Innlent

Stórt skref stigið með skipun Endurhæfingarráðs

Willum Þór Þórsson, heilbrigðisráðherra, og Guðmundur Ingi Guðbrandsson, félags- og vinnumarkaðsráðherra, hafa skipað Endurhæfingarráð – samstarfsvettvang um endurhæfingu þvert á velferðarkerfi ráðuneytanna.

Ráðinu er ætlað að vera ráðherrunum til ráðgjafar við faglega stefnumörkun varðandi endurhæfingu. Markmiðið er að tryggja samþættingu í endurhæfingu fólks, hvort sem um er að ræða heilbrigðistengda endurhæfingu, atvinnutengda starfsendurhæfingu eða önnur tengd úrræði.

Við vinnuna er ráðinu meðal annars ætlað að greina og útfæra skilgreindar aðgerðir í fimm ára aðgerðaáætlun heilbrigðisráðuneytisins um heilbrigðistengda endurhæfingu, sem og að huga að samþættingu við aðgerðir sem tengjast endurskoðun á örorkulífeyriskerfinu.

Þær aðgerðir snúa aðallega að samræmdu flokkunarkerfi, matskerfi og tilvísunarkerfi sem er ætlað að tryggja heildræna nálgun, samfellu og gæði þjónustunnar. Aðgerðirnar styðja því við að tekið sé tilliti til líkamlegra, sálfræðilegra og félagslegra þátta þegar endurhæfingarþörf er metin. Það er grundvöllur þess að geta gert raunhæfa og markvissa endurhæfingaráætlun þvert á kerfi sem er til þess fallin að bæta heilsu og færni einstaklinga.

Framangreint samræmist vel þeim áherslum sem lagðar eru í stjórnarsáttmála ríkisstjórnarinnar.

Guðmundur Ingi Guðbrandsson, félags- og vinnumarkaðsráðherra:

,,Skipun Endurhæfingarráðs er stórt skref og samræmist vel þeim áherslum mínum sem snúa að því að koma starfsendurhæfingu fyrr að í ferlinu og styðja þannig við möguleika fólks til virkni á vinnumarkaði. Á næstu dögum mun ég einmitt birta til umsagnar í samráðsgátt drög að frumvarpi sem hefur það að markmiði að tryggja fólki í starfsendurhæfingu lengri tíma á endurhæfingarlífeyri. Við verðum að gera allt sem í okkar valdi stendur til að tryggja að fólk sem missir starfsgetuna fái rétta þjónustu á réttum tíma því þannig getum við aukið líkurnar á farsælli endurkomu þess á vinnumarkað.“

Willum Þór Þórsson, heilbrigðisráðherra:

,,Endurhæfing getur skilað sigrum sem ekki má vanmeta og geta skipt sköpum fyrir einstaklinginn. Endurhæfing getur líka skipt sköpum fyrir samfélagið þar sem m.a. ótímabært brottfall úr námi eða vinnu getur haft margföldunaráhrif til hins verra á heilsu einstaklingsins, hans nánustu ættingja og aukið kostnað heilbrigðiskerfisins að ósekju. Ekki er síður mikilvægt hvernig endurhæfing nýtist auknum fjölda aldraðra einstaklinga til að endurheimta eða viðhalda færni sinni og þannig sjálfstæði sínu, lífsgæðum og virkni í samfélaginu.“

Arnór Víkingsson er formaður Endurhæfingarráðs sem skipað er tíu fulltrúum til fjögurra ára.

Hagstofan

Vísitala neysluverðs hækkar um 0,09% á milli mánaða

Vísitala neysluverðs, miðuð við verðlag í september 2022, er 555,6 stig (maí 1988=100) og hækkar um 0,09% frá fyrri mánuði. Vísitala neysluverðs án húsnæðis er 460,0 stig og hækkar um 0,09% frá ágúst 2022.

Verð á fötum og skóm hækkaði um 4,6% (áhrif á vísitöluna 0,15%) og verð á raftækjum til heimilsnota hækkaði um 5,4% (0,10%). Verð á flugfargjöldum til útlanda lækkaði um 17,9% (-0,42%).

Síðastliðna tólf mánuði hefur vísitala neysluverðs hækkað um 9,3% og vísitala neysluverðs án húsnæðis um 7,0%.

Vísitala neysluverðs samkvæmt útreikningi í september 2022, sem er 555,6 stig, gildir til verðtryggingar í nóvember 2022. Vísitala fyrir eldri fjárskuldbindingar, sem breytast eftir lánskjaravísitölu, er 10.970 stig fyrir nóvember 2022.

Talnaefni

Halda áfram að lesa

Almannavarnir

Hættustigi aflýst á Austurlandi og Suðurlandi

Ríkislögreglutjóri í samráði við lögreglustjóra á Austurlandi og Suðurlandi aflýsir hættustigi almannavarna vegna veðurs sem fór yfir umdæmin 24.-26. september.  Engar veðurviðvaranir eru í gildi.

Halda áfram að lesa

Innlent

Vefútsending á morgun vegna yfirlýsingar fjármálastöðugleikanefndar og útgáfu Fjármálastöðugleika

27. september 2022

Fjármálastöðugleikanefnd. Frá vinstri eru Guðrún Þorleifsdóttir, Rannveig Sigurðardóttir, Axel Hall, Ásgeir Jónsson formaður, Bryndís Ásbjarnardóttir, Guðmundur Kr. Tómasson, Unnur Gunnarsdóttir og Gunnar Jakobsson.
Fjármálastöðugleikanefnd. Frá vinstri eru Guðrún Þorleifsdóttir, Rannveig Sigurðardóttir, Axel Hall, Ásgeir Jónsson formaður, Bryndís Ásbjarnardóttir, Guðmundur Kr. Tómasson, Unnur Gunnarsdóttir og Gunnar Jakobsson.

Yfirlýsing fjármálastöðugleikanefndar verður birt á vef Seðlabankans kl. 8.30 á morgun 28. september. Ritið Fjármálastöðugleiki verður birt á vefnum kl. 8.35. Klukkan 9.30 hefst vefútsending frá kynningunni vegna yfirlýsingar nefndarinnar. Á kynningunni gera Ásgeir Jónsson, seðlabankastjóri og formaður fjármálastöðugleikanefndar, Gunnar Jakobsson, varaseðlabankastjóri fjármálastöðugleika og Haukur C. Benediktsson, framkvæmdastjóri fjármálastöðugleika, grein fyrir yfirlýsingu fjármálastöðugleikanefndar og kynna efni ritsins Fjármálastöðugleika.

Nánari upplýsingar um fjármálastöðugleika má finna sérstakri síðu, sjá hér.

Hér má finna tengla á útgefin rit, m.a. Fjármálastöðugleika.

Vefútsending verður aðgengileg hér (tengill settur hér von bráðar).

Halda áfram að lesa

Vinsælast

Allur réttur áskilin © Tíðin