Íþrótta og ólympíu samband Íslands

Verulegar tilslakanir á íþróttastarfi á ný!

14.04.2021

Heilbrigðisráðherra hefur nú gefið út nýja reglugerð sem tekur gildi 15. apríl og gildir til 5. maí nk.
Með henni eru gerðar verulegar tilslakanir á íþróttastarfi á ný og verður aftur opnað fyrir starfsemi sundstaða og líkamsræktarstöðva, að uppfylltum ákveðnum skilyrðum.  
Helstu breytingar í reglugerð heilbrigðisráðherra sem snerta íþróttastarfið eru eftirfarandi:

• Íþróttaæfingar og -keppnir barna og fullorðinna verða heimilar og hámarksfjöldi þátttakenda miðast við 50 manns í rými. Heimilt verður að hafa allt að 100 áhorfendur á íþróttaviðburðum, að uppfylltum ákveðnum skilyrðum sem lúta að skráningu, eins meters nándarmörkum á milli ótengdra aðila og grímuskyldu. Einungis er heimilt að hafa tvö sótthólf fyrir að hámarki 100 áhorfendur í hvoru hólfi, á íþróttaviðburðum.

• Sund- og baðstaðir mega opna fyrir 50% af leyfilegum hámarksfjölda gesta. Börn fædd 2015 eða síðar telja ekki með í hámarksfjölda.

• Líkamsræktarstöðvar mega opna að uppfylltum ákveðnum skilyrðum, m.a. um sótthreinsun, skráningu í tíma, hólfun og 20 manna hámarksfjölda.

• Skíðasvæði mega opna fyrir 50% af hámarksfjölda gesta en þar verður að gæta að tveggja metra lágmarksfjarlægð og nota grímur sé ekki hægt að tryggja hana.

• Opinberir staðir mega taka á móti gestum, en hámarksfjöldi í rými er 20. Gæta þarf að tveggja metra lágmarksfjarlægð og nota grímur sé ekki hægt að tryggja hana.

Lárus Blöndal, forseti ÍSÍ: „Íþróttahreyfingunni er mjög létt við þessar tilslakanir enda öllum mikið í mun að koma íþróttastarfinu aftur af stað af fullum krafti. Það var afar erfitt að fá þetta bakslag í starfið þegar allt var komið á fullt eftir erfiðan fyrri part veturs en nú erum við vonandi komin fyrir vind. Maður leyfir sér að vera bjartsýnn á framhaldið þó að kórónuveiran sé ólíkindatól. Það hefur verið unnið baki brotnu undanfarnar vikur að úrlausnum, af hálfu yfirvalda og forystu íþróttahreyfingarinnar og við erum afskaplega ánægð með að fá þessar tilslakanir varðandi íþróttirnar. Við erum þakklát mennta- og menningarmálaráðherra fyrir aðkomu hennar að þessum lausnum og samstarfið við hreyfinguna. Það er ekki nema vika í sumardaginn fyrsta og varla hægt að hugsa sé betri sumargjöf en að hefja aftur æfingar og keppni í íþróttum í landinu.“ 

Sjá frétt á vef heilbrigðisráðuneytis.

Ný reglugerð heilbrigðisráðherra, sem gildir til 5. maí 2021.

Íþrótta og ólympíu samband Íslands

Verum hraust – Hlaðvarp ÍSÍ

12.05.2021

Í hlaðvarpi ÍSÍ – Verum hraust má hlusta á samtöl við besta íþróttafólk og þjálfara Íslands sem deila sinni sögu og leyfa hlustanda að kynnast þjálfuninni og hugarfarinu sem þarf til að ná árangri á stærstu íþróttasviðum jarðar: Ólympíuleikum og heimsmeistaramótum.

Guðni Valur Guðnason var nýlega í skemmtilegu viðtali í hlaðvarpinu en hann vann einmitt til silfurverðlauna í kringlukasti á stórmóti í Split um síðastliðna helgi. Hægt að smella hér til að horfa á viðtalið við Guðna Val í heild sinni en það viðtal og fleiri skemmtileg viðtöl hlaðvarpsins er að finna á öllum helstu veitum, Spotify og Apple iTunes. 

Verum hraust – Hlaðvarp ÍSÍ á Libsyn.

Verum hraust – Hlaðvarp ÍSÍ á Youtube-síðu ÍSÍ.

Halda áfram að lesa

Íþrótta og ólympíu samband Íslands

Samþykktir fyrri hluta 75. Íþróttaþings ÍSÍ

12.05.2021

Fyrri hluti 75. Íþróttaþings ÍSÍ fór fram í formi fjarþings 7. maí sl. Þrjár tillögur voru teknar til afgreiðslu á þinginu. Tillögunum var öllum vísað til umfjöllunar í fjárhagsnefnd þingsins og höfðu allir þingfulltrúar tækifæri til að starfa með nefndinni.

Samþykktar tillögur og upplýsingar um kosningar til framkvæmdastjórnar ÍSÍ, dómstóls ÍSÍ, áfrýjunardómstól ÍSÍ og kjörnefndar er að finna hér.

Halda áfram að lesa

Íþrótta og ólympíu samband Íslands

Fráfarandi stjórnarfólk ÍSÍ

08.05.2021

Á hverju Íþróttaþingi verða einhverjar breytingar á skipan framkvæmdastjórnar ÍSÍ og svo var einnig á 75. Íþróttaþingi ÍSÍ sem hófst á föstudag sl. Fjórir einstaklingar gáfu ekki kost á sér til áframhaldandi setu í framkvæmdastjórn að þessu sinni, allt reynslumikið fólk sem starfað hefur lengi í íþrótthreyfingunni þó að þau eigi mismunandi langa setu að baki í framkvæmdastjórn ÍSÍ. Sigríður Jónsdóttir, fráfarandi 1. varaforseti ÍSÍ, á að baki 25 ára samfellda setu í stjórn ÍSÍ, Lilja Sigurðardóttir sex ára stjórnarsetu og Þráinn Hafsteinsson fjögurra ára stjórnarsetu en öll hafa þau sinnt leiðtogastörfum innan hreyfingarinnar í áratugi og eru hvergi hætt á þeim vettvangi þó þau hætti nú stjórnarstörfum fyrir ÍSÍ.

Einnig urðu skipti á fulltrúa Íþróttamannanefndar ÍSÍ í framkvæmdastjórn ÍSÍ, þ.e. Ásdís Hjálmsdóttir Annerud kemur inn í stað Dominiqua Ölmu Belányi sem setið hefur í framkvæmdastjórn síðastliðin tvö ár.

ÍSÍ þakkar þeim öllum fyrir frábær störf í þágu ÍSÍ og íþróttahreyfingarinnar í landinu og óskar þeim velfarnaðar í starfi og leik.

Á meðfylgjandi mynd er ofangreint fráfarandi stjórnarfólk ÍSÍ ásamt forseta ÍSÍ og framkvæmdastjóra.

Halda áfram að lesa

Vinsælast

Allur réttur áskilin © 2021 Tíðin