögreglutjóri í samráði við lögreglustjóra á Austurlandi og Suðurlandi aflýsir hættustigi almannavarna vegna veðurs sem fór yfir umdæmin 24.-26. september.  Engar veðurviðvaranir eru í gildi.

Halda áfram að lesa

Innlent

Vefútsending á morgun vegna yfirlýsingar fjármálastöðugleikanefndar og útgáfu Fjármálastöðugleika

27. september 2022

Fjármálastöðugleikanefnd. Frá vinstri eru Guðrún Þorleifsdóttir, Rannveig Sigurðardóttir, Axel Hall, Ásgeir Jónsson formaður, Bryndís Ásbjarnardóttir, Guðmundur Kr. Tómasson, Unnur Gunnarsdóttir og Gunnar Jakobsson.
Fjármálastöðugleikanefnd. Frá vinstri eru Guðrún Þorleifsdóttir, Rannveig Sigurðardóttir, Axel Hall, Ásgeir Jónsson formaður, Bryndís Ásbjarnardóttir, Guðmundur Kr. Tómasson, Unnur Gunnarsdóttir og Gunnar Jakobsson.

Yfirlýsing fjármálastöðugleikanefndar verður birt á vef Seðlabankans kl. 8.30 á morgun 28. september. Ritið Fjármálastöðugleiki verður birt á vefnum kl. 8.35. Klukkan 9.30 hefst vefútsending frá kynningunni vegna yfirlýsingar nefndarinnar. Á kynningunni gera Ásgeir Jónsson, seðlabankastjóri og formaður fjármálastöðugleikanefndar, Gunnar Jakobsson, varaseðlabankastjóri fjármálastöðugleika og Haukur C. Benediktsson, framkvæmdastjóri fjármálastöðugleika, grein fyrir yfirlýsingu fjármálastöðugleikanefndar og kynna efni ritsins Fjármálastöðugleika.

Nánari upplýsingar um fjármálastöðugleika má finna sérstakri síðu, sjá hér.

Hér má finna tengla á útgefin rit, m.a. Fjármálastöðugleika.

Vefútsending verður aðgengileg hér (tengill settur hér von bráðar).

Halda áfram að lesa

Vinsælast

Allur réttur áskilin © Tíðin