Veður

Vatnshæð við brúna yfir Jökulsá á Fjöllum hefur farið lækkandi síðustu daga

Aftur er komið á samband við vefmyndavél sem staðsett er á mælaskúr Veðurstofunnar sem fór á hliðina í krapaflóðinu. (Ljósmynd: Veðurstofa Íslands)


Vísbendingar um að krapaþekjan sé að þynnast. Ótakmarkaðri umferð hleypt á brúna.

8.2.2021

Uppfært 08.02. kl. 15.30

Vatnshæð við brúna yfir Jökulsá á Fjöllum hefur farið lækkandi síðustu daga. Myndir af árfarveginum ofan við brúna sýna að opið rennsli vatns hefur aukist og á radarmyndum eru vísbendingar um að krapaþekjan sé að þynnast. Því er talið að líkur á krapahlaupi líkt og það sem varð 26. janúar hafi farið mjög minnkandi.  Því hefur verið tekin ákvörðun í samráði við Vegagerðina að hleypa ótakmarkaðri umferð yfir brúna við Grímsstaði. Þó eru aðstæður í ánni stöðugt vaktaðar og brugðist við af aðstæður breytast.

Uppfært 05.02. kl. 16.30

Almannavarnadeild ríkislögreglustjóra, lögreglan á Norðurlandi eystra, Vegagerðin, Veðurstofan og sveitastjóri Skútustaðahrepps funduðu í morgun vegna Jökulsár á fjöllum.

Enn er vatnshæð há í Jökulsá á Fjöllum við brúarstæðið yfir ána, eða um 5 m.  Vatnshæð hefur farið hægt lækkandi frá 1. febrúar en búast má áfram við sveiflum í henni.  Enn er töluverður ís og krapi ofan og neðan við brúna, en frá því í gær hefur opið rennsli um miðjan krapann farið stækkandi, sem er jákvæð þróun. 

Næstu daga verður áfram kalt í verði og því fyllsta ástæða til þess að fylgjast vel með aðstæðum.  Vegagerðin vaktar brúna á opnunartíma, Veðurstofan fylgist með vatnsmælum og sérsveit ríkislögreglustjóra aðstoðar lögregluna á norðurlandi eystra við gagnasöfnun með reglulegu drónaflugi. 

Í ljósi þess að dag lengir og jákvæð teikn eru á lofti hvað varðar krapastífluna hefur verið ákveðið að lengja opnunartíma fyrir umferð.  Vegurinn verður opinn næstu daga á milli 09:00-19:00, en lokaður utan þess tíma. 

Þetta fyrirkomulag verður endurskoðað á mánudaginn 8. febrúar að öllu óbreyttu.

Ljósmynd sem sýnir að Jökulsá á Fjöllum hefur brotið sér farveg í gegnum krapann sem er vísbending um að áin sé að bræða af sér krapann. (Ljósmynd: Lögreglan á Norðurlandi eystra)

Uppfært 03.02. kl. 11.45

Almannavarnadeild ríkislögreglustjóra, lögreglan á Norðurlandi eystra, Vegagerðin og Veðurstofan funduðu í morgun vegna Jökulsár á Fjöllum. Í gær var veginum um Mývatnsöræfi lokað vegna aukinnar hættu á öðru þrepahlaupi í ánni. 

Sérfræðingar Veðurstofunnar fóru í könnunarflug eftir ánni í gær. Mikill krapi er enn í ánni og heldur ís áfram að safnast upp á meðan kalt er í veðri. Flogið var eftir ánni og farvegurinn kannaður talsvert norðan við brúna og allt suður að Herðubreið. „Það er greinilega mikill krapi ennþá í ánni og nær hann rúma 3 km upp ána frá brúnni. Við sáum þó engar vísbendingar í fluginu í gær um að nýjar stíflur væri að myndast sem gætu framkallað svipað flóð og kom um daginn“, segir Jón Ottó Gunnarsson, sérfræðingur í mælarekstri á Veðurstofunni. „Þessi lækkun á vatnshæð við brúna í gær voru líklega merki um að áin væri að bræða af sér krapa og vatn þannig að finna sér leið undir krapanum. Það er vonandi að veðrið vinni með okkur og áin losni smám saman úr klakaböndum, án þess að það komi til flóðs“, segir Jón Ottó.

Það sem oftast hefur gerst þegar krapastífla myndast á þessum stað er að áin hefur fundið sér farveg og bræðir af sér stífluna jafnt og þétt með hjálp vatnshitans sem getur verið 2 °C og jafnvel meiri ef milt er í veðri. „Við getum í raun ekki útilokað annað flóð og því nauðsynlegt að fylgjast áfram náið með þróun mála“, segir Gunnar Sigurðsson, hópstjóri vatnamælikerfa á Veðurstofunni. Flóðið 26. janúar var í raun mjög sjaldgæfur atburður og ekki hefur orðið slíkur atburður frá því að vatnshæðamælirinn var settur upp árið 1965. Það er því heilmikill lærdómur sem við getum dregið af þessum atburði og eykur skilning okkar á því hvernig áin hagar sér“, segir Gunnar.

Niðurstöður fundarins voru þær að óhætt er að opna veginn aftur með þeim takmörkunum sem áður voru. Vegurinn verður opinn næstu daga á milli 09:00-18:00, en lokaður utan þess tíma.  Þetta fyrirkomulag verður endurskoðað á föstudaginn að öllu óbreyttu.


Úr eftirlitsfluginu í gær. Hér má sjá þann stað í ánni þar sem líklegt er að stífla hafi myndast sem framkallaði hlaupið þann 26. janúar. Talsverður krapi og ís er enn í ánni. Hér að neðan er kort sem sýnir flugleið eftirlitsflugsins. Guli punkturinn táknar þann stað í ánni sem myndin sýnir. (Ljósmynd: Veðurstofa Íslands/Jón Ottó Gunnarsson)


Uppfært 02.02. kl. 15.30

Vatnshæðamælar við brúna yfir Jökulsá á Fjöllum sýna að vatnshæð hefur lækkað frá því síðdegis í gær. Sú lækkun getur verið vísbending um að áin sé að bræða krapann ofan af sér og losa þannig hægt og rólega um krapann á yfirborðinu. Vatnshæðin við brúna er ennþá mjög há vegna krapans í ánni, en engu að síður rennur áin undir honum og er vatnsrennsli um 100 m3/s sem er eðlilegt miðað við árstíma. Framvinda þessa atburðar veltur því að miklu leyti á veðurástandi á svæðinu næstu daga, en þar er áfram gert ráð fyrir talsverðu frosti.

Á þessum tímapunkti er þó ekki hægt að útiloka að aðrar krapastíflur séu að myndast sunnar í ánni. Farið verður í eftirlistflug til að kanna betur aðstæður í ánni. Óvissustig er ennþá í gildi og er svæðið er áfram vaktað. Vegurinn er lokaður en gert er ráð fyrir að ákvörðun um vegaopnun verður tekin af lögreglu á Norðurlandi eystra eftir stöðufund viðbragðsaðila í fyrramálið, miðvikudaginn 3. febrúar.


Uppfært 02.02. kl. 12.20

Lögreglan á Norðurlandi Eystra ásamt Vegagerðinni hafa lokað þjóðvegi 1 frá Námaskarði að gatnamótum Vopnafjarðarafleggjara. Hjáleið er um Norðausturströndina, Húsavík, Þórshöfn og Vopnafjörð. Ástæðan fyrir þessari lokun eru vísbendingar eru um að hreyfing sé komin á klakastíflu sunnan við brúna yfir Jökulsá á Fjöllum. Verið að er að kanna aðstæður og Veðurstofan fylgist vel með mælitækjum í og við ána. Vatnshæð hefur lækkað við brúna sem bendir til klakastíflu í ánni, eins hefur jarðskjálftamælir nemið óróa sem gefur vísbendingar um hreyfingar á ís í ánni.

Uppfært 01.02. kl. 11.30

Enn er mikill krapi og ís í Jökulsá á Fjöllum og vatnsstaða við brúna á þjóðvegi 1 er enn há. Áfram er spáð miklum kulda og því má áfram búast við svipuðum aðstæðum í ánni næstu daga.  Á meðan ástandið varir, er enn yfirvofandi hætta á að krapastíflur bresti ofar í ánni sem geta valdið hættu eða tjóni á og við brúna.

Að þessum sökum verða áfram takmarkanir á umferð, en vegurinn er opinn á milli 09:00-18:00 og verður vakt á staðnum til þess að fylgjast með ef einhverjar breytingar verða.  Þetta fyrirkomulag verður endurskoðað á miðvikudaginn næstkomandi nema aðstæður breytist verulega. 


Uppfært 31.01. kl. 15.25

Vatnshæðamælir við brúna sýnir lítilsháttar lækkun frá því í gærmorgun þegar vatnshæðin náði hámarki. Einnig hafa verið gerðar handvirkar mælingar á staðnum og ber þeim saman við þá lækkun sem mælar Veðurstofunnar sýna. Áfram er þó fylgst náið með þróun mála. Óvissustig almannavarna enn í gildi.


Uppfært 30.01. kl. 14.10

Mælir við brúna yfir Jökulsá á Fjöllum sýnir að vatnshæð hefur hækkað rólega frá því kl. 15 í gær. Sjáanleg hækkun er einnig í ánni og er stöðugt verið að meta aðstæður við brúna og á veginum í næsta nágrenni. Reglulegir stöðufundir eru haldnir að leggja frekara mat á aðstæður og þróun mála. Áfram verður lokað fyrir umferð um svæðið á þjóðvegi 1 frá kl. 18:00 – kl. 09:00.


Uppfært 29.01. kl. 20.20

Óbreytt ástand er við Jökulsá á Fjöllum. Áfram verður lokað fyrir umferð um svæðið á þjóðvegi 1 frá kl. 18:00 – kl. 09:00 fram á mánudag. Miðað við veðurspá næstu daga er líklegast að ástand árinnar haldist nokkuð stöðugt. Sérfræðingar Veðurstofunnar gera ráð fyrir að fara í vettvangsferð á sunnudag til að meta aðstæður og huga að mælitækjum. Í framhaldinu verður tekin ákvörðun um næstu skref nema að aðstæður breytist í millitíðinni.

Það er ljóst af þeim gögnum og myndum sem Veðurstofan hefur skoðað af svæðinu að mikið hefur gengið á þegar Jökulsá ruddi sig síðdegis á þriðjudag. Sem dæmi um hversu mikil lætin voru og ef til vill einnig hversu næmir jarðskjálftamælar Veðurstofunnar eru, þá sýnir jarðskjálftamælir sem staðsettur er við Grímsstaði á Fjöllum aukningu í óróa um það leyti sem krapahlaupið varð. Mælirinn er staðsettur í um 3,5 km frá brúnni yfir Jökulsá á Fjöllum. Ekki er þó hægt að staðsetja upptök þessa óróa út frá þessum eina mæli, né að staðfesta að óróinn sem hann nemur sé vegna hlaupsins í ánni. Engu að síður áhugavert og eitthvað sem sérfræðingar Veðurstofunnar muni skoða nánar og meta hvernig þessar upplýsingar mögulega nýtist til að greina þennan atburð betur.

IMG_4226

Óróinn sem jarðskjálftamælirinn við Grímsstaði nam sést hér neðst í þessu grafi. Greinilegur órói sést á grafinu um það leyti sem vatnshæðamælar hafa skráð tímasetningu krapahlaupsins í Jökulsá á Fjöllum sem var milli 15.20 og 15.30.

Uppfært 28.01. kl. 15.39

Ríkislögreglustjóri, í samráði við lögreglustjórann á Norðurlandi eystra, hefur ákveðið að lýsa yfir óvissustigi almannavarna vegna krapastíflu og flóðahættu í Jökulsá á Fjöllum, á milli Mývatnssveitar og Egilsstaða.

Sérfræðingar Veðurstofunnar vakta ástandið náið og eru aðstæður metnar þannig að ekki er hægt að útiloka að frekari flóð verði í ánni sem geti skapað hættu á svæðinu næst brúnni. Vatnshæð getur aukist við brúna á mjög skömmum tíma og skapað varasamar aðstæður fyrir vegfarendur. Verið er að rýna í fleiri göng m.a. gervihnattamyndir til að meta ástandið í farvegi árinnar ofan við brúna til að sjá hvort stíflur séu að myndast og þá um leið meta líkurnar á frekari flóðum. Eins er verið að kanna hvaða möguleikar eru á uppsetningu mælibúnaðar ofar í ánni svo hægt sé að segja til um hlaup með lengri fyrirvara.

Lokað verður fyrir umferð um svæðið á þjóðvegi 1 frá kl. 18:00 – kl. 09:00 næstu fjóra daga. Umferð um veginn verður stýrt þess utan.

Uppfært 28.01. kl. 11.00

Veðurstofan fylgist grannt með Jökulsá á Fjöllum eftir að áin ruddi sig með látum um miðjan dag á þriðjudag. Vatnsborðið hækkaði um 180 cm á einni mínútu þegar mest var. Veginum var lokað síðdegis sama dag vegna krapa sem ruddist upp og yfir veginn við brúna. Engar skemmdir urðu á brúnni og ekki er vitað til þess að vegurinn sé skemmdur. Umferð var hleypt á veginn undir eftirliti tímabundið í gær, miðvikudag, en var svo lokað kl. 18 í varúðarskyni þar sem ekki var hægt að fylgjast með ánni vegna myrkurs.

Áin hefur ekki rutt sig með þessum hætti svo vitað sé

Það er ljóst að mikið hefur gengið á við brúna. Skúr sem í eru mælitæki Veðurstofunnar virðist hafa lyfst upp og dregist til við bakka árinnar. Liggur hann nú svo til á hliðinni en vatnshæðargögn eru enn sem komið er að berast frá mælistöðinni. „Það sem líklega hefur átt sér stað er að áin hefur rutt sig þegar uppsafnað vatn ofar í farveginum hleypur fram“ segir Jón Ottó Gunnarsson, sérfræðingur í mælarekstri á Veðurstofu Íslands, en hann er einn af þeim sérfræðingum sem fylgst hefur grannt með gangi mála frá því í gær. Vatnhæðamælir Veðurstofunnar nemur flóðatoppinn um kl. 15.20 til 15.30 í gær. Eins og sjá má í grafinu hér að neðan hækkaði vatnsborðið um 180 cm á aðeins einni mínútu en heildarhækkun í atburðinum var 250 cm.

Mælitæki Veðurstofunnar sýna að hlaupið hafi orðið í kringum 15.20 og 15.30 á þriðjudag. Hækkaði vatnsborðið um 180 cm á aðeins einni mínútu en heildarhækkun í atburðinum var 250 cm.

„Hér er um svokallað þrepahlaup að ræða, en slík hlaup geta orðið við vissar aðstæður í ánni“, segir Jón Ottó. Þrepahlaup er þegar ísstíflur bresta hver af annarri og flóðöldur magnast oft þrep af þrepi. „Það að ís hrannist upp á þessum stað er ekki óþekkt í Jökulsá á Fjöllum, en hingað til hefur áin ekki rutt sig með þessum hætti svo vitað sé. Það er mjög mikilvægt að fylgjast grannt með ánni því það geta skapast mjög varasamar aðstæður, eins og til dæmis við þessi þrepahlaup og vatnshæð getur þá aukist við brúna á mjög skömmum tíma“, segir Jón Ottó. Sérfræðingar Veðurstofunnar stefna á að fara á vettvang á næstu dögum og meta aðstæður, en sólarhringsvakt Veðurstofunnar fylgist grannt með gangi mála í góðri samvinnu við Vegagerðina og lögregluna á Norðurlandi eystra. 

Krapi er yfir ánni eins langt og augað eygir. Skúr Veðurstofunnar sem hýsir vatnamælingabúnað er nánast á hliðinni en merkilegt nokk sendir vatnshæðamælir ennþá merki til vaktar Veðurstofunnar. Ljósmynd: Lögreglan á Norðurlandi Eystra 

Stórar krapastíflur hafa áður myndast á sömu slóðum 

Krapastíflur í Jökulsá á Fjöllum myndast þegar mjög kalt er í veðri og skafrenningur. Vatnshiti lækkar þá hratt niður að frostmarki. Mikill krapaburður verður í ánni og við stefnubreytingu eða hindranir hrannast krapinn upp og byrjar að frjósa saman. 

Ofarlega á vatnasviði Jökulsár á Fjöllum rennur lindarvatn í ána, og finnur það sér oftast farveg undir ísnum og getur runnið þar óhindrað. Neðar geta myndast miklar ísrendur eða skarir. Ef rennsli eykst skyndilega, hvort sem er þegar losar um stíflu eins og nú, eða vegna snarprar hlýnunar í veðri og hláku, getur áin rutt sig með miklum látum.  Þá lyftir vatnið undir ísinn, brýtur hann upp og hann flýtur af stað. Stundum brotna upp stórir flekar. Flekarnir berast svo niður ána, stranda á hindrun eða grynningum. Síðan berst krapi og fleiri jakar að þeim sem eru þegar strandaðir og þannig byrjar ís að hrannast upp. Það sem oftast hefur gerst þegar krapastífla myndast á þessum stað er að áin hefur fundið sér farveg og bræðir af sér stífluna jafnt og þétt með hjálp vatnshitans sem getur verið 2 °C og jafnvel meiri ef milt er í veðri.

Þann 20. janúar 2015 byrjaði ís að hrannast upp við brúna við Grímsstaði. Íshellan sem þá lá yfir ánni og bökkunum brotnaði upp og hrannir, og ísruðningur safnaðist fyrir. Það var þá stærsta krapastífla í ánni síðan í desember 2010 og þakti nokkra kílómetra farvegarins. Ekki hefur tekist að meta umfang stíflunnar nú sökum lélegs skyggnis, en sérfræðingar Veðurstofunnar vonast til að geta lagt mat á það þegar þeir komast á staðinn.

Veður

Skjálftahrinan á Reykjanesskaga enn í gangi


Ný gögn gefa ástæðu til að skoða nánar þá sviðsmynd sem snýr að kvikuinnskoti undir svæðinu við Fagradalsfjall

2.3.2021

Uppfært 02.03. kl. 8.10

Hrinan á Reykjanesskaga stendur enn yfir og er mesta virknin nú bundin við nágrenni Keilis og Trölladyngju. Aðeins dró úr virkninni í gærkveldi en upp úr kl. 22 jókst hún aftur. Á miðnætti mældist skjálfti M3.6 að stærð 1.3 km NA af Trölladyngju. Rétt um klukkan 3 í nótt mældust svo tveir skjálftar yfir stærð 4. Sá fyrri var kl 02:53 1.3 km SV af Keili og var 4.3 að stærð. Sá seinni var í Fagradalsfjalli, kl 03:05, 4.6 að stærð. Þeirra varð beggja vel vart á Suðvesturhorninu og þess seinni alveg austur á Hellu og í Vestmannaeyjum.


Uppfært 01.03. kl. 18.15

Vísindaráð almannavarna fundaði á fjarfundi í dag til að ræða jarðskjálftahrinuna á Reykjanesskaga. Fundinn sátu fulltrúar frá Veðurstofu Íslands, Háskóla Íslands, Umhverfisstofnun, Isavia-ANS, HS-Orku og ÍSOR.

Fram kom á fundinum að sjálfvirka jarðskjálftakerfi Veðurstofunnar hefur mælt um 1800 skjálfta frá miðnætti og eru þeir að mestu bundnir við svæði SV af Keili og Trölladyngju. Af þessum 1800 eru 23 skjálftar að stærð 3 eða stærri og um 3 skjálftar eru 4 að stærð eða stærri. Sá stærsti frá miðnætti mældist kl. 16:35, 5,1 að stærð og átti hann upptök um 1 km ASA við Keili.

Vísindaráð fór einnig yfir gervihnattamyndir (InSAR) sem bárust í dag. Úrvinnsla úr þeim myndum sýna meiri færslu en áður hefur orðið vart við á svæðinu síðustu daga. Líklegasta skýringin er sú að kvikugangur sé að myndast undir því svæði þar sem mesta jarðskjálftavirknin hefur verið síðustu daga. Unnið verður betur úr þessum nýju gögnum m.a. með líkangerð til þess að varpa skýrara ljósi á framvindu mála.

Í ljósi þessara nýju gagna sem rædd voru á fundi vísindaráðs í dag og sérfræðingar hafa farið yfir, er mikilvægt að skoða nánar þá sviðsmynd sem snýr að kvikuinnskoti undir svæðinu við Fagradalsfjall.

Mögulegar sviðsmyndir: 

  • Það dregur úr jarðskjálftavirkni næstu daga eða vikur.
  • Hrinan mun færast í aukana með stærri skjálftum, allt að 6 að stærð í nágrenni við Fagradalsfjall
  • Skjálfti af stærða allt að 6.5 verður sem á sér upptök í Brennisteinsfjöllum
  • Kvikuinnskot haldi áfram í nágrenni við Fagradalsfjall:
    • Kvikuinnskotsvirkni minnkar og kvika storknar
    • Leiðir til flæðigoss með hraunflæði sem mun líklega ekki ógna byggð

Núverandi virkni á Reykjanesskaga er kaflaskipt og er erfitt að spá fyrir um nákvæma framvindu og hvort ein sviðsmynd sé líklegri en önnur. Von er á nýjum gögnum síðar í vikunni sem geta varpað skýrara ljósi á ástæður þessarar hrinu. Vísindaráð mun funda aftur á morgun til að leggja frekara mat á þau gögn sem liggja fyrir ásamt því að meta nýjar mælingar.

Wrapped_icelandic_23febto1mar--1-

Nýjasta úrvinnsla úr gervihnattamyndum úr Sentinel-1 sem barst í morgun. Hún sýnir meiri færslu en áður hefur orðið vart við á svæðinu síðustu daga og á því svæði þar sem mesta jarðskjálftavirknin hefur verið. Sjá PDF útgáfu af myndinni hér.


Uppfært 01.03. kl. 10.15

Tæplega 800 jarðskjálftar hafa mælst á Reykjanesi frá miðnætti. Er virknin áfram einkum bundin við svæðið SV við Keili og við Trölladyngju. Í nótt kl. 01:31 varð skjálfti af stærð M4,9 um 2,5 KM VSV af Keili og fannst hann víða á Reykjanesskaga, höfuðborgarsvæðinu, Suðurlandi og Vesturlandi.

Sex skjálftar yfir M3,0 hafa mælst frá miðnætti. Fimm þeirra mældust VSV við Keili en einn SA við Trölladyngju.


Uppfært 28.02. kl. 21.30

Frá miðnætti í dag hafa nú mælst yfir 1600 jarðskjálftar á Reykjanesskaga, þar af 33 yfir M3,0 og sjö M4,0 eða stærri. Virknin er aðallega bundin við svæði sem er um 2 km NA við Fagradalsfjall en eftir hádegi færðist virknin lítillega í NA nær Keili. Auk þess mældust skjálftar við Trölladyngju í nótt og við Grindavík rétt eftir hádegi. Skjálftarnir hafa fundist vel á höfuðborgarsvæðinu að Borgarnesi og austur að Hvolsvelli.

  • M4,7 kl. 00:19 um 2,0 km NA af Fagradalsfjalli
  • M4,0 kl. 07:54 um 1,5 km NA af Fagradalsfjalli
  • M4,3 kl. 11:32 um 3 km NA af Fagradalsfjalli
  • M4,2 kl. 15:39 um 1,5 km VSV af Keili
  • M4,3 kl. 16:29 um 0,5 km V af Keili
  • M4,0 kl. 18:43 um 1,0 km SV af Keili
  • M4,7 kl. 19:01 um 2,0 km SSV af Keili

Yfirfarid_280221

Kortið sýnir staðsetningu jarðskjálfta sem hafa verið yfirfarnir í dag.

M4_280221

Þetta kort sýnir staðsetningu þeirra sjö skjálfta sem hafa mælst M4,0 eða stærri það sem af er degi.


Uppfært 28.02. kl. 13.20

Laust upp úr miðnætti varð jarðskjálfti af stærð 4,7 um 2,8 km NA af Fagradalsgjalli. Klukkan 5:54 mældist svo skjálfti 4,0 að stærð og annar kl. 11:31 um 4,3 að stærð, báðir áttu upptök um 2,5 km NA af Fagradalsfjalli. Tilkynningar hafa borist víðsvegar af Reykjanesskaganum og höfuðborgarsvæðinu, austur á Hvolsvöll og upp í Borgarfjörð, um að skjálftarnir hafi fundist þar.

Eins og fram kom á fundi vísindaráðs almannavarna í gær gefa mælingar síðusta daga engar vísbendingar um kvikusöfnun eða gosóróa á svæðinu.

Yfir 10.000 jarðskjálftar hafa verið staðsettir með sjálfvirka jarðskjálftamælikerfi Veðurstofu Íslands frá því að hrinan hófst í síðustu viku. Um 30 skjálftar yfir M4,0 hafa mælst og um 200 jarðskjálftar hafa verið stærri en M3,0.

Skjamynd-2021-02-28-131415

Uppfært 27.02. kl. 18.40

Vísindaráð almannavarna fundaði á fjarfundi í dag til að ræða jarðskjálftahrinuna á Reykjanesskaga. Fundinn sátu fulltrúar frá Veðurstofu Íslands, Háskóla Íslands, Umhverfisstofnun, Isavia-ANS, HS-Orku og ÍSOR. 

Fram kom á fundinum að virknin í skjálftahrinunni er núna fyrst og fremst bundin við svæðið í kringum Fagradalsfjall eftir M5,2 í morgun og er hrinan sú öflugasta frá árinu 1933.

Vísindaráð fór yfir þær mælingar og gögn sem liggja fyrir s.s. jarðskjálftamælingar, GPS gögn, gasmælingar og úrvinnsla úr gervitunglamyndum. Mælingar gefa engar vísbendingar um að kvika sé að brjóta sér leið upp á yfirborðið, en sýna vel ummerki jarðskjálftanna sem hafa orðið hingað til.

Flestir skjálftar sem mælst hafa síðustu daga eru á um 5 km. dýpi við Fagradalsfjall og hafa ekki færst nær yfirborði, en slíkt gæti verið vísbending um að kvika sé að brjóta sér leið upp á yfirborðið.  Í hrinu sem varð við  Fagradalsfjall árið 1933 urðu all nokkrir kröftugir skjálftar á skömmum tíma, sambærilegir þeim sem nú ganga yfir. Þeirri hrinu lauk án þess að til eldgoss kæmi. Sama má segja um hrinu sem varð árið 1973.

Mynd sem sýnir dæmi um kröftuga skjálfta og hrinur sem orðið hafa á svæðinu við Fagradalsfjall á árunum 1930-2016. Smelltu hér til að sjá stærri útgáfu af myndinni.

Núverandi virkni á Reykjanesskaga sem í raun má rekja aftur um rúmt ár hefur verið kaflaskipt og er erfitt að spá fyrir um nákvæma framvindu, en nú er fyrst og fremst horft á þessar tvær sviðsmyndir:

  • Það dregur úr jarðskjálftavirkni næstu daga eða vikur.
  • Hrinan mun færast í aukana með stærri skjálftum, allt að 5.5-6.5 að stærð.

Yfir 7200 skjálftar hafa mælst frá því að hrinan hófst 24.febrúar og má búast við því að jarðskjálftavirkni haldi áfram næstu daga. Það er því mikilvægt að fólk hugi að innanstokksmunum á heimilum sínum til að tryggja að þeir valdi ekki slysum ef kröftugir skjálftar verða.

Veðurstofan, Háskólinn og samstarfsaðilar munu vinna að fjölgun mælitækja á Reykjanesskaganum á næstu dögum og vikum til að geta áttað sig betur á framvindu hrinunnar. Meðal annars er í skoðun að setja upp fleiri GPS mæla til að átta sig betur á eðli jarðskjálftahrinunnar. Eins er í skoðun að tengjast fleiri jarðskjálftamælum til dæmis þeim sem ÍSOR er með á svæðinu og koma þeim í rauntímavöktun á Veðurstofunni. Að auki er verið að skoða hvort hægt sé að koma fyrir jarðskjálftamælitækjum í Brennisteinsfjöllum sem eru austan við það svæði þar sem helsta virknin. Það gæti mögulega gefið skýrari mynd á þróun mála m.t.t. hvort að von sé á stærri skjálfta sem ætti upptök í Brennisteinsfjöllum en sagan geymir dæmi um upptök kröftugra skjálfta þar t.d. árið 1968.

Uppfært 27.02. kl. 11.30

Frá miðnætti hafa mælst yfir 1100 skjálftar, stærsti skjálftinn mældist 5,2 að stærð kl. 08:07 í morgun og fannst hann vel á höfuðborgarsvæðinu, austur á Skóga og norður í Hrútafjörð. Mínutu síðar mældist skjálfti af stærð 3,9. Um 24 jarðskjálftar yfir 3,0 að stærð hafa þar að auki mælst frá miðnætti. Virknin er aðalega bundin um 2 km NA við Fagradalsfjall og eftir M5,2 skjálftann í morgun virðist virknin hafa færst við SV horn Fagradalsfjalls og er það líklegast vegna spennubreytinga í kjölfar skjálftans.

Yfir 7200 skjálftar hafa mælst frá því að hrinan hófst 24.febrúar og má búast við því að jarðskjálftavirkni haldi áfram næstu daga.

Vegagerðin varar við sprungum sem myndast hafa í Suðurstrandarvegi á Reykjansskaga, vestan við Vigdísarvallaveg. Sprungurnar hafa líklega myndast í kjölfar jarðhræringa sem hafa verið á svæðinu. Í tilkynningu frá Vegagerðinni eru vegfarendur varaðir við sprungunum og þeim bent á að aka varlega um svæðið.

Sprungan í veginum er í tæplega 8.2km fjarlægð í loftlínu frá upptökum M5.7 skjálftans á miðvikudaginn.


Uppfært 27.02. kl. 9.10

Klukkan 08:07 varð jarðskjálfti 5,2 að stærð, um 2.5 km NA af Fagradalsfjalli. Fjöldi eftirskjálfta hafa mælst. Stærsti skjálftinn fannst austur að Skógum og norður að Hvanneyri. Alls hafa rúmlega 600 skjálftar mælst á Reykjanesskaga frá miðnætti. Þar af mældust 9 skjálftar yfir M3,0 að stærð. Af þessum níu mældist sá stærsti M3,8 kl. 2:30 og fannst hann víða á Reykjanesskaga, höfuðborgarsvæðinu og Vesturlandi. Annar skjálfti, af stærð M3,7, mældist kl. 04:14. Hrinan er nú einkum bundin við svæðið milli Fagradalsfjalls og Keilis

Svona hrinur eru ekki einsdæmi á þessu svæði, t.d. mældust um fimm skjálftar af stærð M4,9 til M5,9 við Fagradalsfjall þann 10. júní 1933.

Skjamynd-2021-02-27-085918

Uppfært kl. 17.30

Í dag hafa 21 skjálfti mælst af stærð 3 til 4,4 norðanvert Fagradalsfjall. Á milli klukkan 11:59 og 14:00 mældust 14 jarðskjálftar þeirra og nú laust fyrir klukkan fimm mældust tveir, annar 4,4 að stærð. Þessir skjálftar hafa allir fundist á höfuðborgarsvæðinu og þeir stærstu einnig á Suðurlandi, á Akranesi og í Borgarnesi. Þessi virkni er með upptök í nágrenni við stærsta skjálfta hrinunnar sem varð kl. 10:05 að morgni 24. febrúar sl. og mældist 5,7 að stærð.  

“Við höfum séð hrinur áður þar sem margir skjálftar af svipaðri stærð mælast á stuttum tíma. Þetta er sambærilegt því sem við sáum á Tjörnesbrotabeltinu síðastliðið sumar en þekkist einmitt líka í hrinum á Reykjanesskaganum”, segir Kristín Jónsdóttir, hópstjóri náttúruvárvöktunar á Veðurstofu Íslands. “Klassísk jarðskjálftafræði gerir frekar ráð fyrir einum meginskjálfta og svo eftirskjálftum þar sem stærsti eftirskjálfti hefur styrk sem er 1,2 minni en meginskjálftinn og aðrir skjálftar eru minni. Við höfum hinsvegar mælt 5 aðra skjálfta, til viðbótar við 5,7 skjálftann, sem hafa styrk á bilinu 4,5 og 5. Þetta mætti túlka þannig að í raun séu þetta nokkrir meginskjálftar og svo margar eftirskjálftahrinur.  Jarðskorpan er tiltölulega þunn á Reykjanesskaganum og stærstu skjálftar á þessu hrinusvæði verða ekki mikið stærri þar, einfaldlega vegna þess að jarðskorpan brotnar áður en meiri spenna getur hlaðist upp“, segir Kristín.

Myndin hér að neðan sýnir samsettar Sentinel-1 gervitunglamyndir sem bárust í morgun og spanna tímabilið 19.-25. febrúar. Gervitunglaúrvinnsla staðfestir að færslur hafa mælst á svæðinu milli Svartsengis og Krýsuvíkur en þær nema nokkrum sentímetrum. Flekaskil ganga þvert í gegnum Reykjanesskagann og eru færslurnar sem mælast með gervitunglum til marks um landrekshreyfingar þar sem Evrasíuflekinn færist í austlæga átt og Ameríkuflekinn til vesturs. Engin gögn benda til að eldgos sé yfirvofandi.

Unwrapped_icelandic--1-

Rauður litur táknar hreyfingu í átt að gervitunglinu og fjólublár hreyfingu frá gervitunglinu sem flaug vestur fyrir landið. Svörtu örvarnar yfir landakortinu tákna færslur Evrasíuflekans og Ameríkuflekans. Svörtu örvarnar í hægra horninu niðri sýna stefnu og sjónlínu gervitungls. Stærsti jarðskjálftinn að stærð 5,7 sem varð 24. febrúar síðastliðinn birtist sem rauð stjarna. Hér er myndin á PDF formi.

Gasmælisýni sem tekin voru í gær sýna óvenju há gildi af vetni. Túlkun á mælingunni liggur ekki fyrir en ekki er hægt að útiloka að hún sé til marks um kvikugas á nokkurra kílómetra dýpi sem losnað hafi í jarðskjálftunum. Engar aðrar markverðar breytingar sjást fyrir aðrar gasmælingar en vetni. Mælingarnar verða endurteknar eftir helgi. 

Uppfært kl. 12.20

Nú kl. 12:06 varð jarðskjálfti af stærð 4,4 um 2 km NA af Fagradalsfjalli. Skjálftinn fannst vel á höfuðborgarsvæðinu og allt norður í Borgarnes.


Uppfært 26.02. kl. 9.10

Jarðskjálftahrinan á Reykjanesi er enn í gangi. Frá því um miðnætti hafa mælst um 600 jarðskjálftar á svæðinu. Einn skjálfti af stærð 3.2 mældist núna í morgun kl. 08:37, 2,1 km austur af Fagradalsfjalli. Sskjálftinn fannst á Reykjanesskaganum og áhöfuðborgarsvæðinu. Aðrir skjálftar frá því um miðnætti hafa verið minni. Frá því að hrinan hófst hafa mælst hátt í 5000 skjálftar á svæðinu.

Uppfært 25.02. kl. 15.00

Núna kl. 14:35 varð skjálfti af stærð M3,5 rétt fyrir norðan Fagradalsfjall. Hann fannst á Reykjanesi og höfuðborgarsvæðinu.

Hrinan er enn í gangi en rúmlega 2500 jarðskjálftar hafa verið staðsettir með sjálvirka jarðskjálftamælikerfi Veðurstofu Íslands frá miðnætti.

Uppfært 25.02. kl. 10.00

Tveir skjálftar yfir M3 að stærð mældust á Reykjanesskaganum í nótt. Sá fyrri mældist M3,1 að stærð kl. 00:53 og átti upptök um 4 km SSV af Fagradalsfjalli en sá síðari mældist M3,4 að stærð kl. 03:26 um 2,2 km N af Krýsuvík. Fundust báðir víða á höfuðborgarsvæðinu og á Reykjanesskaganum.

Jarðskjálftahrinan er enn í gangi þó heldur hafi dregið úr fjölda kröftugra skjálfta í bili. Sjálfvirka jarðskjálftamælikerfi Veðurstofu Íslands hefur mælt um 1000 jarðskjálfta á svæðinu frá miðnætti.

Núverandi virkni á Reykjanesskaga sem í raun má rekja aftur um rúmt ár hefur verið kaflaskipt og er erfitt að spá fyrir um nákvæma framvindu, en nú er fyrst og fremst horft á þessar tvær sviðsmyndir:

  • Það dregur úr jarðskjálftavirkni næstu daga eða vikur.
  • Hrinan mun færast í aukana með stærri skjálftum, allt að 5.5-6.5 að stærð.

Veðurstofan mun halda áfram að fylgjast náið með þróun mála. Mælingar hingað til gefa engar vísbendingar um kvikuinnskot í þessari hrinu en sérfræðingar Veðurstofunnar munu halda áfram að mæla gasútstreymi á svæðinu, en ummerki um kvikugös, ef einhver væru, gætu sést í gasmælingum.

Melissa Anne Pfeffer við gasmælingar á Reykjanesskaganum í gær. (Ljósmynd: Veðurstofa Íslands/Sara Barsotti)

Uppfært kl. 16.45

Í jarðskjálftahrinum eins og þeirri sem nú gengur yfir getur grjóthrun orðið og jafnvel skriður eða snjóflóð fallið. Eitthvað hefur verið um skriðuföll á Reykjanesskaga vegna skjálftanna. Meðal annars féll talsvert af grjóti yfir gamla Suðurstandaveginn sem nú er aflagður. Einnig hafa tilkynningar borist af grjóthruni í Þorbirni við Grindavík, úr Keili, við Djúpavatnsleið og við Kleifarvatn.



Myndir sem sýna grjóthrun í Þorbirni og var tekin í eftirlitsflugi með þyrlu Landhelgisgæslunnar í morgun. (Ljósmyndir: Veðurstofan/Esther Hlíðar Jensen)

Á bloggsíðu ofanflóðavaktar Veðurstofunnar kemur fram að ef skjálftavirknin heldur áfram er talin meiri hætta á að jarðskjálftarnir komi af stað grjóthruni en öðrum ofanflóðum. Ef skjálftavirkni færist austar stækkar áhrifasvæðið og nær þá u.þ.b. yfir Reykjanesskaga, norður í Hvalfjarðarsveit, umhverfis Þingvallavatn og austur að Þjórsá. Á því svæði eru mörg fjöll sem nýtt eru til útivistar, m.a. Esjan, Hengill, Ingólfsfjall, Vífilsfell, Helgafell og Keilir. Fólki er bent á að fara varlega í bröttum hlíðum og forðast svæði þar sem grjót eða snjór getur hrunið.

Jarðskjálftahrinan minnir íbúa á þekktum jarðskjálftasvæðum á mikilvægi þess að huga að lausum innanstokksmunum og kynna sér varnir og viðbúnað vegna jarðskjálfta á vefsíðu almannavarna.


Uppfært kl. 13.58

Kristín Jónsdóttir, fagstjóri náttúruvárvöktunar á Veðurstofu Íslands, segir í viðtali við fréttastofu RÚV að óstöðugleiki nái yfir stórt svæði. Jarðskjálftarnir í morgun hafa verið milli Kleifarvatns og Grindavíkurvegar. Hins vegar hafa engir skjálftar fundist milli Kleifarvatns og Bláfjalla á þessu ári. Þar hafa í sögunni orðið skjálftar að stærð 6,5. Það gæti verið vísbending um að það svæði sé læst og losni ekki um spennu þar nema í stærri skjálfta. „Við erum í miðjum atburði núna. Við teljum að meðan þessi óstöðugleiki er í gangi þá eru auknar líkur á því að það verði enn þá fleiri skjálftar og jafnvel stærri skjálftar“, sagði Kristín í viðtali við Hólmfríði Dagnýju Friðjónsdóttur í aukafréttatíma í sjónvarpi í hádeginu. „Hrinan byrjaði austan við Fagradalsfjall og svo flutti hún sig nær Krýsuvík í Núpshlíðarháls og svo hafa fleiri skjálftar dreift sér á ríflega 20 km langt svæði milli Kleifarvatns og Sýlingafells..“

Kristín segir hrinuna óvenjulega, hún sé kröftug og henni fylgi margir kröftugir skjálftar á stuttum tíma. Engar vísbendingar eru þó um gosóróa, en sérfræðingar Veðurstofunnar hafa meðal annars verið við gasmælingar á svæðinu til að meta hvort einhverjar breytingar séu merkjanlegar á gasútstreymi. Ummerki um kvikugös, ef einhver væru, gætu sést í gasmælingum.

Mikilvægt er að gera sér grein fyrir hættum sem stafa af hrinum sem þessum:

  • Skriður og grjóthrun geta átt sér stað eftir stóra jarðskjálfta, líklegast á svæðum með óstöðugar hlíðar, bratta klettarveggi og laust efni, t.d. í nágrenni Kleifarvatns.
  • Skjálftar af stærð M5.5-6.5 geta átt sér stað á Reykjanesskaganum. Slíkir skjálftar geta valdið tjóni víða m.a. á höfuðborgarsvæðinu.
  • Gas getur safnast fyrir í lægðum þegar það er logn eða hægur vindur.


Uppfært kl. 12.48

Núna kl. 12:37 varð skjálfti af stærð M4,8 við Kleifarvatn.

Uppfært kl. 11.36

Skjálftinn sem mældist M5.7 í morgun er hluti af hrinu sem hófst í kringum Krýsuvík fyrir nokkrum dögum. Frá miðnætti hafa mælst um 500 skjálftar í hrinunni. Annar skjálfti M4.2 mældist um kl. 10.27 og átti hann upptök í Núpstaðahálsi innan við 1 km NV af Krýsuvík. Hefur sjálfvirka jarðskjálftakerfi Veðurstofunna numið alls 11 skjálfta yfir M4,0 að stærð frá því hrinan hófst.


Uppfært kl. 11.20
Jarðskjálftinn á Reykjanesskaga hefur fundist víða um land. Veðurstofan hefur fengið tilkynningar meðal annars úr Húnaþingi, Ólafsvík, Ísafirði og frá Hellu.

Við bendum á að vegna jarðskjálftahrinunnar eru auknar líkur á grjóthruni í  og skriðuföllum á Reykjanesskaga á meðan á hrinunni stendur.

Uppfært kl. 10.30

Rúmlega 500 jarðskjálftar mældust á Reykjanesskaganum í síðustu viku, um 100 fleiri en í fyrri viku. Mesta virknin var annars vegar við Fagradalsfjall, einkum síðari hluta vikunnar og hins vegar norðan og austan Grindavíkur. Stærsti skjálftinn við Fagradalsfjall var 2,3 að stærð þann 21. febrúar kl. 09:28 og sá stærsti við Grindavík, 2,8 þann 21. febrúar kl. 17.30. Engar tilkynningar bárust um að þessir skjálftar hefðu fundist. Þann 18. febrúar kl. 08:10 varð skjálfti 2,9 að stærð við Núpshlíðarháls. Það var stærsti skjálfti vikunnar. Um 20 jarðskjálftar mældust á Reykjaneshrygg, stærsti 18. febrúar kl. 08:16 M2,8.

Athugið að skjálftavirknin er bundin við Reykjanesskaga. Aðrar staðsetningar á skjálftum eru óáreiðanlegar meðan verið er að fara yfir sjálfvirkar mælingar. Á kortum okkar birtast óyfirfarin gögn sem þýðir að þar má greina tákn um staðsetningu skjálfta utan Reykjanesskaga sem ekki eru áreiðanleg gögn.

Færsla kl. 10.15

Í dag kl. 10:05 varð skjálfti af stærð M5.7 3.3 km SSV af Keili á Reykjanesskaga. Hann fannst víða á Suðvesturhorni landsins, m.a. í Vestmannaeyjum. Fjöldi eftirskjálfta hefur fylgt og búast má við frekari eftirskjálfum.

Halda áfram að lesa

Veður

Ársfundur EUROVOLC samstarfsverkefnisins hófst í dag

Mynd tekin af virkni í Etnu í desember 2020. Etna er hæsta virka eldfjall Evrópu og nær í 3.329 metra hæð yfir sjávarmáli og er ein virkasta eldstöð í heimi. (Ljósmynd: EUROVOLC/Boris Behncke)


Um 120 sérfræðingar frá 9 Evrópulöndum taka þátt fundinum sem stendur fram í næstu viku

1.3.2021

Í dag hófst ársfundur alþjóðlega EUROVOLC samstarfsins. EURopean Network of Observatories and Research Infrastructures for VOLCanology er samstarfsvettvangur fjölda sérfræðinga í jarðvísindum frá níu Evrópulöndum, en verkefnið hófst í byrjun árs 2018 og mun standa fram í lok nóvember á þessu ári. Fundurinn er allur rafrænn.

EUROVOLC er víðtækt samstarfsverkefni í eldfjallafræði, styrkt af Innviðaáætlun Horizon 2020 rammaáætlunar Evrópusambandsins. Verkefnið tekur til 19 samstarfsaðila þar af eru þrír á Íslandi. Veðurstofa Íslands leiðir verkefnið og helstu samstarfsaðilar í verkefninu eru Eldfjalla- og Jarðeðlisfræðistofnun Ítalíu (INGV) í Cantania, á Sikiley og Jarðvísindastofnun Háskólans. Verkefnið er styrkt um 5 milljónir evra (um 780 millj. íslenskar krónur) en heildarumfang þess eru 6 milljónir evra. Um fjórðungur styrkfjárins rennur til íslenskra stofnana, en auk Veðurstofunnar og Háskólans eru Almannavarnir einnig þátttakendur í verkefninu. Fjórum af 25 aðalverkþáttum verkefnisins stýrir jarðvísindafólk á Veðurstofu Íslands.

Markmiðið að efla þekkingu okkar og getu til að vakta og skilja hegðun eldstöðva

„Markmið verkefnisins er að auka samvinnu milli þeirra stofnanna og vísindamanna innan Evrópu sem vakta og rannsaka Evrópsk eldgosasvæði“, segir Kristín S. Vogfjörð hópstjóri jarðar og eldgosa á Veðurstofu Íslands sem leiðir verkefnið. „Það er mikilvægt að þessi stóri hópur vísindamanna deili þekkingu og upplýsingum sín á milli til að efla þekkingu okkar og getu til að vakta og skilja hegðun eldstöðva“, segir Kristín.

EUROVOLC er samsett úr þrem mismunandi tegundum verkefna; svonefndum “networking”-verkefnum, rannsóknarverkefnum og verkefnum sem veita aðgengi að gögnum og rannsóknarinnviðum í eldfjallaeftirlits- og rannsóknarstofnunum Evrópu. Bæði Veðurstofan og Háskóli Íslands munu veita aðgengi að rannsóknarinnviðum sínum til umsækjenda sem hyggjast stunda rannsóknir á íslenskum eldfjöllum, en önnur eldfjallasvæði sem eru í boði eru Etna og Vesúvíus á Ítalíu og eldfjöll á Azoreyjum ásamt eldfjöllum á Reunion-eyju í Indlandshafi og á Gualdeloupe og Montserrat eyjum í Karíbahafi. Þá er einnig veitt agengi að rannsóknarstofum á Spáni og Ítalíu.

Umfangsmikið verkefni sem skilar miklum ávinningi

„Þetta samstarfsverkefni er mjög umfangsmikið og gríðarlega verðmætt fyrir rannsóknarstofnanir og þær stofnanir sem stunda vöktun eldstöðva“, segir Kristín. „Við sáum það til dæmis í gosinu í Eyjafjallajökli hversu víðtæk áhrif gossins voru um alla Evrópu þannig að það er ekki síst þess vegna sem samstarf innan Evrópu í eldfjallafræði er mikilvægt. Verkefnið styrkir einnig stöðu íslensks jarðvísindafólks í alþjóðlegum rannsóknarverkefnum og mörg þessara verkefna fjármagna vöktun og rannsóknir á eldstöðvum hér á Íslandi. Þannig skilar EUROVOLC verkefnið miklum ávinningi til náttúruváreftirlits og rannsókna hér á Íslandi“, segir Kristín.

Skjamynd-2021-03-01-081233

Ein af mikilvægustu afurðum EUROVOLC samstarfsins er Evrópska eldfjallavefsjáin. Vefsjáin, sem er náskyld Íslensku eldfjallavefsjánni, geymir mikið magn upplýsinga og fróðleiks um eldstöðvar Evrópu, bæði fyrir rannsóknasamfélagið sem og almenning.

Fundurinn nú er þriðji ársfundur EUROVOLC verkefnisins, og mörgum af rannóknarverkþáttum þess er að ljúka. Helsta áhersluatriði fundarins nú er að styrkja tengsl starfsfólks eldfjallaeftirlitsstofnana við vísindasamfélagið. Fundurinn stendur yfir í sex daga og verður m.a. fjallað um opnun Evrópsku Eldfjallavefsjárinnar sem leidd er af Söru Barsotti, en hún leiðir einnig eldfjallavöktun Veðurstofunnar. Einnig verða kynntar helstu niðurstöður og afrakstur hópa sem vinna að rannsóknum á: (1) kvikuhreyfingum og ferlum í jarðskorpunni; (2) samspili eldfjalla og lofthjúps; (3) eldfjallavá og samskiptum við viðbragðsaðila; (4) ásamt nýjungum í mælitækni. Ennfremur verður farið yfir atburðarrás yfirstandandi eldgoss í Etnu og jarðhræringa á Reykjanesskaga.

EUROVOLC byggir á afrakstri og eða tengist öðrum stórum Evrópuverkefnum (EPOS, FUTUREVOLC og MED-SUV) sem miða öll að uppbyggingu rannsóknarinnviða Evrópu í jarðvísindum, sem og eflingu og samtengingu rannsóknarumhverfis jarðvísindafólks álfunnar.

Kort_stodvar

Það eru allmörg virk eldfjallasvæði í Evrópu og hér eru þau helstu merkt inn á kort. Einnig nær EUROVOLC verkefnið yfir önnur virk svæði sem tengjast löndum Evrópu s.s. eldfjöllum á Reunion-eyju í Indlandshafi og á Gualdeloupe og Montserrat eyjum í Karíbahafi.

Halda áfram að lesa

Veður

Skjálfti M5.7 á Reykjanesskaga


Hluti af hrinu sem hófst í kringum Krýsuvík fyrir nokkrum dögum. Frá miðnætti hafa mælst um 500 skjálftar í hrinunni. 

24.2.2021

Í dag kl. 10:05 varð skjálfti af stærð M5.7 3.3 km SSV af Keili á Reykjanesskaga. Hann fannst víða á Suðvesturhorni landsins, m.a. í Vestmannaeyjum. Fjöldi eftirskjálfta hefur fylgt og búast má við frekari eftirskjálfum.

Uppfært kl. 11.36

Skjálftinn sem mældist M5.7 í morgun er hluti af hrinu sem hófst í kringum Krýsuvík fyrir nokkrum dögum. Frá miðnætti hafa mælst um 500 skjálftar í hrinunni. Annar skjálfti M4.2 mældist um kl. 10.27 og átti hann upptök í Núpstaðahálsi innan við 1 km NV af Krýsuvík. Hefur sjálfvirka jarðskjálftakerfi Veðurstofunna numið alls 11 skjálfta yfir M4,0 að stærð frá því hrinan hófst.


Uppfært kl. 11.20
Jarðskjálftinn á Reykjanesskaga hefur fundist víða um land. Veðurstofan hefur fengið tilkynningar meðal annars úr Húnaþingi, Ólafsvík, Ísafirði og frá Hellu.

Við bendum á að vegna jarðskjálftahrinunnar eru auknar líkur á grjóthruni og skriðuföllum á Reykjanesskaga á meðan á hrinunni stendur.

Uppfært kl. 10.30

Rúmlega 500 jarðskjálftar mældust á Reykjanesskaganum í síðustu viku, um 100 fleiri en í fyrri viku. Mesta virknin var annars vegar við Fagradalsfjall, einkum síðari hluta vikunnar og hins vegar norðan og austan Grindavíkur. Stærsti skjálftinn við Fagradalsfjall var 2,3 að stærð þann 21. febrúar kl. 09:28 og sá stærsti við Grindavík, 2,8 þann 21. febrúar kl. 17.30. Engar tilkynningar bárust um að þessir skjálftar hefðu fundist. Þann 18. febrúar kl. 08:10 varð skjálfti 2,9 að stærð við Núpshlíðarháls. Það var stærsti skjálfti vikunnar. Um 20 jarðskjálftar mældust á Reykjaneshrygg, stærsti 18. febrúar kl. 08:16 M2,8.

Athugið að skjálftavirknin er bundin við Reykjanesskaga. Aðrar staðsetningar á skjálftum eru óáreiðanlegar meðan verið er að fara yfir sjálfvirkar mælingar. Á kortum okkar birtast óyfirfarin gögn sem þýðir að þar má greina tákn um staðsetningu skjálfta utan Reykjanesskaga sem ekki eru áreiðanleg gögn.

Halda áfram að lesa

Vinsælast

Allur réttur áskilin © 2021 Tíðin