Landlæknir

Tannverndarvika 1. – 5. febrúar 2021

29.01.21

 Embætti landlæknis og Tannlæknafélag Íslands standa fyrir tannverndarviku 1.-5. febrúar 2021 með skilaboðum til landsmanna um að huga vel að heilsunni. Áhersla verður á súra orkudrykki sem innihalda koffín en öll þurfum við að vera betur upplýst um skaðleg áhrif orkudrykkja bæði á almenna heilsu og tannheilsu ungmenna.

Aðgerða er þörf svo draga megi úr neyslu á orkudrykkjum, sem innihalda koffín en neysla íslenskra ungmenna í 8.-10. bekk er með því mesta sem þekkist í Evrópu. Þá eru auk þess vísbendingar um að ungmenni geti keypt orkudrykki með mjög háu koffín magni, sem ekki er leyfilegt að selja einstaklingum yngri en 18 ára. Neyslan eykst með hækkandi aldri en einn af hverjum þremur í 8. bekk og um helmingur í 10. bekk segjast drekka orkudrykki.

Ungt fólk virðist í auknum mæli velja þessa drykki í þeirri trú að þeir séu hollir og stuðli að hreysti. Auðvelt er að draga þá ályktun þegar um sykurlausan vítamínbættan drykk er að ræða. Það er hins vegar staðreynd að allir orkudrykkir eru „súrir“ sem þýðir að sýrustig þeirra er lágt (pH< 5.5) og því hafa þeir allir glerungseyðandi áhrif á tennur. Bæði sætir og sykurlausir orkudrykkir leysa upp glerung tannanna, sem þynnist og eyðist og myndast ekki aftur. Vandinn getur náð yfir allar tennurnar, sem verða viðkvæmar fyrir kulda og meiri hætta er á tannskemmdum. Glerungseyðing er vaxandi vandamál hjá börnum og ungmennum á Íslandi.

Í tannverndarviku eru stjórnendur verslana hvattir til að huga að framboði, aðgengi og markaðssetningu orkudrykkja sem innihalda koffín. Stjórnendur grunn- og framhaldsskóla eru hvattir til að leggja áherslu á fræðslu, umfjöllun og viðburði sem tengjast orkudrykkjum.

Eftirfarandi fræðsluefni verður aðgengilegt í streymi á vefsíðu embættis landlæknis í tannverndarviku:

Orkudrykkur– draumur í dós eða hvað?
Jóhanna E. Torfadóttir, næringar- og lýðheilsufræðingur

Hvernig getum við komið í veg fyrir glerungseyðingu tanna.
Íris Þórsdóttir, tannlæknir

Orkudrykkir eru óþarfi.
Pálmar Ragnarsson, körfuboltaþjálfari

Að venju eru fyrirtæki sem flytja inn og selja tannhirðuvörur hvött til að nýta sér tannverndarvikuna til að kynna vörur sínar.

Hólmfríður Guðmundsdóttir,
tannlæknir

Landlæknir

Um gildistíma COVID-19 bólusetningavottorða á landamærum innan Evrópu

Þann 1. febrúar nk. tekur gildi ákvörðun framkvæmdastjórnar Evrópusambandsins (European Commission; EC) um að COVID-19 bólusetningaskírteini fái 9 mánaða gildistíma frá grunnbólusetningu fyrir 16 ára og eldri. Forritin sem lesa skírteinin á landamærum munu reikna gildistímann út frá dagsetningu síðasta skammts grunnbólusetningar. Ef lengra er liðið en 9 mánuðir frá grunnbólusetningu mun vottorðið teljast ógilt á landamærum alveg sama hvað stendur á því.

Halda áfram að lesa

Landlæknir

Finnum gleðina og slöbbum saman

Heilsueflandi samfélag á vegum embættis landlæknis tekur höndum saman með ÍSÍ, UMFÍ og Sýn og hvetur fólk til að hreyfa sig og almennt finna gleðina í skammdeginu. Fátt hefur jafn jákvæð áhrif fyrir andlega, líkamlega og félagslega heilsu okkar og líðan en regluleg hreyfing og almenn virkni.

Halda áfram að lesa

Landlæknir

Skráning COVID-19 bólusetninga erlendis frá

Fólk sem hefur verið bólusett gegn COVID-19 erlendis en er búsett hér á landi er hvatt til að láta skrá bólusetningarnar formlega í kerfin okkar ef það hefur ekki gert það nú þegar.

Halda áfram að lesa

Vinsælast

Allur réttur áskilin © 2021 Tíðin