25. febrúar.2021 | 13:12

Samstarf um opinbera nýsköpun

Til þess að leysa þann fjölþætta vanda sem við stöndum frammi fyrir í umhverfismálum þarf allt að hjálpast að, í lykilhutverki er nýsköpun sem styður við umbreytingu til umhverfisvænna samfélags.  Ein leið sem farin hefur verið hjá Umhverfisstofnun er að halda svokölluð hakkaþon eða hugmyndasmiðjur sem miða að því að finna lausnir. Þar sem undirbúningur við slíka viðburði getur verið flókinn útbjó stofnunin Leiðarvísir um Hakkaþon sem nú er komin á vef um opinbera nýsköpun. Vefurinn sem er á forræði fjármála- og efnahagsráðuneytisins er ætlaður opinberum aðilum til þess að miðla verkefnum sín á milli og endurnýta góðar hugmyndir. Við hvetjum alla til að skoða leiðbeiningarnar og aðrar góðar hugmyndir sem á vefnum má finna.

Umhverfisstofnun leggur áherslu á að vera í virku samstarfi við mismunandi aðila samfélagsins. Þar á meðal stofnanir sem í störfum sínum sinna tengdum eða líkum verkefnum. Einnig er lögð áhersla á að miðla þeirri reynslu og þekkingu sem stofnunin öðlast í störfum sínum sem geta nýst öðrum í sambærilegum sporum og þá er vefur eins og þessi frábær vettvangur.

24. febrúar.2021 | 13:29

Námskeið um meðferð plöntuverndarvara og útrýmingarefna 8. – 12. mars 2021

Landbúnaðarháskóli Íslands heldur námskeið um meðferð plöntuverndarvara og útrýmingarefna dagana 8. – 12. mars n.k. að Keldnaholti í Reykjavík. Námskeiðið er ætlað þeim sem hyggjast nota plöntuverndarvörur eða útrýmingarefni í atvinnuskyni, annað hvort við eyðingu meindýra eða í landbúnaði eða garðyrkju. Námskeiðinu er skipt upp í þrjá hluta fyrir eftirfarandi markhópa:

• Þá sem hyggjast gerast ábyrgðarmenn í markaðssetningu plöntuverndavara eða útrýmingarefna,
• Þá sem hyggjast nota plöntuverndarvörur í landbúnaði og garðyrkju, þ.m.t. garðaúðun,
• Þá sem hyggjast nota útrýmingarefni við eyðingu meindýra.

Hægt er að taka einstaka hluta námskeiðsins eða alla hluta í heild sinni. Námskrá námskeiðsins byggist á ákvæðum í reglugerð um meðferð varnarefna. Til þess að öðlast þau réttindi sem námskeiðið veitir þarf að standast próf í lok námskeiðs.

Nánari upplýsingar má nálgast á heimasíðu Landbúnaðarháskóla Íslands, einnig er hægt að senda tölvupóst á [email protected].

Skráning fer fram hér: https://endurmenntun.lbhi.is/varnarefni/

Umhverfisstofnun gefur út notendaleyfi fyrir þá sem kaupa og nota notendaleyfisskyldar vörur. Þeir sem nota útrýmingarefni til eyðingar meindýra skulu hafa notendaleyfi fyrir útrýmingarefnum og þeir sem nota plöntuverndarvörur í landbúnaði og garðyrkju þ.m.t. garðaúðun skulu hafa notendaleyfi fyrir plöntuverndarvörum.