Samherji

Strákarnir á Harðbak EA í jólaskapi á miðunum

Frábær matur og keppt í spurningaleik á litlu jólunum / myndir samherji.is

Frábær matur og keppt í spurningaleik á litlu jólunum / myndir samherji.is

Borðin svignuðu undan kræsingum í Harðbak EA 3, togara ÚA um síðustu helgi. Kristinn kokkur hafði undirbúið innkaup aðfanga vel og vandlega fyrir eins og venjulega, að þessu sinni þurfti þó að gera ráð fyrir veglegum litlu jólunum um boðs eins og vera ber á sjálfri aðventunni.

Sérstakur jólamatseðill var útbúinn, rétt eins og á góðum veitingahúsum og undirstrikað var að ætlast væri til snyrtilegs klæðnaðar við borðhaldið, enda hátíð um borð.

Ekki var gert hlé á veiðum, efnt var til spurningaleika á milli vakta og vegleg verðlaun auðvitað í boði. 

Heimasíðan fékk sendar nokkrar myndir frá litlu jólunum, sem segja meira en mörg orð og við látum þær þess vegna tala sínu máli.

Samherji

Stefán Viðar snýr heim til Íslands

Baldvin Þorsteinsson og Stefán Viðar Þórisson um borð í Cuxhaven NC í vikunni/myndir samherji.is

Baldvin Þorsteinsson og Stefán Viðar Þórisson um borð í Cuxhaven NC í vikunni/myndir samherji.is

Stefán Viðar Þórisson sem hefur verið skipstjóri á þýska frystitogaranum Cuxhaven NC 100 frá því skipið var tekið nýtt í notkun árið 2017, færir sig á næstunni yfir á Snæfell EA 310, frystitogara Samherja. Stefán Viðar hefur verið skipstjóri á skipum Samherja í um tvo áratugi, lengst af erlendis.

Í vikunni var landað um 670 tonnum af afurðum úr Cuxhaven í Hafnarfirði en Stefán Viðar var einmitt skipstjóri í túrnum sem tók alls fimmtíu sólarhringa.

Snæfell hélt til veiða á þriðjudaginn undir stjórn Pálma Hjörleifssonar en Stefán Viðar verður skipstjóri á móti Pálma.

Toppkarlar í hverju plássi

Baldvin Þorsteinsson framkvæmdastjóri Deutsche Fishfang Union sem gerir út Cuxhaven kvaddi Stefán Viðar í Hafnarfjarðarhöfn og færði honum blómvönd í tilefni þessara tímamóta.

Stefán Viðar segist kveðja Cuxhaven með söknuði en hlakka jafnframt til að taka við nýjum verkefnum uppi á Íslandi.

„Þessi síðasta veiðiferð á Cuxhaven gekk vel í alla staði, þótt veiðin hafi verið frekar dræm í restina. Við vorum í grænlenskri lögsögu, norðan við Dohrnbanka. Cuxhaven er frábært skip í alla staði og áhöfnin er traust og góð, valinn maður í hverju rúmi. Ég fæ núna smá fríi, þar sem Pálmi verður skipstjóri á Snæfellinu og svo tek ég væntanlega næsta túr. Mér líst vel á skipið og allan aðbúnað um borð, þar sem toppkarlar eru í hverju plássi.“

Varð skipstjóri aðeins 26 ára gamall

Stefán Viðar er 42 ára en með gríðarlega reynslu. Hann útskrifaðist frá Stýrimannaskólanum í Reykjavík með skipstjórnarréttindi vorið 2001 og á námsárunum var hann háseti á Víði EA, togara Samherja. Árið 2004 lá leiðin til Deutsche Fishfang Union, Evrópuútgerðar Samherja. Fyrst sem stýrimaður á frystitogaranum Kiel NC og þar á eftir Wiesbaden GDY, sem er systurskip Kiel.

Hann varð skipstjóri Wieisbaden, aðeins 26 ára gamall og síðan þá hefur Stefán Viðar stýrt ýmsum skipum Deutsche Fishfang Union, síðast Cuxhaven NC.

Til þess að geta stýrt þessum erlendu togurum aflaði Stéfán Viðar sér skipstjórnarréttinda í Bretlandi og Þýskalandi, auk íslenskra eins og áður er getið.

Síðasti túrinn og bráðum fyrsti túrinn

„Cuxhaven vakti mikla athygli á sínum tíma enda skipið vel búið á allan hátt, bæði hvað varðar vélbúnað, vinnslu og aðbúnað áhafnar. Þótt Snæfellið sé eldra skip er það afar vel búið, þannig að í mínum huga ríkir bara tilhlökkun vegna þessa næsta verkefnis hjá Samherja. Ég á því láni að fagna að eigendurnir hafa treyst mér fyrir stórum verkefnum og fyrir það er ég þakklátur. Þetta hefur verið farsælt samband, traust á báða bóga. Ég hef náð að skoða Snæfellið ágætlega og líst vel á þær breytingar sem gerðar hafa verið á skipinu á undanförnum mánuðum. Þótt ég hafi verið í mínum síðasta túr á stóru og öflugi skipi, getum við líka sagt að ég fari senn í minn fyrsta túr á stóru og öflugu skipi og slíkar breytingar eru bara hressilegar. En fyrst er samt sem áður að halda heim til Reyðarfjarðar.“

Mikil umsvif þegar skipin eru í landi

„Það eru töluverð umsvif í landi þegar svona stór skip koma til hafnar og margir eru kallaðir til. Löndunargengi sjá um löndun og flutningafyrirtæki þurfa að vera tilbúin svo að segja strax og lagst er að bryggju. Oftar en ekki er óskað eftir þjónustu ýmissa fyrirtækja vegna endurbóta og viðhalds, það er því mikið um að vera þegar skipin eru í landi. Þannig var þetta í Hafnarfjarðarhöfn í vikunni og þannig verður þetta þegar Snæfell kemur til löndunar í framtíðinni,“ segir Stefán Viðar Þórisson verðandi skipstjóri á Snæfelli EA 310 og fráfarandi skipstjóri Cuxhaven NC 100.“

Halda áfram að lesa

Samherji

Nýr frysti- og kælibúnaður ÚA eykur rekstraröryggi fiskvinnslunnar – Vélstjóri fylgist með búnaðinum í gegnum farsíma

Frystigeymslur ÚA eru stórar og miklar/myndir samherji.is

Frystigeymslur ÚA eru stórar og miklar/myndir samherji.is

Frysti- og kælibúnaður fiskvinnslu Útgerðarfélags Akureyringa hefur verið uppfærður að stórum hluta á síðustu tveimur árum. Með nýjum búnaði eykst rekstraröryggi og hagræði til mikilla muna, auk þess sem kerfin eru umhverfisvænni en þau gömlu.

Kælismiðjan Frost á Akureyri var helsti verktakinn í breytingunum en Frost er leiðandi fyrirtæki í kælitækni hér á landi. Guðmundur Hannesson framkvæmdastjóri segir að verkefnið í ÚA hafi verið nokkuð umfangsmikið og á köflum flókið.

Mikil sjálfvirkni

„Viðhald búnaðarins hefur verið með ágætum í gegnum tíðina en engu að síður var kominn tími á endurnýjun og uppfærslur. Í kerfum hússins sem áður hýsti rækjuverksmiðjuna Strýtu var notast við freon sem kælimiðil en uppfærður búnaður notar ammoniak sem er algjörlega náttúrulegt efni. Sjálfvirknin er líka umtalsverð og nýi búnaðurinn nýtir orkuna margfalt betur en sá gamli. Í sjálfu fiskvinnsluhúsi ÚA hefur kæli- og frystikerfið sömuleiðis verið endurnýjað, þar voru settar upp kælipressur með mun betri nýtingu en þær gömlu, sem höfðu þjónað sínum tilgangi vel og lengi. Einnig voru settir upp plötuvatmaskiptar sem nýta orkuna mun betur.“

ÚA stendur framarlega á sviði kæli- og frystibúnaðar

„Helsta áskorunin í þessu öllu saman var sjálfsagt að samþætta nýjan og eldri búnað, sem var að mestu gert þegar fiskvinnsla lá niðri vegna sumarleyfa. Þess vegna var lögð höfuðáhersla á góðan og vandaðan undirbúning á öllum sviðum og ég segi hiklaust að vel hafi tekist til. Framkvæmdum er ekki lokið að fullu en með þeim uppfærslum sem þegar eru að baki er engu að síður hægt að fullyrða að Útgerðarfélag Akureyringa stendur ansi framarlega hvað kæli- og frystibúnað snertir.“

Álag á búnaði allt annað

Guðmundur segir að tækniframfarir í frysti- og kælikerfum séu örar.

„Já, sannarlega en þó snýst þetta svo sem alltaf um hið sama, kæla eða frysta afurðir. Við getum hæglega borið þetta saman við framleiðslu á bílum, sem hafa alla tíð verið á fjórum dekkjum. Í dag sjá tölvur um eftirlit og öryggið hefur aukist til mikilla muna, auk þess sem orkunýtingin er til muna betri en á árum áður. Á eldri pressunum keyrðu mótorarnir alltaf á fullu álagi, hvort sem mikið álag var á kerfinu eða ekki. Á því nýja er álagið alltaf í samræmi við þörfina á hverjum tíma.“

Samanburðurinn eins og svart og hvítt

Jakob Björnsson vélstjóri hjá ÚA segir að nýja kerfið reynist vel. Auk Frosts sáu Rafeyri og Raftákn um framkvæmdir ásamt starfsfólki Útgerðarfélags Akureyringa og Samherja.

„Þetta er gríðarleg breyting, það er ábyggilegt. Ég er ekki frá því að orkusparnaðurinn sé á bilinu 20 til 30 prósent og það munar um minna. Núna sjá tölvurnar um að fylgjast með mörgum þáttum, þannig að rekstraröryggið er allt annað. Rafmagnið hefur sömuleiðis verið endurnýjað að stórum hluta, svo sem í aðaltöflum. Þótt gamla kerfið hafi á margan hátt verið ágætt, er samanburðurinn eins og svart og hvítt.“

Fylgist með búnaðinum í gegnum farsímann

„Já, ég get fylgst með öllu kerfinu í gegnum farsímann minn. Ef eitthvað bilar fæ ég skilaboð samstundis og í því felst auðvitað mikið öryggi. Þessar breytingar hafa í raun gengið ótrúlega vel fyrir sig, enda var kappkostað að vanda allan undirbúning. Við búum svo vel hérna á Akureyri að geta leitað til fyrirtækja sem hafa góða þekkingu á sviði fiskvinnslu, sem er klárlega mikils virði. Enda er Eyjafjarðarsvæðið þekkt víða um heiminn fyrir faglega þjónustu og góðar lausnir á sviði sjávarútvegsmála,“ segir Jakob Björnsson vélstjóri hjá Útgerðarfélagi Akureyringa.

Halda áfram að lesa

Samherji

Samherji og Útgerðarfélag Akureyringa samnýta veiðiheimildir félaganna

Unnið á dekki /mynd samherji.is

Unnið á dekki /mynd samherji.is

Samherji hf. vill koma neðangreindum upplýsingum á framfæri vegna umfjöllunar Kjarnans um kvótaleigu Samherja Íslands ehf.

Í umfjöllun Kjarnans um ársreikning Samherja Íslands ehf. kemur fram að félagið hafi haft rúman milljarð króna í tekjur á síðasta ári vegna kvótaleigu miðað við meðalgengi evru það ár. Auðveldlega má skilja þessa umfjöllun þannig að um sé að ræða tekjur vegna kvótaleigu til utanaðkomandi aðila, sem er alls ekki raunin.

Útgerðarfélag Akureyringa ehf. og Samherji Ísland ehf., sem bæði eru sjálfstæð félög en að öllu leyti í eigu Samherja hf., samnýta veiðiheimildir til að afla hráefnis til vinnslu á Dalvík og Akureyri. Viðskipti milli þessara félaga, m.a. með veiðiheimildir, eiga að vera gagnsæ og frá þeim ber að greina svo sem gert er í reikningum félaganna. Félögin eru jafnframt samsköttuð. Hér er því ekki um raunverulegar leigugreiðslur til þriðja aðila að ræða heldur innbyrðis viðskipti innan Samherja hf. sem ber að greina frá með þessum skilmerkilega hætti.

Af virðingu fyrir sögu félagsins og þýðingu þess fyrir samfélagið á Akureyri hefur Útgerðarfélag Akureyringa ehf. verið rekið sem sjálfstætt félag. Hafa botnfiskútgerð og botnfiskvinnsla Samherja hf. því verið rekin á þessum tveimur kennitölum þótt reglulega hafi komið til tals að sameina félögin.

Kjarninn hefur sýnt samstæðu Samherja hf. mikinn áhuga í gegnum tíðina. Ritstjórn miðilsins ætti því að vera vel kunnugt um uppbyggingu hennar og viðskipti milli félaga innan samstæðunnar.

Að lokum má geta þess, að Samherji hf. hefur ekki greitt arð til eigenda sinna s.l. þrjú rekstrarár.

Þorsteinn Már Baldvinsson, forstjóri Samherja. 

Halda áfram að lesa

Vinsælast

Allur réttur áskilin © Tíðin