Samherji

Samherji eflir upplýsingaveitur félagsins

Karl Eskil Pálsson

Karl Eskil Pálsson

Karl Eskil Pálsson fjölmiðlamaður hefur verið ráðinn til Samherja og mun hann miðla fréttum á heimasíðu og samfélagsmiðlum félagsins, auk þess sem hann mun sinna innri vef Samherja þar sem upplýsingum og fræðsluefni er komið til starfsfólks. Þá mun hann hafa á sinni könnu ýmis önnur verkefni á sviði upplýsingamála.

Karl Eskil er reyndur fjölmiðlamaður. Hann starfaði í tvo áratugi á fréttastofu Rúv á Akureyri, var ritstjóri héraðsfréttablaðsins Vikudags, sjálfstæður blaðamaður og nú síðast dagskrárgerðarmaður á sjónvarpsstöðinni N4 á Akureyri. Sjávarútvegur hefur verið helsta sérgrein hans í fjölmiðlun, einnig umfjöllun um viðskipta- og mannlíf í landinu, sérstaklega á landsbyggðinni.

Nýsköpun áberandi hjá Samherja

„Vegna starfa minna undanfarna áratugi þekki ég nokkuð til starfsemi og innviða Samherja, sem er án efa eitt tæknivæddasta sjávarútvegsfyrirtæki landsins og þar með í heiminum. Samherji er líklega með stærri nýsköpunarfyrirtækjum landsins. Í því sambandi nægir að nefna glæsilegan skipaflota, fullkomnar landvinnslur, skip sem getur geymt lifandi fisk í sér útbúnum tönkum og fyrirhugað landeldi í Reykjanesbæ. Listinn er reyndar lengri hvað nýsköpun varðar. 

Hjá Samherja starfar lausnamiðað og dugmikið fólk, sem nær árangri við að þróa þetta framsækna og tæknivædda fyrirtæki, þar sem lögð er áhersla á gott og skapandi starfsumhverfi. Ég er sem sagt fullur tilhlökkunar og þakklátur fyrir að hafa verið munstraður um borð. Mörg stór verkefni eru í farvatninu hjá Samherja, sem félagið vill segja frá og upplýsa með vönduðum og traustum hætti,“ segir Karl Eskil Pálsson, sem hefur störf í dag 1.september, í upphafi fiskveiðiársins.

Samherji býður Karl Eskil velkominn til starfa.

Samherji

„Norðlendingur“ fyrir austan. Enginn frá borði meðan landað var.

Kaldbakur EA við bryggju á Akureyri, skömmu fyrir brottför/myndir samherji.is

Kaldbakur EA við bryggju á Akureyri, skömmu fyrir brottför/myndir samherji.is

Kaldbakur EA 1 – togari Útgerðarfélags Akureyringa – landaði 110 tonnum á Akureyri í morgun, uppistaða aflans var þorskur eða um 90 tonn. Sigtryggur Gíslason skipstjóri segir að leiðindaveður hafi verið í túrnum, vindurinn yfirleitt yfir tuttugu metrum á sekúndu. Enginn í áhöfn togarans fór frá borði meðan landað var, þannig sé leitast við að koma í veg fyrir COVID-19 smit.

Aflinn eins og lagt var upp með

Kaldbakur var að mestu á veiðum fyrir austan land í þessari veiðiferð. Sigtryggur skipstjóri segir veðrið á miðunum fyrir vestan land hafi einfaldlega rekið marga togara austur. 

„Við byrjuðum túrinn á Rifsbankanum en þar var vitlaust veður, þannig að við sigldum austur á Digranesflak. Þar vorum við í brælu svo að segja allan túrinn en aflinn var sæmilegur, eða eins og lagt var upp með í byrjun ferðar. Þorskurinn fyrir austan er ekki eins stór og fyrir vestan á þessum árstíma, sem sagt svokallaður Norðlendingur. Þetta var önnur veiðiferðin frá áramótum sem við sigldum austur, veðrið stýrir okkur einfaldlega, það er bara þannig. Frá áramótum hefur veðrið verið óskaplega umhleypingasamt en veiðin hefur verið þokkaleg.“

Tvöföld áhöfn. Ýtrustu ráðstafanir gegn COVID-19

Byrjað var að landa úr Kaldbak klukkan sex í morgun og um hádegisbil var haldið til veiða á nýjan leik. Til þess að koma í veg fyrir COVID-19 smit fór enginn úr áhöfninni í land.

„Við erum svo að segja með tvöfalda áhöfn og við skiptum á átján til tuttugu daga fresti, sem þýðir að hver áhöfn fer í þrjá túra. Með þessu fyrirkomulagi reynum við að koma í veg fyrir smit, það er eins gott að fara varlega. Strákarnir eru algjörlega með á nótunum í þessum ráðstöfunum, enda lítið annað hægt að gera. Vonandi erum við með hækkandi sól að sjá fyrir endann á þessum blessaða heimsfaraldri,“ segir Sigtryggur Gíslason skipstjóri á Kaldbak EA.

Hérna fyrir neðan eru tvær skemmtilegar myndir:

Halda áfram að lesa

Samherji

„Samherji er mjög framarlega í tölvu- og upplýsingamálum“

Eiríkur Kristján Aðalsteinsson/myndir samherji.is

Eiríkur Kristján Aðalsteinsson/myndir samherji.is

Eiríkur Kristján Aðalsteinsson iðnrekstrarfræðingur tók að sér tölvumál árið 1995 hjá litlu útgerðarfyrirtæki, Samherja, og er enn að. Gríðarlegar breytingar hafa orðið á upplýsinga- og tölvumálum á þessum árum og sömu sögu er að segja um Samherja sem hefur vaxið hröðum skrefum. Hann segir að tölvur og hugbúnaður gegni lykilhlutverki í starfsemi fyrirtækja, Samherji teljist framarlega í þeim efnum.

Eiríkur Kristján starfaði sem verkstjóri hjá Niðursuðuverksmiðju K.Jónssonar og síðar Strýtu sem keypti þrotabú K.Jónssonar 1993 en Samherji var meðal hluthafa Strýtu.

Tölvum fjölgaði ört hjá framsæknu fyrirtæki

Eiríkur segir að á þessum tíma hafi ör þróun verið í tölvum sem og í notendaviðmótinu sjálfu.

„Um þessar mundir var Windows stýrikerfið að ryðja sér til rúms sem auðveldaði almenna notkun og tölvum fór stöðugt fjölgandi í fyrirtækinu, ekki síst um borð í skipaflotanum. Haraldur Grétarsson sem þá var í ýmsum sérverkefnum fyrir Þorstein Má forstjóra hafði samband við mig og sagði að uppsetning á nýjum tölvum og almennt tölvuvesen tæki orðið sífellt meiri tíma. Aðkeypt þjónusta væri dýr og hann hafi heyrt að ég væri lunkinn við svona apparöt. Við getum sagt að þarna hafi boltinn byrjað að rúlla fyrir alvöru hjá mér í tölvumálum Samherja.

Til að byrja með sinnti ég jöfnum höndum tölvum um borð í skipunum sem og í landi. Í skipum var til dæmis byrjað að nota tölvur við ýmsa skýrslugerð auk Standard C samskiptatækninnar, sem byggðist á samskiptum við gervihnetti í textaformi en telst ansi frumstæð í dag. Viðhald þessara tölva og glíman við hið hrekkjótta „serial“ samskiptatengi gat bugað jafnvel vönustu menn. Þá var og verið að taka í gagnið tölvur með viðhaldskerfum sem vélstjórar skipanna nýttu. Ég var sem sagt fenginn til þess að sinna 

þessum nýju tækjum. Fartölvur voru einnig að líta dagsins ljós á þessum tíma og man ég að Samherji átti allavega eina fartölvu þegar ég kom til starfa. Mér þótti þetta afar merkileg græja og bera vott um að fyrirtækið ætlaði sér að taka fullan þátt í að nýta þessa þróun“

Miðaprentaravæðingin var bylting

„Um tveimur árum eftir að ég hóf að sinna tölvumálum var ákveðið að ráðast í það stóra verkefni að miðaprentvæða skipaflotann, sem sagt að prenta út límmiða á umbúðir um borð jafn óðum og afurðirnar urðu til. Þá var jú sjófrystingin alls ráðandi. Hagræðingin þótti gríðarleg og framúrstefnuleg, engin hætta var á að miðar fyrir ákveðnar afurður kláruðust og svo var meira að segja hægt að skipta um texta fyrir afurðir úti á rúmsjó. Áður þurfti að fara út með allar tegundir af límmiðum forprentaðar. Þetta þótti viðamikið og flókið verkefni á þeim tíma, en heppnaðist afskaplega vel og tæknin var innleidd fljótlega í öllum Samherjaflotanum.“

Sérstök tölvuver í nýjum skipum

„Það þarf ekkert að fara mörgum orðum um framfarirnar og breytingarnar á þessum áratugum. Í dag má segja að tölvurnar og alls konar hugbúnaður hafi tekið yfir ansi margt um borð í skipunum og sömu sögu er að segja um landvinnsluna. Í nýjustu skipunum eru meira að segja sérstök tölvuver, umsjón og viðhald er svo hjá sérhæfðum fyrirtækjum í landi. Þetta á líka við um vinnslurnar, störfin eru orðin líkamlega auðveldari og snúast frekar um eftirlit með búnaðinum.“

Skilvirkni og öryggismál ávallt ofarlega á baugi

„Þessi deild eins og aðrar í fyrirtækinu leitar stöðugt leiða til hagræðingar undir öruggri stjórn yfirmanns okkar Finnboga Reynissonar. Við erum ekki nema fjórir á deildinni og skilvirkni því nauðsynleg. Ýmsar þjónustur sem við gerðum áður út sjálfir eins og að reka eigin tölvupóstþjón er búið að flytja í skýið hjá Microsoft. Þetta er ekki gallalaust fyrirkomulag en í skýinu felst óumdeilanleg hagræðing og kostirnir eru margfaldir á við ókostina. Skýið léttir ýmsu utanumhaldi af okkur og við getum betur einbeitt okkur að daglegum verkefnum sem er einfaldlega að allt virki. Allt þarf að vera í lagi og tala saman eins og til er ætlast og bregðast þarf skjótt við að greina vandamál og bæta úr þegar svo ber undir. Þetta er um margt spennandi heimur í stöðugri þróun, sem heldur manni svolítið á tánum en veldur því jafnframt að starfið verður hvorki tilbreytingarlaust né leiðinlegt.

Samhliða auknu vægi tölva hefur öryggisógnin utanfrá vaxið til mikilla muna, skipulögð svikastarfsemi er okkur hér á deildinni ávallt ofarlega í huga og sjálfsagt flestum sem starfa á þessu sviði. Að viðhalda góðu öryggisstigi er endalaust verkefni og flækir málin mikið bæði fyrir okkur og notendum. Ég vil nota tækifærið og segja starfsmönnum Samherja til hróss að þeir sýna þessu orðið skilning og taka auknum öryggiskröfum með sífellt betra jafnaðargerði.

Það er líka ánægjulegt hversu starfsmenn sýna upp til hópa mikla árvekni og tortryggni gagnvart öllu óvenjulegu sem berst í tölvupósti, en það er helsta leið svindlara í dag. Menn eru ófeimnir að kalla eftir hjálp við að meta hvort eitthvað sé gruggugt, enda hvetjum við okkar fólk til þess. Bein notendaaðstoð eykst með hærra öryggisstigi og fyrir nokkrum árum settum við upp þjónustuborð til að sinna því og ýmsum öðrum málum er tengjast notendum, tölvum og tölvukerfum og er það stór hluti af mínu starfi í dag.“

Samherji framarlega í tölvu- og upplýsingamálum

„Já, Samherji er mjög framarlega í tölvu- og upplýsingatækni að mínu mati og er þar lykilatriði að kerfin skila góðum upplýsingum til þeirra sem á þurfa að halda í nánast rauntíma. Slíkt er ekki sjálfgefið enda daglegt gagnamagn frá öllum kerfum fyrirtækisins yfirþyrmandi. Okkar yfirmaður er hér eins og oft áður betri en enginn við stýrið enda óhræddur við að nýta nýja hluti. Það þarf skynsemi og áræðni að innleiða ný tól sem kosta peninga og krefjast auk þess oft á tíðum mikils vinnuframlags.“

Jafn áhugasamur nú og fyrir hartnær 30 árum

„það hefur verið hálfgert ævintýri að fylgja fyrirtækinu í gegnum allan þennan vöxt. Þrátt fyrir að ég sé einharður Þórsari og hafi ávallt búið norðan við Glerá hafa þeir frændur ekkert látið það bitna á mér nema síður sé. Mér finnst ég ávallt hafa notið trausts stjórnenda fyrirtækisins. Ég get ekki neitað því að maður ber taugar til fyrirtækisins eftir alla þessa samfylgd og met starfið mikils. Allt þetta ásamt þéttum og góðum hópi hérna á tölvudeildinni gerir það að verkum að maður mætir jafn áhugasamur til vinnu nú og fyrir hartnær þrjátíu árum“ segir Eiríkur Kristján Aðalsteinsson í tölvudeild Samherja.

Halda áfram að lesa

Samherji

Enginn í áhöfn Vilhelms Þorsteinssonar í land. Loðnan orðin hæf til manneldis.

Vilhelm Þorsteinsson við bryggju í Neskaupstað/mynd:Hákon Ernuson

Vilhelm Þorsteinsson við bryggju í Neskaupstað/mynd:Hákon Ernuson

Vilhelm Þorsteinsson EA landaði í gær 2.060 tonnum í Neskaupstað og fer hluti aflans til manneldis í fiskiðjuveri Síldarvinnslunnar. Þetta var annar loðnutúr Vilhelms á árinu, skipið hélt aftur á loðnumiðin í morgun.

Til þessa hefur öll loðna sem borist hefur til Síldarvinnslunnar á vertíðinni farið til framleiðslu á mjöli og lýsi en eftir því sem loðnan stækkar er hægt að frysta loðnuna til manneldis. Birkir Hreinsson skipstjóri segir að bræla á miðunum hafi gert flotanum erfitt fyrir síðustu sólarhringana.

Loðnan að stækka

„Veiðin hefur verið skást á morgnana og seinni partinn. Stærsta holið í þessum öðrum túr ársins var um 450 tonn, annars voru þau um og yfir 100 tonn. Þannig að þetta var nudd á okkur. Loðnan er hins vegar að stækka, sem þýðir að hægt er að vinna hana til manneldis og hluti aflans var frystur.“

Skipið sóttkví, enginn í land

Um tíu klukkustunda sigling er á miðin og fór Vilhelm af stað aftur á miðin, strax og búið var að dæla aflanum í land til vinnslu.

„Enginn í áhöfninni fór í land, skipið er í raun og veru sóttkví. Löndunargengið þurfti að athafna sig á framdekkinu, annars kom enginn um borð. Við förum eins varlega og hægt er á tímum Covid-19. Þetta er náttúrulega erfið og snúin staða en það er ekkert annað í boði,“ segir Birkir Hreinsson.

Halda áfram að lesa

Vinsælast

Allur réttur áskilin © 2021 Tíðin