Samherji

Rafmagnstengingin er jákvætt skref í umhverfismálum

Rafmagnstengingin er jákvætt skref í umhverfismálum

Vilhelm Þorsteinsson EA 11 – nýtt uppsjávarskip Samherja – kom til Neskaupstaðar í lok síðustu viku með um 850 tonn af makríl til vinnslu hjá fiskiðjuveri Síldarvinnslunnar. Löndun úr skipinu markar jákvæð tímamót, notast var í fyrsta sinn við rafmagnsbúnað til að landtengja skip meðan þau landa hráefni í fiskiðjuverið. Með tilkomu búnaðarins er áætlað að olíunotkun skipa dragist saman um 300 þúsund lítra á ári. Kostnaður við verkefnið er á annað hundrað milljónir króna.

Þórarinn Þórarinsson yfirvélstjóri á Vilhelm Þorsteinssyni segir að venjulega taki um tvo sólarhringa að dæla hráefninu til vinnslunnar og á meðan þurfi að keyra ljósavélar skipsins til þess að halda hráefninu kældu, með tilheyrandi olíunotkun.

Neskaupstaður grænn

„Þessi rafmagnstenging er mjög svo jákvæð í umhverfislegu tilliti og sparar olíunotkun, þannig að þetta er mikilvægt grænt skref sem verið er að stíga með þessum búnaði, við þurfum sem sagt ekki lengur að brenna olíu þegar verið er að landa.

Hérna fyrir austan hafa verið stigin stór græn skref í sjávarútvegi, til dæmis hefur fiskimjölsverksmiðjan verið rafmagnsvædd og fleiri þætti er hægt að nefna, svo sem endurnýjun skipa. Neskaupstaður er klárlega einn af grænustu sjávarútvegsstöðum sem við þekkjum, starfsemi Síldarvinnslunnar endurspeglar það,“ segir Þórarinn Þórarinsson yfirvélstjóri á Vilhelm Þorsteinssyni EA.

Þurfum að vera vakandi yfir orkuskiptum

Gunnþór B. Ingvason forstjóri Síldarvinnslunnar segir á heimasíðu félagsins um merk tímamót að ræða.

„Þetta er stórt og jákvætt skref í orkuskiptum íslensks sjávarútvegs, þetta verkefni er búið að taka okkur nokkur ár í þróun og undirbúningi. Við erum að fara úr því að nota olíu til kælingar, dælingar og keyrslu skips við löndun yfir í að nota rafmagn. Stefna Síldarvinnslunnar er að lágmarka umhverfisáhrif eða fótspor af sinni starfsemi og við þurfum að vera vakandi yfir orkuskiptum í flotanum en þar eru að koma fram ýmsar lausnir sem við þurfum að skoða hve fýsilegar eru,“ segir Gunnþór.

Börkur NK kom til Neskaupstaðar í morgun með síld og makríl og var notast við hinn nýja búnað við löndun úr skipinu.

Samherji

Samherji stækkar landeldisstöðina í Öxarfirði

Tölvugerð mynd af laxeldisstöðinni eftir stækkun

Tölvugerð mynd af laxeldisstöðinni eftir stækkun

Stjórn Samherja fiskeldis hefur ákveðið að stækka landeldisstöð félagsins í Öxarfirði um helming, þannig að framleiðslan verði um þrjú þúsund tonn af laxi á ári. Áætlaður kostnaður er um einn og hálfur milljarður króna. Framkvæmdastjóri Samherja fiskeldis segir miðað við að framkvæmdum verði lokið eftir um það bil eitt ár. Sem hluti af hringrásarhagkerfi eldisins, bættri nýtingu og kolefnisjöfnun er landgræðsla og síðar skógrækt áformuð á nærliggjandi jörð, sem Samherji hefur keypt vegna stækkunarinnar.

Samherji fiskeldi hefur í nokkurn tíma kannað möguleika á að stækka landeldisstöðina í Öxarfirði. Jón Kjartan Jónsson framkvæmdastjóri Samherja fiskeldis segir að framkvæmdir hefjist á næstunni, fyrst þurfi að ljúka vinnu við skipulagsmál á svæðinu sem er á lokastigi.

Silfurstjarnan fyrir stækkun

Fimm sinnum stærri ker

„Þetta er nokkuð umfangsmikið verkefni. Kerin sem við byggjum verða alls fimm vegna stækkunarinnar, um helmingi stærri að umfangi en stærstu ker sem fyrir eru. Þá þarf að auka sjótöku, byggja hreinsimannvirki, stoðkerfi og koma fyrir ýmsum tækjabúnaði. Undirbúningsvinnu er nú að mestu lokið, leyfin eru að klárast og næst er að hefjast handa,“ segir Jón Kjartan.

Undanfari landeldis á Reykjanesi

Samherji hefur keypt lóðina þar sem núverandi starfsemi fer fram og einnig jörðina Akursel, sem er vestan við stöðina. Jón segir að þar verði, auk sjótöku, nýttur áburður frá stöðinni til landgræðslu og síðar skógræktar.

„Samherji áformar að byggja upp allt að 40.000 tonna landeldi á laxi á Reykjanesi á næstu árum og þessi stækkun í Öxarfirði tengist þeim áformum. Það má segja að stækkunin fyrir norðan sé á vissan hátt undanfari þessa stóra verkefnis okkar á Reykjanesi. Við ætlum að prófa nýja hluti og í stærri einingum en áður og nýta þá reynslu við hönnun og rekstur á nýju stöðinni.“

Öxarfjörður hentugur staður

Jón Kjartan segir að stækkunin í Öxarfirði komi nærsamfélaginu til góða á ýmsan hátt.

„Já, klárlega. Með helmingi stærri stöð eykst umfangið að sama skapi. Störfum fjölgar, aðflutningar til og frá stöðinni munu aukast og þörf á aðkeyptri þjónustu til rekstrarins verður meiri. Þetta eflir samfélagið og undirstrikar jafnframt trú okkar á landeldi og að Öxarfjörðurinn sé hentugur staður fyrir slíka atvinnustarfsemi.“

Halda áfram að lesa

Samherji

Helga Steinunn Guðmundsdóttir heiðursfélagi Íþrótta- og Ólympíusambands Íslands

Helga Steinunn Guðmundsdóttir

Helga Steinunn Guðmundsdóttir

Helga Steinunn Guðmundsdóttir var um helgina gerð að heiðursfélaga Íþrótta- og Ólympíusambands Ísland en Helga hefur unnið ómetanlegt starf í þágu íþrótta á Íslandi. Frá þessu er greint á heimasíðum ÍSÍ og Knattspyrnufélags Akureyrar. Helga Steinunn situr í stjórn Samherja og er stjórnarformaður Samherjasjóðsins sem hefur stutt íþróttahreyfinguna dyggilega.

Nafnbótin Heiðursfélagi ÍSÍ er æðsta viðurkenning íþróttahreyfingarinnar og þeir sem geta hlotið þá nafnbót eru þeir sem hafa þegar hlotið Heiðurskross ÍSÍ, æðstu heiðursviðurkenningu ÍSÍ. Helga Steinunn sat í stjórn ÍSÍ frá árinu 2006 til ársins 2017 og var varaforseti sambandsins 2013 til 2017.

Margvígslegar viðurkenningar

„Helga var sæmd Heiðurskrossi ÍSÍ árið 2017 og Gullmerki ÍSÍ árið 2003 en hún gegndi til að mynda starfi formanns Skipulagsnefndar Smáþjóðaleikanna 2015 og vinnuhóps ÍSÍ um ferðasjóð íþróttafélaga frá upphafi sjóðsins.
Þá hefur Helga Steinunn unnið gríðarlega mikið og gott starf fyrir KA en hún var formaður félagsins frá árinu 1998 til ársins 2005. Einnig hefur hún setið í stjórn knattspyrnudeildar KA til viðbótar við öll þau önnur störf sem hún hefur komið að innan félagsins. Helga var gerð að heiðursfélaga KA árið 2008 og var sæmd gullmerki KA árið 2005,“ segir á heimasíðu KA.

Samherji óskar Helgu Steinunni hjartanlega til hamingju með sæmdarheitið.

Halda áfram að lesa

Samherji

Sjávarútvegsfræðingar áberandi hjá Samherja

Sjávarútvegsfræðingar áberandi hjá Samherja

Tveir nýir stjórnendur, sem eiga það sameiginlegt að vera sjávarútvegsfræðingar frá Háskólanum á Akureyri, hafa verið verið ráðnir til Samherja fiskeldis í Sandgerði. Með þessum ráðningum eru sjávarútvegsfræðingarnir sem starfa hjá Samherja samtals tuttugu og fjórir, enda leitast Samherji við að ráða til sín og hafa í sínum hópi einvalalið starfsmanna. 

Rekstrarstjóri

Halldór Pétur Ásbjörnsson hefur verið ráðinn rekstrarstjóri vinnslu Samherja í Sandgerði. Halldór Pétur lauk M.Sc. í auðlindafræðum árið 2011, sjávarútvegsfræði árið 2009 frá Háskólanum á Akureyri og fiskeldisfræðum frá Háskólanum á Hólum 2006. Hann hefur starfað sem verk- og verkefnastjóri í fiskiðjuveri Brims í Reykjavík í tíu ár. 

Gæðastjóri

Sunneva Ósk Þóroddsdóttir hefur verið ráðin gæðastjóri í vinnslu Samherja í Sandgerði. Sunneva Ósk er sjávarútvegs- og viðskiptafræðingur frá Háskólanum á Akureyri og hefur starfað í sjávarútvegi frá fjórtán ára aldri. Meðfram námi starfaði hún hjá Arion banka. Sunneva Ósk er Sandgerðingur, þannig að hún mun starfa í heimabyggð.

Einstakt nám

Nám í sjávarútvegsfræðum við Háskólann á Akureyri er fjölbreytt og krefjandi, segir á heimasíðu skólans. Sjávarútvegsfræðingar eru eftirsóttir til starfa, enda miðast námið við að nemendur takist á við fjölbreytt verkefni að námi loknu.

Segja má að námið sé einstakt í íslenskri námsflóru og veiti góðan grunn til stjórnunarstarfa í öllum greinum sjávarútvegsins, jafnt í sjávarútvegi sem og öðrum greinum atvinnulífsins. 

Nemendur í sjávarútvegsfræði við Háskólann á Akureyri geta einnig fengið gráðu í viðskiptafræði og bæta þá við einu ári í námi, samkvæmt heimasíðu skólans.

Samherji býður þessa nýju starfsmenn velkoma til starfa.

Halda áfram að lesa

Vinsælast

Allur réttur áskilin © 2021 Tíðin