Stjórnarráðið

Reglugerð um öryggi net- og upplýsingakerfa mikilvægra innviða í samráðsgátt

Drög að reglugerð um öryggi net- og upplýsingakerfa mikilvægra innviða hafa verið birt í samráðsgátt stjórnvalda til umsagnar. Allir hafa tækifæri til að senda inn umsögn eða ábendingar en frestur til að skila umsögn er til og með 18. júní nk.

Reglugerðin felur í sér nánari útfærslu á ákvæðum í lögum um öryggi net- og upplýsingakerfa mikilvægra innviða, sem samþykkt voru í fyrra og öðlast gildi 1. september nk. Lögin taka m.a. mið af netöryggistilskipun Evrópusambandsins (NIS-tilskipunin). 

Markmið reglugerðarinnar er að gera lágmarkskröfur um umgjörð og rekstur net- og upplýsingakerfa og tryggja þannig samfelldan rekstur og virkni þeirra og að þau þoli áföll. Einnig er reglugerðinni ætlað að tryggja samhæfð viðbrögð við mögulegum ógnum og öryggisatvikum.

Reglugerðardrögin voru unnin í samstarfi við Póst- og fjarskiptastofnun, Embætti landlæknis, Orkustofnun, Samgöngustofu, Seðlabanka Íslands og Umhverfisstofnun, sem öllum er falið hlutverk eftirlitsstjórnvalds samkvæmt lögum um öryggi net- og upplýsingakerfa mikilvægra innviða nr. 78/2019.

Halda áfram að lesa

Innlent

Ungir Íslendingar geti búið og starfað í Bretlandi

Samkomulag er í höfn milli Íslands og Bretlands sem gerir ungu fólki frá Íslandi, á aldrinum 18 til 30 ára, mögulegt að búa og starfa í Bretlandi í allt að tvö ár. Guðlaugur Þór Þórðarson utanríkis- og þróunarsamvinnuráðherra, og Michael Nevin, sendiherra Bretlands á Íslandi, undirrituðu samkomulagið í dag en það gerir ungum Bretum að sama skapi mögulegt að búa og starfa á Íslandi. 

Viðræður um framtíðarsamband Íslands og Bretlands hafa verið afar umfangsmiklar. Í byrjun júlí undirritaði ráðherra nýjan fríverslunarsamning við Bretland og þá hefur einnig verið skrifað undir samkomulag við bresk stjórnvöld um samstarf á sviði menntunar, rannsókna og nýsköpunar og geimvísinda

Guðlaugur Þór fagnar samkomulaginu sem hann segir afar mikilvægt. „Við höfum frá upphafi lagt áherslu á að tryggja tækifæri ungs fólks til þess að búa, starfa og mennta sig í Bretlandi, sem sést meðal annars í þeirri staðreynd að Ísland er fyrsta ríkið á öllu Evrópska efnahagssvæðinu til að gera samning við Bretland um vinnudvöl ungs fólks frá því landið gekk úr Evrópusambandinu. Ég er sannfærður um að sterk tengsl ríkjanna muni styrkjast enn frekar með þessum samningi,“ segir Guðlaugur Þór. 

Eftir að Bretland gekk úr Evrópusambandinu þurfa allir sem vilja flytja til Bretlands að sækja um dvalarleyfi og uppfylla ákveðin skilyrði samkvæmt nýju innflytjendakerfi Bretlands, en nýja samkomulagið mun auðvelda ungu fólki frá Íslandi ferlið til muna. 

Áætlað er að nýja fyrirkomulagið taki gildi í byrjun árs 2022 að undangengnum nauðsynlegum lagabreytingum. 

Halda áfram að lesa

Innlent

Ríkisstjórnin styrkir Norræna félagið á Íslandi

Ríkisstjórnin samþykkti á fundi sínum í morgun að veita Norræna félaginu á Íslandi 5 milljóna króna styrk í tilefni 100 ára afmælis félagsins á næsta ári.

Félagið hyggst setja á laggirnar tímabundinn afmælissjóð sem nýttur verður til að fjármagna viðburði og ýmis verkefni á afmælisárinu sem verður helgað norrænni menningu, vitund og norrænu samstarfi.

Markmið Norræna félagsins á Íslandi sem var stofnað 29. september 1922 er að efla samstarf og vináttutengsl Íslendinga og annarra Norðurlandabúa en félagið starfar í 30 deildum um allt land.

Halda áfram að lesa

Innlent

Reglugerð um skyldu flugrekenda til að kanna vottorð vegna COVID-19 tekur breytingum

Hafa samband

Ábending / fyrirspurn